Lukas skrifi en

21 Di Yesus opo en ede luku, dan a si fa den guduman ben e poti moni na ini den monikisi. 2 Ne a si wan pôti uma di masra ben dede. A poti tu sensi* di no ben abi furu waarde na ini a kisi. 3 Dati meki Yesus taki: „Mi e taigi unu: A pôti uma disi poti moro moni leki ala den tra sma disi. 4 Ala den sma disi poti san tan abra fu a moni fu den. Ma na uma disi pôti èn tòg a teki ala san a abi fu sorgu ensrefi, dan a poti en na ini a kisi.”

5 Bakaten, son sma ben e taki fa a tempel meki so moi nanga moi ston èn nanga sani di sma ben gi Gado. 6 Dati meki Yesus taki: „Ala den sani di unu e si dya, no o de moro. Wan dei o kon te nowan ston o tan na tapu a trawan. Den o broko alamala puru.” 7 Dan den sma aksi en: „Leriman, o ten den sani disi o psa? Fa wi o sabi taki a ten doro fu den sani disi psa?” 8 A taki: „Luku bun taki sma no kori unu. Bika furu sma o gebroiki mi nen èn den o taki: ’Mi na a Krestes’ èn ’A ten* de krosbei kba’. Un no musu waka na den baka 9 èn un no musu frede te unu e yere taki feti e feti èn taki dyugudyugu de. Bika den sani disi musu psa fosi, ma a kba no o kon ete.”

10 A taigi den tu: „A wan pipel o go feti nanga a tra pipel èn a wan kownukondre o go feti nanga a tra kownukondre. 11 Bigi gronseki o de èn na ini a wan presi baka a trawan angriten nanga takru siki di e kiri bun furu sma o de. Sma o si sani di o meki den frede èn den o si bigi sani fu hemel.

12 Ma fosi ala den sani disi psa, sma o grabu unu, den o du ogri nanga unu, den o tyari unu go na den snoga nanga straf’oso èn den o srepi unu go na fesi kownu nanga granman fu mi nen ede. 13 Ma disi o meki taki unu man preiki gi den. 14 Ma unu no abi fu prakseri na fesi fa unu o opo taki gi unsrefi, 15 bika mi o gi unu koni fu sabi san unu musu taki. Nowan fu un feanti o man sori taki unu fowtu èn den no o man piki unu baka. 16 Boiti dati, srefi p’pa nanga m’ma, brada, famiriman nanga mati o tyari unu go na krutuman* èn den o kiri sonwan fu unu. 17 Ala sma o teige unu fu di unu na mi bakaman. 18 Ma tòg un no o lasi nowan fu den w’wiri na un ede. 19 Te unu hordoro, dan unu o kisi libi.

20 Te unu e si taki legre seti kampu lontu Yerusalem, dan un musu sabi taki a no langa moro fosi a foto kisi pori. 21 Dan den sma di de na Yudea musu bigin lowe go na den bergi, den sma di de na ini Yerusalem musu hari gwe fu drape èn den sma di de na den boitipresi no musu go na ini a foto. 22 Bika disi na a ten te Gado o strafu a foto,* so taki ala sani di skrifi na ini Gado Buku kan kon tru. 23 Na a ten dati a o hebi srefsrefi gi den uma di de nanga bere èn gi den wan di abi pkin na bobi ete! Bika bigi problema o de na ini a kondre èn Gado o strafu a pipel disi. 24 Sma o kiri den nanga fet’owru èn den o tyari den go na tra kondre leki strafman. Trakondre sma* o masi Yerusalem teleki a ten fu den trakondre sma psa.

25 Boiti dati, marki o de fu si na a son, a mun nanga den stari. Sma na grontapu o frede kfalek èn den no o sabi san fu du, bika a se o meki b’bari èn a o rigeri. 26 Te den krakti fu hemel o seki, sma o bruya fu di den no sabi san o psa nanga grontapu èn den o frede te fu dede. 27 Dan den o si a Manpkin fu libisma e kon na ini wan wolku nanga krakti èn nanga bigi glori. 28 Ma te den sani disi e bigin psa, dan un musu abi dek’ati èn un no musu frede, bika a ferlusu fu unu de krosbei.”

29 Baka dati, a ferteri den wan agersitori: „Luku a figabon nanga ala den tra bon. 30 Te unu e si taki den e bigin gi bromki, dan unu sabi taki a waran ten fu a yari de krosbei. 31 Na so a de tu taki te unu e si den sani disi e psa, dan un musu sabi taki a Kownukondre fu Gado de krosbei. 32 Unu kan bribi mi: Den sma fu a ten disi o de na libi ete te ala den sani disi o psa. 33 Hemel nanga grontapu o psa gwe, ma den sani di mi taki o tan fu ala ten.

34 Luku bun taki noiti un ati kon hebi fu di unu e nyan èn dringi tumsi furu, noso fu di unu e broko un ede nanga na aladei libi. Noso a dei dati o kon na unu tapu sondro taki unu ferwakti dati. 35 A o de leki wan krafana. A o kon na tapu ala den sma di e libi na grontapu. 36 Dati meki un musu tan na ai èn un musu begi ala ten taki unu man lowe gi ala den sani di musu psa èn taki unu kan tnapu na fesi a Manpkin fu libisma.”

37 Na so Yesus ben e gi leri ini a tempel na deiten, ma te neti a ben e go na doro èn a ben e sribi tapu na Olèif-bergi. 38 Fruku m’manten ala den sma ben gwenti kon na en na ini a tempel fu arki en.