A di fu tu brifi gi den Korentesma

5 Na oso fu wi dyaso na grontapu na wi skin di de leki wan tenti. Wi sabi taki efu na oso disi broko,* Gado o gi wi wan oso na hemel di no meki nanga libisma anu èn di o tan fu têgo. 2 Solanga wi de na ini na oso* disi wi e soktu, bika wi e angri fu go tan na ini wi oso na hemel.* A o tapu wi leki wan krosi 3 èn te wi weri en, wi no o de nanga sososkin. 4 Fu taki en leti, wi e geme na ini a tenti disi fu di a de leki wan hebi gi wi. A no de so taki wi wani puru a tenti disi, ma wi wani kisi a tanpresi na ini hemel. Dan libi kan kon na ini a presi fu dede. 5 Na Gado sreka wi gi a sani disi èn na en gi wi en santa yeye leki wan dyaranti* taki wi o kisi den blesi di o kon.

6 Dati meki ala ten wi abi howpu èn wi sabi taki solanga wi skin na wi oso, wi no de na Masra. 7 Wi sabi disi fu di wi e waka nanga bribi èn no nanga san ai e si. 8 Wi no e tweifri srefsrefi èn wi ben o feni en moro bun fu kmoto na ini a skin disi fu go tan na Masra. 9 Fu dati ede, awinsi wi e tan nanga en noso wi no de nanga en, tòg wi e du muiti fu a feni wi bun. 10 Bika wi alamala o abi fu kon na fesi a krutuman-sturu fu Krestes. Dan ibri sma o kisi pai fu den sani di a du di a ben de nanga en libisma skin ete, awinsi a ben du bun noso ogri.

11 Sobun, fu di wi sabi taki wi musu abi lespeki gi Masra, meki wi e tan gi sma dek’ati fu bribi san wi e taki. Gado sabi suma na wi èn mi e howpu taki a konsensi fu unu o yepi unu tu fu kon sabi suma na wi. 12 A no de fanowdu taki wi sori unu baka taki wi na dinari fu Krestes, ma wi e taki den sani disi fu gi unu dek’ati fu taki bun fu wi. Na so unu kan piki den sma di e meki bigi fu san den e si nanga den ai, ma di no e meki bigi fu san de na ini na ati. 13 Kande gi unu a gersi leki wi lasi wi ferstan, ma san wi du, wi du gi Gado. Tòg wi de nanga krin ferstan èn wi wani taki sani go bun nanga unu. 14 A lobi fu Krestes naki wi ati, bika wi kon ferstan taki wán sma dede gi ala sma, fu di ala sma ben dede. 15 Sobun, a dede gi ala sma. Dati meki den sma di e libi, no musu libi gi densrefi moro, ma gi a sma di dede gi den èn di kisi libi baka.

16 Dati meki wi no e si nowan sma moro leki fa libisma e si den. Srefi efu wi ben si Krestes na a fasi dati fosi, wi no e si en so moro. 17 Fu dati ede, iniwan sma di de wán nanga Krestes, na wan nyun sani di Gado meki. Den owru sani no de moro. Luku, nyun sani kon de now. 18 Ma ala den sani disi kmoto fu Gado di meki wi kon bun baka nanga en nanga yepi fu Krestes. A gi wi a wroko fu ferteri sma fa den kan kon bun baka nanga en. 19 Wi e ferteri sma taki Gado meki libisma kon bun baka nanga en nanga yepi fu Krestes èn taki a no hori den sondu fu den na prakseri. A gi wi a wroko fu ferteri sma fa den kan kon bun baka nanga en.

20 Wi na boskopuman di e teki presi gi Krestes. Sobun, leki sma di e teki presi gi Krestes, wi e begi unu: „Kon bun baka nanga Gado.” A de neleki Gado e gebroiki wi fu begi unu fu du disi. 21 A ben meki a sma di no ben abi sondu, tron wan sondu-ofrandi gi wi, so taki nanga yepi fu en wi kan tron sma di Gado feni bun.