Gi den Hebrewsma

2 Dati meki a de fanowdu fu poti moro prakseri leki san wi gwenti na den sani di wi yere, so taki noiti wi no drifi gwe. 2 A boskopu* di den engel ben tyari, ben de fu fertrow èn efu wan sma no ben e du san a boskopu taki noso efu a ben trangayesi en, dan a ben e kisi a strafu di a musu kisi. 3 Fa wi o man wai pasi gi strafu efu wi no poti prakseri na a bigi sani disi di Gado du fu ferlusu wi? Bika a Masra fu wi ben de a foswan di ben taki fu a boskopu disi èn den sma di yere san a taki, ferteri wi a boskopu disi tu. 4 Gado sori wi taki san den sma disi taki, tru. Bika a ben meki wondru* nanga bigi sani psa èn a ben gi den futuboi fu en a santa yeye soleki fa ensrefi ben wani.

5 A no poti engel fu tiri a grontapu na ini a ten di e kon. Dati na a grontapu di wi e taki fu en. 6 Ma wan leisi wan man ben taigi sma: „San na wan libisma taki yu e prakseri en, noso san na a pkin fu wan libisma taki yu e sorgu en? 7 Yu meki a kon de pkinso moro lagi leki den engel. Yu gi en glori nanga grani èn yu poti en leki basi fu den sani di yu meki. 8 Yu poti ala sani na en ondro.” Gado poti ala sani na en manpkin ondro, èn dati meki nowan sani ben de di no ben de na en ondro. Ma wi no e si ete taki ala sani poti na en ondro. 9 Ma wi e si taki Yesus, di ben meki kon de pkinso moro lagi leki den engel, kisi glori nanga grani fu di a dede. Na so a bun-ati fu Gado meki taki a ben kan dede gi ala sma.

10 Ala sani de fu gi Gado glori èn na en meki taki ala sani kon de. Sobun, fu meki furu manpkin kisi glori, a ben fiti taki Gado gi pasi taki a Moro Prenspari Fesiman nyan pina. Na a fasi dati a ben man ferlusu den, 11 bika a wan di e meki sma kon santa èn den sma di a meki kon santa, abi a srefi P’pa. Dati meki Masra no e syen fu taki dati den na en brada, 12 bika a e taki: „Mi o ferteri den brada fu mi fu a nen fu yu. Na mindri den sma di kon makandra fu anbegi yu, mi o prèise yu nanga singi.” 13 Boiti dati, a e taki: „Mi o poti mi fertrow na en tapu.” A e taki tu: „Luku, mi de dya nanga den yongu pkin di Yehovah* gi mi.”

14 We, fu di den „yongu pkin” disi na sma di abi libisma skin, meki ensrefi ben tron libisma* tu, so taki nanga a dede fu en a ben kan meki Didibri, a wan di man kiri sma, kon tron noti. 15 Na a fasi disi a ben kan fri ala den sma di ben de na ini katibo den heri libi langa, fu di den ben frede dede. 16 Bika a no den engel a e yepi, ma a e yepi den pkin fu Abraham. 17 Dati meki na ala fasi a ben musu kon de leki den „brada” fu en. A ben kon de leki den fu kan tron wan granpriester di abi sar’ati èn di e du a wroko fu Gado ala ten. Na so a ben kan tyari wan ofrandi di e tapu den sondu fu a pipel èn di e meki den kon bun baka nanga Gado. 18 Fu di en srefi nyan pina di a ben e kisi tesi, meki a man yepi den sma di e kisi tesi.