A di fu tu brifi gi den Korentesma

13 Disi na a di fu dri leisi di mi wani kon na unu. „Tu noso dri kotoigi musu taki efu wan tori tru noso efu a no tru.” 2 Mi no de drape now, ma un musu si den sani di mi skrifi neleki mi kon na unu a di fu tu leisi. Ete wan leisi mi e warskow den sma di ben du sondu èn ala den tra sma, bika efu mi ben o kon na unu baka, mi no o abi sari-ati nanga den. 3 Na so mi o buweisi unu taki mi taki na ini a nen fu Krestes. Ma Krestes no swaki te a abi fu du nanga unu. A e wroko na wan krakti fasi na un mindri. 4 Iya, a tru taki den ben spikri en na wan postu di a ben swaki. Ma a krakti fu Gado meki taki a de na libi. A tru taki wi swaki tu, neleki fa en ben swaki, ma a krakti fu Gado o meki taki wi o libi makandra nanga en.

5 Tan ondrosuku efu unu de na bribi. Tan buweisi sortu sma unu de. Na sabi unu no sabi taki Yesus Krestes de wán nanga unu? Disi no ben o de so efu Gado no feni unu bun. 6 Mi e howpu trutru taki unu o sabi taki Gado feni wi bun.

7 Now wi e begi Gado taki unu no o du nowan ogri. Wi no e du disi fu di wi wani meki a gersi taki wi na sma di Gado feni bun. Ma wi e du disi fu di wi wani taki unu du san bun, awinsi a gersi leki wi na sma di Gado no feni bun. 8 Bika wi no kan du noti fu tapu san tru. Wi kan du soso den sani di e horibaka gi san tru. 9 Wi e prisiri trutru te unu tranga, awinsi wi swaki. Wi e begi taki unu sa kenki un denki. 10 Fu dati ede mi e skrifi den sani disi now di mi no de nanga unu. Bika te mi kon, mi no wani du sani di unu no lobi, fu di Masra no gi mi a wroko fu broko sma saka, ma fu gi sma deki-ati.

11 Brada, a lasti sani di mi wani taigi unu, na disi: tan de nanga prisiri, tan kenki un denki, tan meki sma trowstu unu, tan abi wán denki èn tan libi bun nanga makandra, dan a Gado fu lobi èn fu freide o de nanga unu. 12 Gi makandra odi nanga wan bosi. 13 Ala den santawan e seni taki unu odi.

14 Meki a de so, taki Masra Yesus Krestes sori unu bun-ati èn taki Gado sori unu lobi. Meki a de so tu taki a santa yeye kon na un alamala tapu.