Wan Openbaring gi Yohanes

13 Ne a* tan tnapu na a syoro fu a se.

Dan mi si wan ogri meti e opo kmoto na ini a se. A ben abi tin tutu nanga seibi ede. Na tapu den tutu a ben abi tin kroon,* ma na tapu den ede fu en a ben abi nen di ben e wiswasi Gado. 2 Na ogri meti di mi si, ben gersi wan penitigri, ma den futu fu en ben gersi den futu fu wan beer èn en mofo ben gersi a mofo fu wan lew. A bigi kaiman ben gi a meti krakti, wan kownusturu nanga bigi makti.

3 Ne mi si taki wan fu den ede fu a meti ben abi wan bigi koti. Bijna a dede, ma a soro kon betre èn heri grontapu ben ferwondru srefsrefi. Ne den go waka baka na ogri meti. 4 Den anbegi a bigi kaiman, bika na en ben gi na ogri meti makti. Den anbegi na ogri meti tu. Den taki: „Suma de leki na ogri meti èn suma man feti nanga en?” 5 Dan a bigi kaiman gi na ogri meti wan mofo di ben e taki bigitaki èn di ben e wiswasi Gado. A kisi a makti tu fu du san a wani 42 mun langa. 6 Ne a opo en mofo fu wiswasi Gado. A ben e wiswasi Gado nen nanga a tanpresi fu en èn den sma di e libi na ini hemel. 7 A kisi primisi fu feti nanga den santawan èn fu wini den. A kisi makti tu fu tiri ibri lo, pipel, tongo nanga kondre. 8 Ala den sma di e libi na grontapu o anbegi en. Sensi a ten di grontapu seti, nowan fu den sma disi nen skrifi na ini a buku fu libi. A buku disi na fu a Pkin Skapu di sma srakti.

9 Meki a sma di abi yesi, arki bun. 10 Efu wan sma musu go na straf’oso, dan a o go na straf’oso. Efu wan sma kiri trawan nanga fet’owru, dan den musu kiri en nanga fet’owru tu.* Dati meki den santawan musu hordoro èn den musu abi bribi.

11 Dan mi si wan tra ogri meti e opo kmoto na ini a gron. A ben abi tu tutu leki di fu wan pkin skapu, ma a ben bigin taki leki wan bigi kaiman. 12 Leti na fesi a fosi ogri meti, a tra meti ben e gebroiki ala a makti fu a fosi ogri meti. A ben e meki grontapu nanga den sma di e libi drape anbegi a fosi ogri meti di ben kon betre fu a bigi koti di ben meki a dede bijna. 13 Na ogri meti ben e du bigi sani èn a ben meki faya srefi fadon fu hemel kon na grontapu leti na fesi ala sma.

14 A kisi primisi fu du bigi sani leti na fesi a fosi ogri meti. Nanga den sani dati a kori den sma di e libi na grontapu. A taigi den tu taki den musu meki wan popki fu na ogri meti di ben kisi wan bigi koti nanga fet’owru, ma di ben kisi ensrefi baka. 15 A kisi primisi tu fu gi libi na a popki* di den meki fu na ogri meti. Na so a popki ben kan opo en mofo fu taki èn a ben kan meki sma kiri ala den sma di e weigri fu anbegi a popki fu na ogri meti.

16 A ben dwengi ala sma fu poti wan marki tapu den ret’anu noso tapu den fes’ede, awinsi na mofinasma noso heihei sma, gudusma noso pôtisma, friman noso srafu. 17 Nowan sma kan bai noso seri sani, boiti den sma di abi a marki. A marki na a nen fu na ogri meti noso a nomru fu en nen. 18 Koni de fanowdu gi a sani disi. A sma di abi koni o man ferstan san na a nomru fu na ogri meti, bika na a nomru fu wan libisma. A nomru fu en na 666.