A fosi brifi fu Petrus

3 Un uma, na so a musu de nanga unu tu. Saka unsrefi na ondro un masra. Bika efu sonwan fu den no wani du san Gado wortu e taki, dan a fasi fa unu e tyari unsrefi kan meki den teki a bribi sondro fu unu taigi den wan sani 2 fu di den si nanga den eigi ai taki unu e tyari unsrefi na wan krin fasi èn taki unu abi bigi lespeki gi den. 3 A no den sani di sma ai man si, soleki a brei di unu e brei un w’wiri èn den gowtu sani noso moi krosi di unu e weri e meki un moi. 4 Ma san e meki un moi na a sma di unu de dipi na ini un ati. Dati no e pori gwe. Dati meki un musu tyari unsrefi na wan tiri èn safri fasi. Na a sani disi prenspari gi Gado. 5 Na so den santa uma fu fosten di ben e howpu tapu Gado ben gwenti fu moi densrefi tu, aladi den ben e saka densrefi na ondro den masra 6 neleki Sara. A ben e arki Abraham èn a ben e kari en „mi masra”.* Efu unu tan du bun èn unu no e meki sani frede unu, dan unu tron pkin fu Sara.

7 Un masra, tan libi nanga un frow na wan fasi di e sori taki unu e ferstan en bun.* Gi en grani fu di umasma moro swaki èn den de leki prapi di kan broko makelek. Hori na prakseri tu taki a bun-ati Gado fu wi gi den a srefi libi leki unu. Te unu tyari unsrefi na a fasi disi, dan nowan sani o tapu den begi fu unu.

8 Wan lasti sani di mi wani taigi un alamala na disi: Un musu abi a srefi denki,* un musu firi gi trawan, un musu lobi makandra leki famiri, un musu sori sar’ati gi trawan èn un musu abi sakafasi. 9 No pai ogri nanga ogri èn no kosi sma te den e kosi unu. Na presi fu dati un musu taki na wan switi fasi, bika Gado kari unu fu blesi trawan. Na so a kan blesi unu tu.

10 Bika „a sma di lobi a libi èn di wani taki en libi waka bun, musu sorgu taki a no taki ogri nanga en mofo* èn a* no musu taki sani fu bedrigi trawan. 11 A no musu du ogri moro, ma a musu du san bun. A musu suku freide èn a musu du muiti fu feni en. 12 Bika den ai fu Yehovah* e si den sma di e du san reti èn den yesi fu en e yere den fayafaya begi fu den. Ma Yehovah* e drai baka gi den sma di e du ogri.”

13 Suma o du ogri nanga unu efu unu e meki muiti fu du bun ala ten? 14 Ma awinsi un musu pina fu di unu e du san bun, tòg unu o de koloku. No frede san tra sma e frede* èn no bruya tu. 15 Na ini un ati un musu sabi taki Krestes na Masra èn taki a de wan santa sma. Ala ten un musu de srekasreka fu opo taki gi unsrefi na fesi ala sma di e aksi unu sani di abi fu du nanga a howpu fu unu. Ma te unu o piki den, dan un musu du dati na wan safri fasi èn nanga bigi lespeki.

16 Sorgu taki unu abi wan bun konsensi ala ten. Na so den sma di e taki ogri fu unu o kisi syen fu di unu e tyari unsrefi na wan bun fasi leki bakaman fu Krestes. 17 Bika efu Gado gi pasi taki unu e pina fu di unu e du bun, dan dati moro bun leki fu pina fu di unu e du ogri. 18 Srefi Krestes di no ben du nowan sondu, dede gi sondusma. A dede wán leisi nomo fu puru sondu, so taki un kan kon bun baka nanga Gado. A ben de wan libisma di den kiri en, ma a kon na libi baka leki wan yeye. 19 Leki wan yeye a tyari wan krutuboskopu gi den yeye di de na straf’oso, 20 fu di den ben trangayesi Gado na ini a ten fu Noa. Ma Gado ben e wakti nanga pasensi* di Noa ben e bow na ark. Na ark ben tyari wan tu sma nomo abra a watra. Iya, na aiti sma* nomo tan na libi.

21 Now a dopu e ferlusu unu na wan srefi sortu fasi. A dopu no wani taki dati wan sma e wasi doti puru fu en skin. Ma a wani taki dati a begi Gado fu kisi wan bun konsensi. Unu dopu fu di unu ben bribi na ini Yesus Krestes di kisi wan opobaka. 22 A go na hemel èn now a de na Gado en ret’anusei. Gado meki den engel, den wan di abi makti, nanga den wan di abi krakti saka densrefi na en ondro.