A di fu tu brifi fu Yohanes

1 Disi na wan brifi gi na uma di Gado kari.* Leki owruman* mi e skrifi yu nanga den pkin fu yu di mi lobi trutru. Ma a no mi w’wan lobi unu. Ala den sma di kon sabi a tru leri lobi unu tu 2 fu di a tru leri de na ini wi ati èn a o de nanga wi fu têgo. 3 Meki Gado, a P’pa, nanga Yesus Krestes, a Manpkin fu a P’pa, sori wi bun-ati nanga sar’ati. Den o meki wi abi freide, den o leri wi san tru èn den o sori lobi gi wi.

4 Mi e prisiri srefsrefi fu di mi kon sabi taki wan tu pkin fu yu e tan hori densrefi na a tru leri, soleki fa a P’pa ben taigi wi. 5 Mi lobi sisa, mi no e aksi yu fu hori yusrefi na wan nyun wet, ma mi e aksi yu fu hori yusrefi na wan wet di wi ben kisi sensi a bigin. A wet disi e taki dati wi musu lobi makandra. 6 Efu wi abi lobi, dan wi o tan waka soleki fa den wet fu a P’pa e taki. Disi na a wet di unu yere sensi a bigin: Ala ten un musu sori lobi. 7 Un musu luku bun, bika furu bedrigiman de na grontapu. Den e taki dati den no e bribi taki Yesus Krestes kon leki wan libisma. Den na bedrigiman èn feanti fu Krestes.*

8 Luku bun taki unu no lasi den bun sani di wi yepi unu fu kisi, ma tan du muiti fu kisi ala den blesi di Gado pramisi unu. 9 A sma di e leri trawan tra sani leki san Krestes ben e leri sma èn di no e hori ensrefi na den leri fu Krestes, no de wán nanga Gado. A sma di e hori ensrefi na den leri disi, de wán nanga a P’pa èn a Manpkin. 10 Efu wan sma e kon na unu èn a no e kon nanga den leri disi, dan un no musu teki en na ini un oso. Un no musu taki en odi tu, 11 bika a sma di e taki en odi e horbaka gi den ogri di a e du.

12 Mi musu taigi unu furu sani ete, ma mi no wani skrifi den na ini wan brifi. Mi howpu taki mi kan taki nanga unu te wi miti, so taki unu kan prisiri srefsrefi.

13 Den pkin fu yu sisa, a wan di Gado kari, e seni taki yu odi.