Tori fu den apostel
11 Den apostel nanga den brada di ben de na Yudea ben kon yere taki sma fu den tra kondre bigin bribi a wortu fu Gado tu. 2 Fu dati ede, di Petrus kon na Yerusalem, dan den sma di ben feni taki sma musu besnèi, bigin krutu* nanga en. 3 Den ben taki: „Fa yu kan go na ini na oso fu sma di no besnèi èn nyan nanga den?” 4 Ne Petrus ferteri den finfini san ben psa. A taigi den:
5 „Mi ben de na ini a foto Yope e begi di mi kisi wan fisyun. Mi si wan sani leki wan bigi duku e saka fu hemel kon na grontapu. A ben gersi leki wan sani ben e hori en na den fo uku. A saka kon leti na mi fesi. 6 Di mi luku na ini a duku, dan mi si meti di e waka tapu fo futu, ogri meti, meti di e kroipi* nanga fowru di e frei. 7 Mi yere wan sten taigi mi tu: ’Petrus, opo. Srakti wan meti, dan yu nyan!’ 8 Ma mi taki: ’Nôno Masra, kwetkweti. Noiti mi nyan wan sani di no krin èn di no santa.’ 9 A di fu tu leisi a sten fu hemel taigi mi: ’Efu Gado meki wan sani kon krin, dan yu no musu taki moro taki a sani dati no krin.’ 10 Baka di a sani disi psa a di fu dri leisi, ala sani opo go baka na hemel. 11 Na a srefi momenti dati, dri man kon na a oso pe wi ben e tan. Wan man ben seni den fu Sesareya kon na mi. 12 Ne a santa yeye taigi mi fu go nanga den èn fu no tweifri kwetkweti. Den siksi brada disi go nanga mi tu èn wi go na ini na oso fu a man.
13 A ferteri wi taki a si wan engel na ini en oso èn na engel taigi en: ’Seni wan tu man go na Yope fu kari Simon di sma sabi tu leki Petrus. 14 A o ferteri yu fa yu nanga ala den sma na ini yu oso kan kisi ferlusu.’ 15 Ma di mi bigin taki, dan a santa yeye kon na den tapu neleki fa a ben kon na wi tapu na ini a bigin. 16 Ne mi memre san Masra ben gwenti taki: ’Yohanes ben e dopu sma nanga watra, ma unu o dopu nanga santa yeye.’ 17 Fu dati ede, efu Gado gi den a srefi kado di a gi wi di e bribi na ini Masra Yesus Krestes, dan suma na mi taki mi kan tapu Gado fu du dati?”*
18 Di den yere den sani disi, den no krutu nanga Petrus moro.* Den gi Gado glori èn den taki: „We, dan Gado gi den sma di no de Dyu na okasi tu fu abi berow, so taki den kan kisi libi.”
19 Baka di Stefanus dede, sma bigin du ogri nanga den disipel. Dati meki den lowe go na ala sei. Den go te na Fenisia, Siprus nanga Antiokia, ma den ben e preiki soso gi den Dyu. 20 Ma na ini Antiokia yu ben abi wan tu disipel fu Siprus nanga Sireine di bigin preiki gi den sma di ben e taki Grikitongo èn den ferteri den a bun nyunsu fu Masra Yesus. 21 Yehovah* ben e horbaka gi den tu. Furu sma ben teki a bribi èn den tron bakaman fu Masra.
22 A gemeente na ini Yerusalem kon yere fu a tori disi èn den seni Barnabas go te na Antiokia. 23 Di a doro drape èn a si fa Gado sori sma bun-ati, dan a prisiri. Ne a bigin gi den alamala dek’ati fu tan dini Masra nanga den heri ati. 24 Barnabas ben de wan bun man di ben abi a santa yeye na en tapu èn a ben abi wan tranga bribi tu. Fu dati ede bun furu sma tron bakaman fu Masra. 25 Baka dati, a go na Tarsus fu go suku Saulus na ala sei. 26 Di a feni en, a tyari en go na Antiokia. Wan heri yari langa den ben e kon makandra nanga den sma na ini a gemeente drape èn den gi furu sma leri. A fosi leisi di Gado meki sma kari den disipel Kresten, ben de na Antiokia.
27 Na a ten dati, wan tu profeiti ben kmoto fu Yerusalem kon na Antiokia. 28 A yeye ben meki wan fu den profeiti di ben nen Agabus, taigi den sma taki wan bigi angriten ben o kon na heri grontapu. A sani disi psa trutru na a ten di Klaudiyus ben de tiriman. 29 Fu dati ede den disipel besroiti taki ibriwan fu den ben o seni san den man, fu yepi den brada di ben e tan na Yudea. 30 Na dati den du tu èn den meki Barnabas nanga Saulus tyari den sani disi go na den owruman.