Yeremia
2 Dan Yehovah taigi mi: 2 „Go na Yerusalem èn taki nanga wan tranga sten: ’Disi na san Yehovah taki:
„Mi e memre heri bun fa yu ben tai hori* na mi di yu ben yongu
èn fa yu ben sori lobi gi mi di yu ben abi mofo fu trow nanga mi.
Mi e memre heri bun fa yu ben e waka na mi baka na ini a sabana,
na ini wan kondre pe nowan siri ben sai.
3 Israel ben santa gi Yehovah. A ben de a fosi n’nyan fu En gron.”’
’Iniwan sma di ben nyan en ben kisi problema
èn ogri ben miti en’, na so Yehovah taki.”
4 Un sma fu Yakob nanga ala den famiri fu Israel,
yere san Yehovah abi fu taki.
5 Disi na san Yehovah taki:
„Sortu ogri den p’pa fu unu feni taki mi du
di den gwe so fara fu mi?
Den ben e waka baka gado di no warti noti èn now den srefi no warti noti.
6 Den no aksi: ’Pe Yehovah de?
Pe a sma de di tyari wi kmoto fu Egepte
èn di tyari wi psa na ini a sabana?
Pe a sma de di tyari wi psa na ini wan drei presi di abi dipi olo?
Pe a sma de di tyari wi psa na ini wan dungru presi pe watra no de,
pe nowan sma e waka
èn pe nowan sma e tan?’
7 Dan mi tyari unu go na wan kondre di ben lai froktudyari,
so taki unu ben kan nyan den sani di de drape èn abi wan bun libi.
Ma di unu kon na ini mi kondre, unu pori en.
Unu meki a tron wan doti sani.
8 Den priester no aksi: ’Pe Yehovah de?’
Den sma di ben musu leri trawan a Wet, no ben sabi mi.
Den skapuman opo densrefi teige mi
èn den profeiti ben e taki profeititori na ini a nen fu Bâal.
Den ben waka baka gado di no tyari nowan wini gi den.
9 ’Fu dati ede mi o tan krutu unu’, na so Yehovah taki,
’èn mi o krutu den pkin fu den pkin fu unu.’
10 ’Ma abra go na a sesyoro* fu den Kitimsma, dan unu srefi o si.
Iya, seni sma go na Keidar èn denki bun fu a tori disi.
Luku efu so wan sani ben psa kba.
11 Oiti un yere taki wan pipel kenki den gado fu den gi tra sani di no de gado?
Tòg mi eigi pipel du dati. Na presi fu gi mi glori, den gi glori na sani di no warti noti.
12 Un hemel, unu o skreki te unu e si san e psa.
Unu o kisi groskin èn unu o beifi’, na so Yehovah taki.
13 ’Bika mi pipel du tu bigi ogri:
Den gwe libi mi, a sma di abi a watra di e gi libi
èn den go diki* watrabaki gi densrefi.
Ma den watrabaki broko èn den no man hori watra.’
14 ’Israel a no wan srafu èn a no de a pkin fu wan srafu di gebore na ini na oso fu en basi.
Dan fa a du kon taki sma puru ala sani na en anu èn den pina en?
Sma o skreki fu si san den du nanga a kondre fu en.
Den bron den foto fu en, so taki nowan sma man tan na ini den.
16 Den sma fu Nof* nanga Takpanes puru ala w’wiri na yu ede.
Fu san ede yu wani waka a pasi di e go na Asiria
fu go dringi a watra fu Gran Liba?*
19 Yu sabi san psa di yu ben du ogri, ma yu no leri fu dati.
Yu sabi san psa di yu drai baka gi mi, ma yu no si dati leki wan pir’ai.
Yu musu sabi èn yu musu ferstan taki yu du wan bigi ogri èn yu o firi en
fu di yu gwe libi Yehovah yu Gado.
Yu sori taki yu no frede mi’, na so a Moro Hei Masra Yehovah di e tiri den legre taki.
20 ’Langa ten psa kba mi ben broko a tyatyari fu yu na pispisi.
Mi ben koti den keti fu yu.
Ma yu ben taki: „Mi no o dini yu.”
Bika yu d’don nanga opo futu e huru
na tapu ibri bergi èn na ondro ibri bigi bon di abi furu w’wiri.
21 Mi ben prani yu leki wan bun droifibon di e gi redi droifi. Ala den siri fu en ben bun.
We dan fa a du kon taki yu kenki kon tron wan pransun di no bun èn di de fu wan tra droifibon?’
22 ’Awinsi yu wasi nanga soda* èn nanga furu sopo,
tòg mi o si den sondu fu yu leki flaka di no man wasi gwe’, na so a Moro Hei Masra Yehovah taki.
23 Fa yu kan taki: ’Mi no doti misrefi.
Mi no waka baka den Bâal-gado’?
Luku san yu e du na ini a lagipresi.
Prakseri san yu du.
Yu de leki wan umakameili di man lon es’esi.
A e lon go-kon sondro fu sabi pe a e go.
24 Yu de leki wan uma-sabanaburiki.
Na ini a sabana a e bro hebi te a krasi.
Suma man tapu en fu du san a wani na a ten dati?
Den manwan no abi fu du furu muiti fu feni en.
Den o feni en direk te a krasi.*
25 No waka teleki yu futu kon weri
èn no meki yu neki kon drei, soso fu di yu e lon baka sani di no abi nowan waarde.
Ma tòg yu taki: Libi mi!
Mi lobi tra gado now
èn na den baka mi o waka.’
26 Neleki fa wan fufurman e syen te sma kisi en,
na so den Israelsma kisi syen tu.
Den alamala, den kownu, den granman,
den priester nanga den profeiti fu den kisi syen.
27 Den e taigi wan bon: ’Yu na mi p’pa’
èn den e taigi wan ston: ’Yu na mi m’ma.’
Na presi fu luku mi, den drai den baka gi mi.
Ma te rampu o miti den, den o taki:
’Opo kon ferlusu wi!’
28 Ma pe den gado di yu meki de?
Yuda, meki den kon puru yu na ini a nowtu fu yu, efu den man.
Bika den gado fu yu kon furu leki den foto fu yu.
29 ’Fu san ede unu e tan krutu nanga mi?
Fu san ede un alamala e tan opo unsrefi teige mi?’, na so Yehovah taki.
30 Na fu soso mi strafu den manpkin fu unu.
Tòg den no leri noti.
Den fet’owru fu unu kiri den profeiti fu unu
neleki te wan lew e kiri meti.
31 Un pipel, prakseri san Yehovah taki.
Na tron mi tron wan sabana
noso wan kondre fu bigi dungru gi Israel?
Fu san ede den sma disi di de mi pipel, taki: ’Wi wani go pe wi wani.
Wi no o kon na yu moro’?
Tòg mi eigi pipel fergiti mi langa ten kba.
33 Ai uma, yu sabi fa yu musu feni lobi!
Yu na basi fu du ogri.
34 Srefi den krosi fu yu flaka nanga a brudu fu pôtisma di no du nowan ogri.
Mi feni a brudu fu den na tapu ala yu krosi,
ma a no fufuru den go fufuru meki den dede.
35 Ma yu taki: ’Mi no du nowan ogri.
En ati no kan bron nanga mi moro.’
Ma tòg mi o krutu yu
fu di yu taki: ’Mi no du nowan sondu.’
36 Fu san ede yu e si en leki wan pkin sani taki yu e kenki prakseri ala yuru?
Egepte o gi yu syen tu
neleki fa Asiria ben gi yu syen.
37 Dati meki yu o waka nanga yu anu na tapu yu ede,
bika Yehovah drai baka gi den sma di yu ben e fertrow.
Den no o tyari wini gi yu.”