Yeremia

24 Kownu Nebukadnesar* fu Babilon ben tyari Kownu Yekonya,* a manpkin fu Yoyakim di ben e tiri Yuda, go na Babilon. A ben tyari den granman fu Yuda nanga den wrokoman tu di ben abi a koni fu meki sani nanga udu, ston, isri nanga kopro. Bakaten Yehovah sori mi tu baskita nanga figa di ben de na fesi a tempel fu Yehovah. 2 A wan baskita ben abi figa di bun srefsrefi, neleki den fosi figa fu wan figabon. Ma a tra baskita ben abi pori figa. Den no ben bun fu nyan srefsrefi.

3 Ne Yehovah aksi mi: „San yu e si, Yeremia?” Mi piki: „Mi e si figa, figa di bun srefsrefi nanga pori figa di no bun fu nyan.”

4 Dan Yehovah taigi mi: 5 „Disi na san Yehovah, a Gado fu Israel, taki: ’Den sma fu Yuda di mi seni gwe èn di den tyari go na a kondre fu den Kaldeyasma de leki den bun figa. Dati meki mi o sorgu gi den. 6 Mi o luku den èn mi o du bun gi den. Mi o meki den drai kon baka na a kondre disi. Mi no o broko den, ma mi o bow den. Mi no o rutu den puru, ma mi o prani den. 7 Mi o gi den wan ati di sabi mi, so taki den o sabi taki mi na Yehovah. Dan den o tron mi pipel èn mi o tron den Gado, bika den o drai kon baka na mi nanga den heri ati.

8 Yehovah taki fu den pori figa di no bun fu nyan: „Kownu Sedekia fu Yuda, den granman fu en, den sma fu Yerusalem di tan abra na ini a kondre disi nanga den sma di e tan na Egepte, de leki den pori figa disi. 9 Ala den kownukondre fu grontapu o skreki te den si sortu ogri mi o du nanga den. Sma o kosi den, sma o koti odo gi den, sma o spotu den èn sma o fluku den na ala den presi pe mi o yagi den go. 10 Mi o meki fet’owru, angri nanga takru siki* kiri den alamala teleki nowan fu den de moro na ini a kondre di mi gi den nanga den afo fu den.”’”