Yeremia
12 Yehovah, awinsi mi e krutu nanga yu fu wan tori,
noso awinsi mi e taki nanga yu fu a fasi fa yu e koti krutu, ala ten yu e du san reti.
Ma fu san ede sani e waka bun gi den ogrisma?
Fu san ede den bedrigiman no abi brok’ede?
2 Yu prani den èn den teki rutu.
Den gro èn den meki froktu.
Den e taki furu fu yu, ma den ati* de farawe fu yu.
3 Yehovah, yu sabi mi heri bun èn yu e si mi.
Yu ondrosuku mi ati èn yu sabi taki mi e dini yu nanga mi heri ati.
Poti den na wan sei leki skapu di sma o tyari go srakti.
Poti den na wan sei teleki a dei doro fu kiri den.
4 O langa a kondre o drei gwe ete?
O langa den bon na ini den gron o drei?
Nowan meti noso fowru de moro,
fu di den sma fu a kondre ogri srefsrefi.
Den taki: „A no man si san o psa nanga wi.”
5 Dan Gado taigi mi: „Efu yu e weri te yu strei lon nanga libisma,
dan fa yu o man strei lon nanga asi?
Na ini a kondre pe sani e waka bun, yu no e frede.
Ma fa yu o du te yu de na mindri den bigi grangran na sei Yordan-liba?
6 Srefi yu eigi brada, iya, den sma na ini yu p’pa oso
bedrigi yu.
Den bari sani gi yu.
No fertrow den,
awinsi den e taigi yu bun sani.
7 „Mi gwe libi mi oso. Mi gwe libi mi gudu.
Mi libi mi lobi pipel gi den feanti fu en.
8 Mi e si mi gudu leki wan lew na busi.
A opo en sten gi mi.
Dati meki mi no wani si en na ai kwetkweti.
Ala un busmeti, un kon makandra.
Un kon nyan.
10 Furu skapuman pori mi droifidyari.
Den traptrapu ala sani na ini mi gron.
Den meki mi moi gron tron wan sabana pe nowan sma e tan.
11 A tron wan brokopresi.
A drei gwe.*
Mi e si en leki wan brokopresi.
A heri kondre kon leigi,
ma nowan sma e poti prakseri na dati.
12 Na ala den pasi pe furu sma e waka na ini a sabana, sma kon fu pori a kondre.
A fet’owru fu Yehovah e kiri sma fu a wan sei fu a kondre te na a tra sei.
Nowan sma e libi na ini freide.
13 Den sai aleisi, ma den koti soso maka.
Den wroko teleki den kon weri, ma den no feni nowan wini fu dati.
Yehovah ati e bron nanga den trutru èn a no meki n’nyan gro na den gron fu den.
Dati meki den e syen.”
14 Yehovah taki: „Ala den ogri pipel lontu mi di e du ogri nanga a kondre di mi gi mi pipel Israel, mi o rutu puru na den kondre. Boiti dati, mi o rutu den sma fu Yuda puru na den mindri. 15 Ma te mi rutu den puru mi o sari den baka èn mi o tyari den kon baka. Iya, mi o tyari ibriwan fu den kon baka na den eigi kondre èn na den eigi gron.”
16 „Fosi, den pipel dati ben leri mi pipel fu meki sweri na ini a nen fu Bâal. Ma efu den leri fu waka a pasi fu mi pipel èn efu den e meki sweri na ini mi nen, dan den o de leki mi pipel tu. Iya, efu den e taki: ’Mi e sweri na a libilibi Gado Yehovah!’, dan sani o go bun nanga den na mindri mi pipel. 17 Ma efu den pipel dati no wani du san mi taki, dan mi o rutu den puru èn mi o figi den puru”, na so Yehovah taki.