Yeremia

40 Na a ten di den ben o tyari den sma fu Yerusalem nanga Yuda go na Babilon, Yeremia ben tai nanga keti èn a ben de na den mindri. Ne Nebusaradan, na edeman fu den waktiman, lusu en èn a seni en gwe fu Rama. Na a ten dati Yehovah taki nanga Yeremia. 2 Na edeman fu den waktiman teki Yeremia èn a taigi en: „Yehovah yu Gado ben taki dati rampu ben o kon na a presi disi. 3 Yehovah meki disi psa trutru soleki fa a ben taki, fu di unu sondu teige Yehovah èn unu no arki en. Dati meki den sani disi psa nanga unu. 4 Ma tide mi puru den keti na yu anu. Efu yu wani kon nanga mi na Babilon, dan yu kan kon èn mi o sorgu taki sani waka bun gi yu. Ma efu yu no wani kon nanga mi na Babilon, dan yu no abi fu du dati. Luku, a heri kondre de na yu fesi. Yu kan go pe yu wani.”

5 Ma Yeremia ben e draidrai fu go nanga en. Dati meki Nebusaradan taki: „Drai go baka na Gedalia di de a manpkin fu Ahikam èn a granpkin fu Safan. A kownu fu Babilon poti en fu tiri den foto fu Yuda. Yu kan go tan nanga en èn nanga den kondreman fu yu, noso yu kan go na wan tra presi di yu wani.”

Dan na edeman fu den waktiman gi en n’nyan nanga wan kado, dan a meki a gwe. 6 Ne Yeremia go na Mispa fu tan nanga Gedalia, a manpkin fu Ahikam, èn nanga den kondreman fu en di ben de na ini a kondre ete.

7 Bakaten den legre-edeman nanga den srudati di ben de na tra presi ini a kondre, yere taki a kownu fu Babilon poti Gedalia, a manpkin fu Ahikam, fu tiri den man, den uma nanga den pkin na ini a kondre. Na en ben tron a tiriman fu den pôtisma di den no ben tyari go na Babilon. 8 Ne den legre-edeman go miti Gedalia na Mispa. Disi na den man di go: Ismael, a manpkin fu Netanya, Yohanan nanga Yonatan di ben de manpkin fu Kareya, Seraya, a manpkin fu Tankumet, den manpkin fu Efai fu a foto Netofa, èn Yesanya, a manpkin fu wan man fu a foto Makat. Ala den man disi go nanga den srudati fu den. 9 Dan Gedalia di de a manpkin fu Ahikam èn a granpkin fu Safan, sweri gi den man èn a taki: „Unu no abi fu frede den Kaldeyasma. Efu unu tan na ini a kondre èn unu dini a kownu fu Babilon, dan sani o waka bun nanga unu. 10 Mi o tan na Mispa leki un fesiman fu taki nanga den Kaldeyasma te den kon na wi. Ma un musu teki win, froktu nanga oli èn poti den na ini den bari fu unu. Dan unu kan go tan na den foto di unu teki abra.”

11 Ala den Dyu di ben de na Moab, na Amon, na Edom èn na den tra kondre, ben yere tu taki a kownu fu Babilon ben libi wan tu sma na Yuda èn taki a poti Gedalia di de a manpkin fu Ahikam èn a granpkin fu Safan, leki tiriman fu den. 12 Dati meki den Dyu kmoto na ala den presi pe den ben de èn den go na Gedalia na Mispa na ini Yuda. Den ben tyari bun furu win nanga froktu kon na wán.

13 Yohanan, a manpkin fu Kareya, nanga ala den legre-edeman di ben de na den tra presi na ini a kondre, ben kon na Gedalia tu na Mispa. 14 Ne den taigi en: „Yu no sabi taki Kownu Balis fu den Amonsma seni Ismael, a manpkin fu Netanya, fu kiri yu?” Ma Gedalia, a manpkin fu Ahikam, no ben e bribi den.

15 Dan Yohanan, a manpkin fu Kareya, taigi Gedalia na Mispa na wan presi pe sma no ben kan si den: „Efu mi go kiri Ismael, a manpkin fu Netanya now, dan nowan sma o sabi. Dan a no o man kiri yu. Nowan fu den sma fu Yuda di e kon na yu o abi fu lowe èn den sma fu Yuda di de na libi ete, no o dede.” 16 Ma Gedalia, a manpkin fu Ahikam, taigi Yohanan, a manpkin fu Kareya: „No du a sani disi. Na lei yu e lei gi Ismael.”