Markus skrifi en
3 Yesus go baka na ini wan snoga èn wan man ben de drape di ben abi wan malengri anu.* 2 Dati meki den Fariseiman ben e luru Yesus fu si efu a ben o dresi a man na Sabat-dei, so taki den ben kan feni wan sani na en tapu. 3 A taigi a man di ben abi wan malengri anu:* „Opo go tnapu na mindrisei.” 4 Dan a aksi den: „A fiti fu du wan bun noso wan ogri na Sabat-dei? Of a fiti fu yepi wan sma noso fu kiri wan sma na Sabat-dei?” Ma den no taki noti. 5 Nanga atibron Yesus luku ala den sma di ben de na en lontu, ma a ben e sari srefsrefi tu fu di a si taki den no ben abi firi gi sma. Ne a taigi a man: „Langa yu anu.” A man langa en anu èn en anu kon betre. 6 Ne den Fariseiman go na dorosei èn direk den go taki nanga den partèiman fu Herodes fu luku fa den ben kan kiri Yesus.
7 Ma Yesus nanga den disipel fu en gwe fu drape èn den go na a se. Furu sma fu Galilea nanga Yudea ben e waka na en baka. 8 Furu sma ben kon na en fu di den ben yere ala den sani di a du. Yu ben abi sma srefi fu Yerusalem, Idumeya, sma fu abrasei fu Yordan-liba nanga sma fu a birti fu Tirus nanga Sidon. 9 A taigi den disipel fu en fu sorgu taki wan pkin boto ben de srekasreka gi en, so taki a bigi grupu sma di ben de drape no ben o pusu kon na en tapu. 10 Ala den sma di ben abi hebi siki ben e pusu kon na en tapu fu fasi en, fu di a ben e meki furu sma kon betre. 11 Srefi den ogri yeye ben e fadon na en fesi te den ben si en èn den ben e bari: „Yu na a Manpkin fu Gado.” 12 Ma furu leisi a ben e taigi den ogri yeye krin taki den no ben musu meki sma kon sabi suma na en.
13 Baka dati, a kren go na tapu wan bergi èn a kari wan tu fu den disipel fu en fu kon nanga en, dan den go na en. 14 Drape a teki 12 man èn a kari den apostel. Den ben o teki waka nanga en èn a ben o seni den fu go preiki. 15 Den ben o kisi a makti tu fu puru ogri yeye na sma tapu.
16 Den 12 man disi ben de Simon, di a ben gi a nen Petrus tu, 17 nanga Yakobus di de a manpkin fu Sebedeyus, nanga Yohanes, a brada fu Yakobus. (A ben kari den brada disi Bowanerges tu, san wani taki „Manpkin fu Dondru”.) 18 Boiti dati yu ben abi Andreas, Filipus, Bartolomeyus, Mateyus, Tomas, Yakobus di de a manpkin fu Alfeyus, Tadeyus, nanga Simon a Kananeya* man, 19 èn Yudas Iskariot di ben seri Yesus bakaten.
20 Baka dati Yesus go na ini wan oso èn wan bigi grupu sma kon drape tu. Dati meki en nanga den disipel fu en no ben man nyan wan sani srefi. 21 Ma di den famiriman fu en yere ala den sani di ben e psa, den go fu grabu en, bika den ben taki: „A lasi en ferstan.” 22 Den leriman fu a Wet di ben kmoto na Yerusalem ben taki tu: „A e wroko nanga Beyelsebub* èn a e puru ogri yeye na sma tapu nanga yepi fu a basi fu den ogri yeye.” 23 Ma baka di a kari den leriman fu a Wet kon na en, a gi den wan tu eksempre. A taki: „Fa Satan kan puru Satan na sma tapu? 24 Efu wan kownukondre prati, dan a kownukondre dati no o man tan. 25 Efu wan osofamiri prati, dan na osofamiri dati no o man tan. 26 Na so a de tu, taki efu Satan opo go feti nanga ensrefi èn den sma fu en prati, dan a no o man tan, ma a o kon na wan kba. 27 Nowan sma di e go na ini na oso fu wan tranga man, man fufuru den gudu fu a man, efu a no tai en fosi. Soso te a du dati, a o man fufuru ala sani na ini na oso fu a man. 28 Unu kan bribi mi: Libisma o kisi pardon gi ala sondu, awinsi sortu sondu den e du èn awinsi sortu kosi den e kosi. 29 Ma a sma di e taki ogri fu a santa yeye no o kisi pardon noiti, bika a sondu fu en e tan na en tapu fu têgo.” 30 Yesus ben taki disi, fu di den sma ben taki: „A abi wan ogri yeye na en tapu.”
31 Baka dati, en m’ma nanga den brada fu en kon èn den tnapu na dorosei. Ne den seni wan sma go na insei fu kari en. 32 Furu sma ben e sdon na en lontu. Wan fu den sma taigi en: „Yu m’ma nanga den brada fu yu de na dorosei e suku yu.” 33 Ma a piki den: „Suma na mi m’ma nanga den brada fu mi?” 34 Baka di a luku den sma di ben sdon na en lontu, a taki: „Luku mi m’ma nanga den brada fu mi dya! 35 Den sma di e du a wani fu Gado, na den na mi brada, mi sisa nanga mi m’ma.”