Mateyus skrifi en

12 Na a ten dati, Yesus ben waka psa na ini den aleisigron na a Sabat-dei. Di angri ben kiri den disipel fu en, den bigin broko wan tu taki aleisi fu nyan. 2 Di den Fariseiman si dati, den taigi en: „Luku san den disipel fu yu e du! Den e du wan sani di den no mag du na a Sabat-dei.” 3 A taigi den: „Unu no leisi san David du di angri ben kiri en nanga den man fu en? 4 A go na ini na oso fu Gado èn en nanga den man fu en nyan den brede di ben poti na fesi Gado leki wan ofrandi, aladi den no ben mag du dati. Na den priester w’wan ben mag du dati. 5 Unu no leisi na ini a Wet taki den priester ben e wroko na ini a tempel na a Sabat-dei, ma tòg dati no ben de wan sondu? 6 Mi e taigi unu taki wan sma de dyaso di bigi moro a tempel. 7 Unu no e ferstan den wortu disi: ’Mi no wani meti leki ofrandi, ma mi wani taki unu sori sar’ati.’ Efu unu ben ferstan dati, dan unu no ben o krutu den sma di no du nowan ogri. 8 Bika a Manpkin fu libisma na Masra fu a Sabat.”

9 Baka di a gwe fu drape, a go na ini a snoga fu den. 10 Drape wan man ben de di ben abi wan malengri anu.* Dati meki den aksi Yesus: „A fiti fu dresi sma na a Sabat-dei?” Den ben aksi en disi fu feni wan sani na en tapu. 11 A taigi den: „Efu unu abi wán skapu nomo èn a skapu fadon na ini wan peti na a Sabat-dei, dan suma fu unu no o hari a skapu puru na ini a peti? 12 We, wan libisma warti moro wan skapu! Dati meki a no fowtu efu wan sma du wan bun na a Sabat-dei.” 13 Ne a taigi a man: „Langa yu anu.” A man langa en anu èn na anu ben kon betre neleki a trawan. 14 Baka dati den Fariseiman go na dorosei fu taki nanga makandra fa den ben kan feni wan fasi fu kiri en. 15 Di Yesus kon sabi disi, a gwe fu drape. Furu sma ben e waka na en baka èn a dresi ala den sma di ben siki. 16 Ma a sori den krin taki den no ben musu meki sma kon sabi suma na en, 17 so taki den sani di a profeiti Yesaya taki ben kan kon tru. A profeiti ben taki:

18 „Luku, disi na mi futuboi di mi teki fu du a wani fu mi! Mi lobi en èn mi feni en bun! Mi o poti mi yeye na en tapu èn a o sori den pipel san na retidu. 19 A no o hartaki nanga nowan sma, a no o bari èn nowan sma o yere en sten na den bigi strati. 20 A no o masi wan warimbo* di broko èn a no o kiri wan faya di e suku fu dede, teleki a poti ala sani kon reti baka. 21 Iya, na tapu en* den pipel o howpu.”

22 Baka dati den tyari wan man kon na en di ben abi wan ogri yeye na en tapu. A man disi ben breni èn babaw. Yesus dresi a man, so taki a ben kan taki èn si baka. 23 Ala den sma di ben de drape ferwondru èn den taki: „A man disi a no a Manpkin fu David?” 24 Di den Fariseiman yere disi, den taki: „Na Beyelsebub,* a basi fu den ogri yeye, e meki taki a man disi man puru ogri yeye na sma tapu.” 25 Fu di Yesus ben sabi san den ben e denki, meki a taigi den: „Ibri kownukondre di prati o fadon èn nowan foto noso osofamiri di prati o tan. 26 Dus efu Satan e yagi den ogri yeye fu en, dan na feti a e feti nanga ensrefi. We dan fa a kownukondre fu en o man tan tnapu? 27 Boiti dati, efu na Beyelsebub e yepi mi fu puru ogri yeye na sma tapu, dan suma e yepi den bakaman fu unu fu puru ogri yeye na sma tapu? Dati meki den bakaman fu unu o krutu unu. 28 Ma efu mi e yagi ogri yeye puru na sma tapu nanga Gado en yeye, dan a Kownukondre fu Gado kon sondro taki unu sabi. 29 Fa wan sma kan broko go na ini na oso fu wan tranga man èn fufuru den gudu fu en, efu a no tai a man fosi? Soso te a tai a man, a kan fufuru ala sani na ini na oso. 30 A sma di no de na mi sei, de teige mi. A sma di no e wroko makandra nanga mi fu tyari sma kon na wán, e tyari prati kon.

31 Dati meki mi e taigi unu, sma o kisi pardon fu ibri sondu di den du èn fu ibri ogri di den taki.* Ma te den e taki ogri fu a santa yeye, den no o kisi pardon fu disi. 32 Fu eksempre, efu wan sma e taki ogri fu a Manpkin fu libisma, a o kisi pardon fu disi. Ma efu wan sma e taki ogri fu a santa yeye, a no o kisi pardon fu disi. Nôno, a no o kisi pardon na ini a grontapu disi èn a no o kisi pardon tu na ini a grontapu di e kon.

33 Efu unu de leki wan bun bon, dan den froktu fu unu o bun tu. Ma efu unu de leki wan siki bon, dan den froktu fu unu no o bun. Na den froktu fu wan bon e sori sortu bon a de. 34 Un snekipkin, fa unu kan taki bun sani, te unu ogri? Bika san furu na ati, na dati mofo e taki. 35 Wan bun sma e taki bun sani, fu di en ati bun. Ma wan ogri sma e taki ogri sani, fu di en ati ogri. 36 Mi e taigi unu taki efu sma e taki dondon sani, dan den o abi fu gi frantwortu fu dati na a Krutudei. 37 Bika na den sani di yu e taki, o meki taki Gado si yu leki wan ret’ati sma èn na den sani di yu e taki o meki taki a krutu yu.”

38 Ne sonwan fu den Fariseiman nanga den leriman fu a Wet piki en: „Leriman, du wan wondru fu sori wi taki na Gado seni yu kon.” 39 Yesus piki den: „Na den ogrisma di drai baka gi Gado wani si wan wondru, ma a wan-enkri wondru di mi o sori unu, na a wan fu a profeiti Yona. 40 Bika neleki fa Yona tan dri dei nanga dri neti na ini a bere fu a bigi fisi, na so a Manpkin fu libisma o tan dri dei nanga dri neti na ini grebi. 41 Den sma fu Ninefei o opo baka na a Krutudei makandra nanga den sma fu a ten disi èn den o krutu den sma fu a ten disi. Bika di den yere san Yona preiki, den ben abi berow. Ma wan sma di bigi moro Yona de dyaso. 42 Na umakownu fu zuidsei o opo baka na ini a ten fu a krutu makandra nanga den sma fu a ten disi. A o krutu den, bika a kmoto te na den moro farawe presi fu grontapu fu yere a koni fu Salomo. Ma wan sma di bigi moro Salomo de dya.

43 Te wan ogri yeye kmoto na wan sma tapu, dan a e waka lontu na ini den sabana fu suku wan presi fu rostu, ma a no e feni nowan presi. 44 Dan a e taki: ’Mi o drai go baka na a oso pe mi ben e tan.’ Te a doro drape, dan a e si taki nowan sma de na ini na oso, ma na oso sibi krin èn a kon moi. 45 Dan na ogri yeye e gwe èn a e tyari ete seibi yeye kon di ogri moro en. Baka te den go na insei, den e tan drape. Dan a fasi fa a sma e kon de now, moro ogri leki fa a ben de fosi. Na so a o de tu nanga den ogrisma fu a ten disi.”

46 Di Yesus ben e taki ete nanga den sma, en m’ma nanga den brada fu en ben tnapu na dorosei èn den ben e suku wan okasi fu taki nanga en. 47 Dati meki wan sma taigi en: „Yu m’ma nanga den brada fu yu e tnapu na dorosei èn den e suku wan okasi fu taki nanga yu.” 48 Yesus piki a sma: „Suma na mi m’ma èn suma na den brada fu mi?” 49 Ne a langa en anu sori go na den disipel fu en èn a taki: „Luku mi m’ma nanga den brada fu mi dya! 50 Den sma di e du a wani fu mi P’pa di de na hemel, na den na mi brada, mi sisa nanga mi m’ma.”