Mateyus skrifi en

8 Baka di a saka kmoto fu a bergi, bun furu sma ben e waka na en baka. 2 Ne wan gwasiman kon na en, a boigi gi en èn a taki: „Masra, mi sabi taki efu yu wani, yu kan meki mi kon krin.” 3 Dati meki Yesus langa en anu fasi a man èn a taki: „Mi wani. Kon krin.” Direk a gwasi kmopo na a man en skin èn a kon krin. 4 Baka dati Yesus taigi en: „Sorgu taki yu no ferteri nowan sma. Ma go meki a priester luku yu, dan yu musu tyari wan ofrandi soleki fa a Wet fu Moses e taki. Dati musu de wan bewijs gi den.”

5 Di Yesus go na Kaperna-um, wan legre-ofsiri kon na en èn a begi en: 6 „Masra, mi futuboi e d’don na oso, a lan èn a e pina hebi.” 7 Yesus taigi en: „Te mi kon drape, mi o meki a kon betre.” 8 A legre-ofsiri piki en: „Masra, mi no warti fu yu kon na ini mi oso. Ma efu yu taki wán sani nomo, dan mi futuboi o kon betre. 9 Misrefi na wan sma di musu saka ensrefi na ondro trawan èn mi abi srudati tu di musu saka densrefi na mi ondro. Efu mi taigi a wan: ’Go!’, dan a e go. Efu mi taigi a trawan: ’Kon!’, dan a e kon. Efu mi taigi mi srafu: ’Du so!’, dan a e du en.” 10 Di Yesus yere disi, a ferwondru èn a taigi den sma di ben e waka na en baka: „Unu kan bribi mi: Mi no feni nowan sma na ini Israel di abi so wan tranga bribi. 11 Mi e taigi unu taki furu sma o kon fu owstusei èn fu west-sei èn den o sdon na tafra nanga Abraham, Isak, nanga Yakob na ini a Kownukondre fu hemel. 12 Ma Gado o trowe den sma di ben o kisi a Kownukondre go na dorosei na ini a dungru. Drape den o krei èn den o kaw tifi.”* 13 Baka dati Yesus taigi a legre-ofsiri: „Go. Fu di yu sori bribi, meki sani o psa soleki fa yu aksi.” Na a srefi momenti dati a futuboi kon betre.

14 Di Yesus kon na Petrus oso, a si taki a m’ma fu a frow fu Petrus ben e d’don na bedi nanga hebi korsu. 15 Dati meki Yesus fasi na anu fu na uma èn a korsu saka. Dan na uma opo èn a go sreka n’nyan gi Yesus. 16 Di neti fadon, den tyari furu sma di ben abi ogri yeye na den tapu kon na Yesus. Wán sani nomo a ben e taki, dan den yeye ben gwe libi den sma. A ben meki ala sikisma kon betre. 17 Na a fasi disi den sani di a profeiti Yesaya ben taki kon tru. A ben taki: „Ensrefi teki den pina fu wi na en tapu èn a tyari den siki fu wi.”

18 Di Yesus si someni sma na en lontu, a besroiti fu go na abrasei nanga den disipel fu en. 19 Ne wan leriman fu a Wet kon na en èn a taigi en: „Leriman, mi o waka na yu baka awinsi pe yu e go.” 20 Ma Yesus taigi en: „Krabdagu abi olo pe den e tan èn den fowru di e frei na loktu abi nesi, ma a Manpkin fu libisma no abi nowan presi fu sribi.” 21 Baka dati wan tra disipel taigi en: „Masra, gi mi na okasi fosi fu go beri mi p’pa.” 22 Yesus taigi en: „Tan waka na mi baka èn meki den dedewan beri den dedewan fu den.”

23 Di a go na ini wan boto, den disipel fu en kon na en baka. 24 Bakaten wan tranga winti bigin wai tapu a se. A ben wai so tranga taki den skwala ben e naki kon na ini a boto. Ma Yesus ben e sribi. 25 Ne den go wiki en èn den taki: „Masra, yepi wi, wi o dede!” 26 Ma a taigi den: „Fu san ede unu e frede so? Na so unu bribi swaki?” Dan a opo, a bari a winti nanga a se èn ala sani kon rustig. 27 Dati meki den disipel ferwondru èn den taki: „Suma na a man disi? Srefi a winti nanga a se e du san a e taki.”

28 Di a doro abrasei na ini a kontren fu den Gadarasma, dan tu man di ben abi ogri yeye na den tapu, kmoto na mindri den grebi* èn den waka kon miti en. Den ben e rigeri so kfalek, taki nowan sma ben abi a dek’ati fu waka na a pasi dati. 29 Ne den bari: „Fu san ede yu kon muilek wi, Manpkin fu Gado? Yu kon dya fu pina wi fosi wi ten doro?” 30 Bun fara fu den, wan lo agu ben e waka e suku n’nyan. 31 Ne den ogri yeye begi en: „Efu yu yagi wi gwe, dan seni wi go na ini den agu.” 32 Dati meki a taigi den: „Un go!” Ne den ogri yeye kmoto na den man tapu èn den go na ini den agu. Dan ala den agu bigin lon. Di den doro na a lanki fu a bergi, den fadon go na ini a se èn den dede na watra. 33 Ma den sma di ben e sorgu den agu, lon gwe. Di den go na ini a foto, den ferteri trawan ala den sani di psa. Den ferteri a tori tu fu den man di ben abi ogri yeye na den tapu. 34 Ne a heri foto waka kon miti Yesus. Di den si en, den begi en fu gwe fu a kontren fu den.