Mateyus skrifi en

10 Yesus kari den 12 disipel fu en kon èn a gi den makti fu yagi ogri yeye puru na sma tapu èn fu dresi ibri sortu siki nanga ibri sortu mankeri.

2 Disi na den nen fu den 12 apostel: A foswan na Simon di sma ben sabi tu leki Petrus. Dan yu ben abi en brada Andreas, nanga den tu brada Yakobus nanga Yohanes di ben de manpkin fu Sebedeyus. 3 Yu ben abi Filipus, Bartolomeyus, Tomas, Mateyus di ben e teki belasting gi lanti, Yakobus di ben de a manpkin fu Alfeyus, Tadeyus, 4 Simon a Kananeya* man nanga Yudas Iskariot di ben seri Yesus bakaten.

5 Yesus seni den 12 man disi go preiki èn a taigi den: „No go na a kontren fu den trakondre sma èn no go na nowan foto na ini Samaria. 6 Ma un musu go soso na den lasi skapu fu Israel. 7 Te unu e go preiki, un musu taki: ’A Kownukondre fu hemel de krosbei.’ 8 Meki sikisma kon betre, gi dedesma wan opobaka, meki gwasiman kon krin, yagi ogri yeye puru na sma tapu. Unu kisi sondro fu pai, sobun un musu gi sma sondro fu meki den pai. 9 No go suku gowtu, solfru, noso kopro fu poti na ini un monisaka.* 10 No go suku wan n’nyan-saka fu te unu de na pasi èn no suku tu krosi,* wan susu, noso wan tiki, bika a fiti taki wan wrokoman kisi san a abi fanowdu.*

11 Awinsi na ini sortu foto noso dorpu unu e go, suku suma warti fu yere a boskopu èn tan nanga en teleki yu gwe fu drape. 12 Te unu e go na ini wan oso, taki den sma odi. 13 Efu den e teki unu na ini oso, dan un musu blesi den. Ma efu den no e teki unu na ini oso, dan na unu o kisi a blesi. 14 Efu wan presi de pe sma no kari unu kon na insei noso den no arki san unu taki, dan un musu kmoto na ini na oso noso a foto dati èn un musu naki a doti puru na un futu. 15 Mi e taigi unu: Tapu a Krutudei a o moro hebi gi a foto dati, leki gi Sodom nanga Gomora.

16 Luku, mi e seni unu go leki skapu na mindri busdagu. Fu dati ede un musu de na ai neleki sneki, ma tòg un musu de leki doifi di no e du ogri. 17 Luku bun nanga sma, bika den o tyari unu go na krutu èn den o wipi unu na ini den snoga fu den. 18 Fu mi ede den o tyari unu go na fesi granman nanga kownu, so taki unu kan preiki gi den èn gi den trakondre sma. 19 Te den e tyari unu go drape, un no musu broko un ede san unu o taki noso fa unu o taki en. Na a ten dati unu o sabi san un musu taki, 20 bika a no unu srefi o taki, ma na a santa yeye fu un P’pa o meki unu sabi san unu musu taki. 21 Boiti dati, wan brada o meki sma kiri en eigi brada èn wan p’pa o du a srefi nanga en pkin. Pkin o opo densrefi teige den p’pa nanga m’ma èn den o meki sma kiri den. 22 Sma o teige unu fu di unu na mi bakaman. Ma a sma di hordoro* te na a kba o kisi ferlusu. 23 Te den e du ogri nanga unu na ini a wan foto, dan lowe go na wan tra foto. Bika mi e taigi unu, unu no o kba preiki na ala den foto fu Israel, fosi a Manpkin fu libisma doro.

24 Wan sma di e kisi leri no bigi moro en leriman èn wan srafu no bigi moro en masra. 25 A sma di e kisi leri musu breiti efu a man de leki en leriman èn wan srafu musu breiti efu a man de leki en masra. Efu sma e taki dati a masra fu na oso na Beyelsebub,* dan yu kan de seiker taki den o taki a srefi sani fu en osofamiri tu! 26 Ma unu no musu frede den. Bika ibri sani di kibri o kon na doro èn ibri kibritori o kon na krin. 27 Den sani di mi e ferteri unu w’wan, na dati un musu ferteri ala sma. San mi taigi unu na ini un yesi, na dati un musu preiki na tapu den dak fu den oso. 28 No frede den sma di man kiri yu, ma di no man tapu yu fu kisi libi baka. Na presi fu dati yu musu frede a sma di man kiri yu na ini Gehena.* 29 Sma e seri tu pkin fowru gi wan sensi di no abi furu waarde,* a no so? Ma tòg nowan fu den fowru disi o fadon na gron sondro fu un P’pa sabi. 30 Un P’pa teri srefi ala den w’wiri tapu un ede. 31 Dati meki unu no musu frede, bika unu warti moro leki furu pkin fowru.

32 Efu wan sma e taigi trawan taki a sabi mi, dan mi o taigi mi P’pa na hemel tu taki mi sabi a sma dati. 33 Ma efu wan sma e taigi trawan taki a no sabi mi, dan mi o taigi mi P’pa na hemel tu taki mi no sabi a sma dati. 34 No denki taki mi kon fu tyari freide kon na grontapu. Mi no kon fu tyari freide, ma mi kon fu tyari wan fet’owru. 35 Bika mi kon fu tyari trobi na mindri wan man nanga en p’pa, na mindri wan umapkin nanga en m’ma èn na mindri wan yongu uma nanga a m’ma fu en masra. 36 Den feanti fu wan sma o de fu en eigi osofamiri. 37 A sma di lobi en p’pa noso en m’ma moro mi, no warti fu de mi disipel. A sma di lobi en manpkin noso en umapkin moro mi, no warti fu de mi disipel. 38 A sma di no wani teki en pinapostu* èn di no wani waka na mi baka, no warti fu de mi disipel. 39 Bika a sma di wani kibri en libi, o lasi en. Ma a sma di lasi en libi fu mi ede, o feni en baka.

40 A sma di opo en doro gi unu, opo en gi mi tu èn a sma di opo en doro gi mi, opo en tu gi a sma di seni mi kon. 41 A sma di opo en doro gi wan profeiti fu di a de wan profeiti, o kisi a pai fu wan profeiti. A sma di opo en doro gi wan ret’ati sma fu di a de wan ret’ati sma, o kisi a pai fu wan ret’ati sma. 42 Mi e taigi unu, efu wan sma e gi wan fu den pkinwan disi wan kan kowru watra nomo fu dringi fu di en na wan disipel, dan un kan de seiker taki a o kisi en pai.”