Markus skrifi en

12 Baka dati a bigin gi den agersitori. A taigi den: „Wan man ben prani droifi na ini wan gron, a meki wan skotu lontu a gron, a diki wan olo fu meki wan baki fu masi droifi na ini èn a bow wan toren. Dan a yuru a gron gi gronman èn a go na wan tra kondre. 2 Di a ten doro fu koti droifi, a seni wan srafu fu go teki wan tu froktu fu a droifidyari na den gronman. 3 Ma den gronman grabu a srafu, den fon en, dan den seni en gwe nanga leigi anu. 4 Ne a man seni wan tra srafu go na den gronman. Den naki a wan dati tapu en ede èn den du sani nanga en fu gi en syen. 5 Dan a man seni ete wan srafu go, ma den kiri a wan dati. A man seni furu tra srafu go, ma den fon sonwan fu den èn trawan den kiri. 6 A man ben abi ete wan sma. Dati ben de en manpkin di a ben lobi so te. A seni en go na den leki lastiwan fu di a prakseri: ’Den o lespeki a boi fu mi.’ 7 Ma den gronman taigi makandra: ’Disi na a wan di o kisi a droifidyari fu en p’pa. Kow kiri en, dan a droifidyari o de fu wi.’ 8 Dati meki den grabu en èn den kiri en, dan den trowe en go na dorosei fu a droifidyari. 9 San a sma di abi a droifidyari o du? A o kon kiri den gronman, dan a o yuru a droifidyari gi tra sma. 10 Noiti unu no leisi san Gado Buku taki? Drape skrifi: ’A ston di den bowman no ben wani, na dati tron a moro prenspari ukuston.* 11 Na Yehovah* meki taki disi psa èn gi wi a moi srefsrefi fu si.’”

12 Di den yere disi den suku wan fasi fu grabu en, fu di den ben sabi taki na fu den a ben taki di a ben ferteri na agersitori, ma den ben frede den sma. Dati meki den libi en, dan den gwe.

13 Baka dati, den seni wan tu Fariseiman nanga den partèiman fu Herodes go na Yesus fu kisi en fu taki wan sani di no bun. 14 Di den doro drape den taigi en: „Leriman, wi sabi taki yu e taki san tru èn taki yu e leri sma a pasi fu Gado. Yu no e span nanga fa sma e denki fu yu èn gi yu ala sma na a srefi. Taigi wi, a fiti fu pai Grankownu* belasting noso a no fiti fu du dati? 15 Wi musu pai en of wi no musu pai en?” Fu di a ben sabi taki den ben e hoigri, meki a taigi den: „Fu san ede unu e tesi mi? Tyari wan solfru moni* kon meki mi luku en.” 16 Ne den tyari a moni kon. Dan a taigi den: „Suma fesi èn suma nen de na en tapu?” Den taigi en: „A di fu Grankownu.” 17 Ne Yesus taigi den: „Pai Grankownu san na fu Grankownu, ma pai Gado san na fu Gado.” Den sma ben ferwondru srefsrefi fu a fasi fa a ben taki.

18 Baka dati, den Saduseiman kon na en. Den man disi e taki dati dedesma no o kon na libi baka. Den aksi en: 19 „Leriman, Moses skrifi gi wi taki efu wan man en brada dede èn a e libi wan frow na baka sondro fu kisi wan pkin, dan en brada musu trow nanga a frow èn a musu meki pkin gi en brada di dede. 20 Seibi brada ben de. A foswan trow, ma a dede fosi a ben man kisi wan pkin nanga en frow. 21 Dan a di fu tu brada trow nanga a frow, ma a brada dati srefi dede sondro fu kisi pkin. Na so a psa tu nanga a di fu dri brada. 22 Nowan fu den seibi brada ben kisi pkin. Te fu kba, a frow dede tu. 23 Sortwan fu den brada o tron a masra fu a frow na a ten fu na opobaka? Bika a frow ben trow nanga ala den seibi brada.” 24 Yesus taigi den: „A no san unu e denki. Unu no sabi Gado Buku èn unu no sabi a krakti fu Gado. 25 Bika man nanga uma no o trow na a ten fu na opobaka, ma den o de leki den engel na hemel. 26 Ma unu no leisi na ini a buku fu Moses pe a tori fu a makabusi skrifi, taki den dedesma o kon na libi baka? Drape Gado ben taigi en: ’Mi na a Gado fu Abraham, a Gado fu Isak èn a Gado fu Yakob.’ 27 En a no a Gado fu den dedesma, ma a Gado fu den wan di de na libi. A denki fu unu no bun srefsrefi.”

28 Wan fu den leriman fu a Wet di ben kon drape èn di ben yere fa den ben e hartaki nanga makandra, ben sabi taki Yesus piki den na wan bun fasi. Dati meki a aksi en: „Sortwan fu den wet na a moro prenspariwan?” 29 Yesus piki: „A foswan na: ’Arki, un Israelsma, Yehovah* wi Gado na wán Yehovah.* 30 Un musu lobi Yehovah* un Gado nanga un heri ati, nanga un heri libi,* nanga un heri ferstan èn nanga ala un krakti.’ 31 A di fu tu wet na: ’Un musu lobi tra sma leki fa un lobi unsrefi.’ Wan moro bigi wet leki den wan disi no de.” 32 A leriman fu a Wet taigi en: „Leriman, san yu taki tru: ’Gado na wán èn nowan tra gado no de boiti En.’ 33 Wi musu lobi en nanga wi heri ati, nanga wi heri ferstan èn nanga ala wi krakti, èn wi musu lobi tra sma leki fa wi lobi wisrefi. Den sani disi warti moro ala bron-ofrandi nanga srakti-ofrandi.” 34 Di Yesus si taki a man ben piki na wan koni fasi, a taigi en: „Yu no de fara fu a Kownukondre fu Gado.” Nowan sma ben abi a dek’ati moro fu aksi en wan sani.

35 Di Yesus ben e gi leri na ini a tempel, a aksi den: „Fa a kan taki den leriman fu a Wet e taki dati Krestes na a manpkin fu David? 36 A santa yeye ben meki David srefi taki: ’Yehovah* taigi mi Masra: „Sdon na mi ret’anusei teleki mi poti yu feanti na ondro yu futu.”’ 37 Efu David srefi e kari a sma disi ’Masra’, dan fa a kan de David manpkin?”

Ala den sma ben e arki Yesus nanga prisiri. 38 Di a ben e gi den leri a taki tu: „Luku bun nanga den leriman fu a Wet di lobi waka nanga langa krosi èn di lobi te sma na w’woyo e gi den odi. 39 Den lobi sdon na fes’sei na ini den snoga èn den wani sdon na den moro prenspari presi na den fesa. 40 Den e fufuru den sani* fu den uma di masra dede èn den e begi langa begi soso fu sma kan si den. Den sma disi o kisi wan moro hebi krutu.”

41 Dan a go sdon pe a ben kan si den monikisi èn a ben luku fa den sma ben e poti moni na ini den monikisi. Wan lo gudu sma ben e poti furu moni. 42 Ma wan pôti uma di masra ben dede, kon drape èn a poti tu sensi* di no ben abi furu waarde. 43 Dati meki Yesus kari den disipel kon èn a taigi den: „Mi e taigi unu: A pôti uma disi poti moro moni leki ala den tra sma di poti moni na ini den monikisi. 44 Bika den alamala poti san ben tan abra fu a moni fu den. Ma na uma disi pôti èn tòg a poti ala san a ben abi fu sorgu ensrefi.”