Gi den Romesma

5 Fu dati ede, now di Gado e si wi leki ret’ati sma fu di wi abi bribi, wi musu tan meki muiti fu abi freide nanga Gado nanga yepi fu wi Masra Yesus Krestes. 2 Fu di wi e bribi na ini en, meki now wi kan kon krosbei na Gado èn a kan sori wi bun-ati. Meki wi prisiri,* bika wi abi a howpu fu kisi a glori fu Gado. 3 Ma a no dati w’wan. Wi musu prisiri* tu te tesi e miti wi, bika wi sabi taki tesi e leri wi fu hordoro. 4 Te wi e hordoro, dan Gado o feni wi bun. Te Gado feni wi bun, dan wi o abi howpu. 5 A howpu dati no o meki wi kisi syen, bika Gado poti a lobi fu en na ini wi ati fu di a gi wi en santa yeye.

6 Di a ten doro Krestes dede gi wi, fu di wi na sondusma di no man yepi densrefi. 7 A no makelek fu feni wan sma di ben o dede gi wan ret’ati sma. Ma a kan taki wan sma ben o abi a dek’ati fu dede gi wan bun sma. 8 Tòg Gado sori wi taki a lobi wi fu di a meki Krestes dede gi wi, aladi wi ben de sondari ete. 9 Fu di a brudu fu Krestes e meki taki Gado si wi leki ret’ati sma, meki wi kan de moro seiker taki na en o yepi wi fu kisi ferlusu fu a bigi atibron fu Gado. 10 Bika efu a dede fu a Manpkin fu Gado meki taki wi kon bun baka nanga Gado, aladi wi ben de en feanti, dan wi kan de seiker taki now di wi kon bun baka nanga Gado, a libi fu en Manpkin o meki taki wi kisi ferlusu. 11 Ma a no dati w’wan. Wi e prisiri tu fu di wi nanga Gado tron mati. Na wi Masra Yesus Krestes yepi wi fu kon bun baka nanga Gado.

12 Sobun, wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu. 13 Bika sondu ben de kba na grontapu fosi a Wet kon. Ma efu wet no de, dan sma no man kisi strafu fu sondu. 14 Ma tòg dede tiri leki kownu sensi a ten fu Adam teleki a ten fu Moses. A tiri srefi den sma di no du a srefi sondu leki Adam di ben gersi a sma di ben musu kon ete.

15 A kado di Gado gi sma, no de a srefi leki a sondu di wi kisi. Furu sma dede fu di wán man sondu. Ma a bun-ati fu Gado nanga a kado di a gi libisma fu di a meki Yesus Krestes dede gi wi, bigi moro a sondu di wi kisi fu wán man. Nanga a kado disi Gado o meki wi kisi bun furu blesi! 16 Boiti dati, a kado di Gado gi sma, no de a srefi leki den bakapisi fu a sondu fu wán man. Bika wán sondu tyari strafu kon gi ala sma. Ma baka di furu sma sondu, Gado gi den wan kado. Disi meki taki a e si furu sma leki ret’ati sma. 17 Efu a sondu fu wán man meki taki dede tiri wi leki kownu, dan wi kan de moro seiker taki wán man, Yesus Krestes, o meki sma kisi libi fu tiri leki kownu. Disi de so fu di a bun-ati fu Gado nanga a kado di a gi wi fu man de ret’ati sma, moro bigi èn a moro bun!

18 We dan, neleki fa wán sondu nomo meki taki ala sortu sma kisi strafu, na so wán reti sani di wán sma du meki taki Gado e si ala sortu sma leki ret’ati sma, so taki den kan kisi libi. 19 Neleki fa furu sma tron sondari fu di a wán man dati trangayesi Gado, na so furu sma o tron ret’ati sma fu di wán sma gi yesi na Gado. 20 Now a Wet kon fu sori sma o furu sondu den e du. Ma efu sma e du furu sondu, dan Gado e sori moro bun-ati. 21 Fu san ede? We, neleki fa sondu nanga dede tiri leki kownu, na so a bun-ati fu Gado o tiri leki kownu tu, so taki sma kan tron ret’ati sma. Na so sma kan kisi têgo libi nanga yepi fu wi Masra Yesus Krestes.