A di fu tu brifi gi den Korentesma

4 Wi abi a wroko disi fu di Gado sori sar’ati gi wi. Dati meki wi no e gi abra. 2 Wi tapu nanga den syen sani di wi ben e du kibrikibri èn wi no e bedrigi sma. Wi no e drai Gado wortu, ma wi e sori sma san a e taki trutru. Na so wi tron bun eksempre gi ala sma* èn Gado srefi e si dati. 3 Efu a de so taki a bun nyunsu di wi e preiki tapu nanga wan duku, dan a tapu gi den sma di o dede. 4 Iya, a gado fu a grontapu* disi breni a ferstan fu den sma di no e bribi. Dati meki den no man si a leti fu a bun nyunsu di wi e preiki èn di moi srefsrefi. A bun nyunsu disi e taki fu Krestes di de leki Gado. 5 Te wi e preiki, wi no e taki fu wisrefi, ma wi e preiki taki Yesus Krestes na Masra èn taki wi na srafu fu unu fu Yesus ede. 6 Bika na a srefi Gado di taki: „Meki a leti skèin kmoto na ini a dungru”, na en skèin a leti fu en na tapu wi ati nanga yepi fu Krestes.* A leti disi e meki wi kon sabi Gado.

7 Ma wi abi a gudu disi na ini prapi di meki fu klei, so taki a de krin fu si taki wi no e du a wroko disi nanga wi eigi krakti, ma nanga a krakti fu Gado di bigi moro ala sani. 8 Den tesi di wi e kisi e kon fu ala sei, ma tòg dati no man tapu wi fu go doro. Wi e bruya, ma a no de so taki wi no man feni nowan lusu.* 9 Sma e suku fu du ogri nanga wi, ma a no de so taki Gado gwe libi wi. Den naki wi trowe, ma wi de ete.* 10 Ala ten sma e du ogri nanga wi neleki fa den ben e du ogri nanga Yesus fu di den ben wani kiri en. Disi e sori krin taki wi e libi leki Yesus. 11 Wi de na libi, ma ala ten sma wani kiri wi fu di wi na bakaman fu Yesus. Na so a de krin fu si na a skin fu wi taki wi e libi leki Yesus. 12 Ala ten dede de na wi fesi, ma unu o kisi libi.

13 Gado Buku taki: „Mi abi bribi, dati meki mi taki.” We, wi abi a srefi bribi dati. Dati meki wi e taki, 14 fu di wi sabi taki a Sma di gi Yesus libi baka, o meki wi kon na libi baka tu neleki Yesus. Dan a o tyari wi go poti na en fesi. 15 Ala den sani disi psa fu unu ede, so taki Gado kan sori moro sma bun-ati. Dan moro nanga moro sma o taki Gado tangi èn disi o gi en glori.

16 Fu dati ede wi no e gi abra. Srefi efu a skin fu wi e kon swaki moro nanga moro, tòg a sma di wi de fu insei e kisi nyun krakti dei fu dei. 17 A tesi di wi e kisi de fu wan syatu pisi ten nomo èn a no hebi, ma a e meki taki wi e kisi bun bigi blesi di e tan fu têgo. 18 Wi no e poti prakseri na den sani di wi e si, ma wi e poti prakseri na den sani di wi no e si. Bika den sani di wi e si na fu wan pisi ten nomo, ma den sani di wi no e si na fu têgo.