Gi den Efeisesma

4 Dati meki mi di de na strafu fu Masra ede, e begi unu fu tyari unsrefi na wan fasi di fiti den sma di Gado kari. 2 Ala ten un musu abi sakafasi nanga safr’ati. Un musu abi pasensi èn un musu ferdrage makandra fu di unu lobi makandra. 3 Un musu libi bun nanga makandra èn un musu du ala muiti fu tan abi a wánfasi di a santa yeye meki unu kon abi. 4 Wán skin de èn wán yeye de, neleki fa unu ben kisi wán howpu di Gado kari unu. 5 Wán Masra, wán bribi nanga wán dopu de. 6 Wán Gado de. En na a P’pa fu ala sma, a hei moro ala sma, a e wroko nanga wi alamala èn a krakti fu en e wroko na ala sortu fasi.

7 Gado ben sori ibriwan fu wi bun-ati. Disi de fu si na a fasi fa Krestes prati a kado gi wi. 8 Gado Buku taki: „Di a opo go na loktu, a tyari sma gwe leki strafman. A gi a gemeente mansma leki kado.” 9 We, san den wortu „a opo go na loktu” wani taki? Disi wani taki dati a ben saka kon na grontapu tu. 10 A sma di saka kon na grontapu, na a srefi sma di opo go moro hei leki hemel srefi, so taki a kan meki ala sani kon tru.

11 Son sma a poti leki apostel, tra sma leki profeiti, trawan leki preikiman fu a bun nyunsu èn sonwan leki skapuman nanga leriman. 12 A du disi fu poti den santawan na tapu a reti pasi baka,* so taki den kan du a wroko di musu du na ini a gemeente èn so taki a skin fu Krestes kan kon tranga, 13 teleki wi alamala kon de wán na ini a bribi èn teleki wi sabi a Manpkin fu Gado bun. Na so wi o kon tron bigisma na ini a bribi, ja, wi o kon de leki Krestes na ini ala san wi e du. 14 Sobun, wi no musu de leki pkin moro. Wi no musu de leki wan boto di skwala nanga winti e naki go na ala sei. Wi no musu meki sma bruya wi nanga ala sortu leri. Wi no musu meki sma kori wi tu nanga den lei di den e sdon prakseri noso nanga den triki fu den. 15 Na presi fu dati wi musu taki san tru. Fu di wi abi lobi meki wi musu gro na ala fasi, aladi wi e saka wisrefi na ondro Krestes di de na ede. 16 Na en meki taki ala den pisi fu a skin e fiti bun na makandra. Den e wroko makandra na ini wánfasi fu di ibri skrufu fu a skin e du san de fanowdu. Te ibri pisi fu a skin e du san a musu du, dan a skin e gro kon tranga fu di den lobi makandra.

17 Sobun, mi e taigi unu na fesi Masra fu no libi moro leki den grontapusma di e prakseri sani di no abi nowan waarde. 18 A ferstan fu den dungru èn den no abi a howpu fu kisi a libi di Gado o gi wi, fu di den no wani sabi noti fu Gado èn fu di na ati fu den kon tranga. 19 Fu di den no abi nowan dropu syen, meki den e du soso ogri sondro fu syen* èn den gridi fu du wan lo morsu sani.

20 Ma unu no kon sabi Krestes leki so wan sma, 21 bika a ben leri unu san tru. Efu unu ben arki en èn unu ben teki leri fu en, dan a musu de so taki unu sabi den sani disi heri bun. 22 Unu ben leri taki un musu kenki a fasi fa unu ben de fosi, neleki fa sma e kenki krosi di doti. Bika a fasi fa unu ben de fosi no ben bun, fu di unu ben e meki un firi kori unu. 23 Tan du muiti fu meki a denki fu unu kon nyun. 24 Un musu tron nyun sma soleki fa Gado wani. Disi wani taki dati un musu tron ret’ati sma di e du ala ten san Gado e taki.

25 Now di unu no e kori makandra moro, ibriwan fu unu musu taki san tru nanga trawan, bika wi na pisi fu a srefi skin èn wi de fu makandra. 26 Efu un ati e bron, sorgu taki unu no sondu. No meki a son saka, aladi unu e mandi ete. 27 No gi Didibri nowan okasi. 28 A sma di e fufuru, no musu fufuru moro, ma a musu wroko tranga. Meki a du bun wroko nanga en anu, so taki a kan prati wan sani nanga sma di de na nowtu. 29 No meki nowan pori sani kmoto na ini un mofo, ma te a de fanowdu taki soso bun sani di e gi sma dek’ati. Na so den sma di e arki kan yere sani di bun gi den. 30 Boiti dati, no meki Gado en santa yeye sari. A santa yeye disi de na un tapu leki wan stampu teleki a dei doro taki a lusu-paiman ferlusu unu.

31 Puru ala takru bita-ati nanga faya-ati nanga atibron nanga b’bari nanga koskosi na un mindri noso iniwan sani di e hati trawan. 32 Na presi fu dati un musu sori switifasi gi makandra èn abi sar’ati nanga makandra. Un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes.