Esekièl

21 Yehovah taki baka nanga mi. A taigi mi: 2 „Manpkin fu libisma, luku go na Yerusalem èn taki san o psa nanga den santa presi. Taigi a kondre Israel san o psa nanga en. 3 Yu musu taigi a kondre Israel: ’Disi na san Yehovah taki: „Mi o strafu yu. Mi o hari mi fet’owru puru na mi seibere èn mi o kiri den ret’ati sma nanga den ogrisma. 4 Na fu kiri den ret’ati sma nanga den ogrisma, meki mi o hari mi fet’owru puru na mi seibere. Mi o kiri ala libisma fu zuidsei te go miti noordsei. 5 Ala libisma o sabi taki na mi, Yehovah, puru mi fet’owru na mi seibere. Mi no o poti en baka na en presi.”’

6 Manpkin fu libisma, geme èn beifi. Meki sma si taki yu e sari srefsrefi èn taki yu e geme. 7 Te den aksi yu: ’Fu san ede yu e geme so?’, dan yu musu taigi den: ’Na fu wan boskopu di mi yere.’ Bika san yu yere o psa trutru. Ala sma o beifi, den o las’ati, den o firi brokosaka èn den o frede so te taki den o pisi na den skin. ’A rampu o kon seiker. A o psa nomonomo’, na so a Moro Hei Masra Yehovah taki.”

8 Yehovah taki baka nanga mi. A taigi mi: 9 „Manpkin fu libisma, taki wan profeititori. Yu musu taki: ’Disi na san Yehovah taki: „Wan fet’owru! Den srapu wan fet’owru èn den brenki en tu. 10 Den srapu en fu kiri furu sma. Den brenki en fu meki a koti faya.”’”

A pipel taki: „Wi o prisiri.”

Ma Gado taki: „Neleki fa a fet’owru koti tra bon trowe, na so a de seiker taki a o koti a kownutiki fu mi eigi manpkin trowe.”

11 Den tyari a fet’owru go brenki fu kan feti nanga en. Den srapu a fet’owru disi èn den brenki en fu gi en na wan kiriman.

12 Manpkin fu libisma, bari krei, bika nanga fet’owru sma o kon feti nanga mi pipel. Den o feti nanga ala den edeman fu Israel. Nanga fet’owru den o kiri den edeman disi makandra nanga mi pipel. Dati meki un musu naki na tapu un bowtu, fu di unu e sari. 13 Bika mi ondrosuku mi pipel. San o psa efu a fet’owru koti a kownutiki trowe? A kownutiki no o tan’, na so a Moro Hei Masra Yehovah taki.

14 Manpkin fu libisma, taki profeititori. Naki anu èn taki: ’Wan fet’owru!’ Yu musu taki dati dri leisi. A fet’owru disi o kiri sma. A o kiri furu sma èn a o tapu den lontu na ala sei. 15 Den o frede te fu dede èn furu sma o dede na den portu fu a foto fu den. Mi o kiri sma nanga a fet’owru. Iya, a e koti faya èn a srapu fu kiri sma! 16 Koti go na a ret’anusei! Kapu go na a kruktu-anusei! Go pe a fet’owru e sori yu fu go! 17 Misrefi o naki anu èn mi o puru atibron na den tapu. Na mi, Yehovah, taki so.”

18 Ne Yehovah taki baka nanga mi. A taigi mi: 19 „Manpkin fu libisma, sori a kownu fu Babilon san na den tu pasi di a kan teki fu psa kon nanga en fet’owru. Den tu pasi musu bigin na a srefi kondre. Na a presi pe den tu pasi e miti makandra yu musu poti wan marki* di e sori en pe den tu foto de. 20 Yu musu sori a fet’owru pe a musu psa fu go feti nanga a foto Raba fu den Amonsma èn nanga Yerusalem di de na ini Yuda èn di abi bigi skotu. 21 Bika a kownu fu Babilon tan tnapu na a uku pe a pasi e prati na tu. A tnapu na a bigin fu den tu pasi fu koti luku. A e seki den peiri. A e suku rai na den falsi gado* fu en. Nanga a lever fu wan meti a e koti luku. 22 A sani di a abi na ini en ret’anu fu koti luku e sori en taki a musu go na Yerusalem. A musu tyari fetsani fu broko a bigi skotu fu a foto. A musu taigi den srudati fu bigin kiri sma na ini a foto. A musu bro wan tutu fu go na feti. A musu seti fetsani na den portu fu broko den. A musu meki wan dan nanga wan skotu lontu a foto. 23 Ma den sma fu Yerusalem di ben sweri taki den ben o dini den,* no o bribi taki a kownu fu Babilon o du san a si di a ben koti luku. Ma a kownu o memre den ogri di den du èn dati meki a o tyari den gwe leki strafman.

24 Sobun, disi na san a Moro Hei Masra Yehovah taki: ’A fasi fa unu tyari unsrefi meki taki a kownu memre den ogri fu unu. A kon si den fowtu fu unu. A kon si taki unu sondu èn taki unu du sani di no bun. Fu dati ede a o grabu unu tyari gwe.’*

25 Ma a dei fu yu doro, yu ogri tiriman fu Israel di kisi hebi mankeri. A dei doro taki yu kisi strafu. 26 Disi na san a Moro Hei Masra Yehovah taki: ’Puru a tai-ede nanga a kroon fu yu. Sani o de tra fasi now. Meki den lagiwan kon hei èn meki den heiwan kon lagi. 27 Mi o broko en, mi o broko en, iya, mi o broko a makti* fu yu. Nowan sma o kisi en, teleki a sma kon di abi a reti fu kisi en. Dan mi o gi en a makti.’

28 Manpkin fu libisma, taki profeititori. Yu musu taki: ’Disi na san a Moro Hei Masra Yehovah taki fu den Amonsma èn fu a spotu di den e spotu. Wan fet’owru! Wan fet’owru hari fu kiri sma. Den brenki en fu kiri sma èn fu meki a koti faya. 29 Den lukuman fu unu si sani di no o kon tru. Den lei gi unu di den koti luku gi unu. Unu o dede leki den ogriman di kisi strafu. A dei doro taki den man disi kisi strafu fu den sondu fu den. 30 Poti a fet’owru baka na en presi. Na a presi pe yu ben meki, na ini a kondre pe yu kmoto, na drape mi o krutu yu. 31 Mi o strafu yu. Mi o puru atibron na yu tapu. Mi o meki den man di no abi sar’ati èn di sabi kiri sma kon feti nanga yu. 32 Yu o bron na ini a faya. Leti na ini a kondre disi yu brudu o fadon. Sma no o memre yu moro, bika na mi, Yehovah, taki so.’”