Odo
20 Wan sma di e dringi furu win e tron wan wiswasi man èn wan sma di e dringi furu sopi e meki dyugudyugu.
A sma di du wan don sani fu di a dringi sopi na wan donsma.
2 A frede di wan kownu e meki sma frede, de leki a b’bari fu wan lew.*
Iniwan sma di e meki a kownu ati bron kan lasi en libi.
3 Wan man e kisi glori te a no e hartaki nanga trawan,
ma ibri donsma o hartaki nanga trawan.
4 Na ini a kowru ten fu a yari a lesiman no o drai a doti fu en gron.
Dati meki na a ten fu a kotiwroko a o abi fu begi sma n’nyan, fu di a no abi noti.*
5 Den prakseri* na ini na ati fu wan man de leki watra na ini wan dipi peti,
ma wan sma di koni o hari den kon na loktu.
7 A ret’ati sma e tyari ensrefi na wan reti fasi.
Den pkin* di a o kisi o de koloku.
8 Te a kownu e sdon na tapu en kownusturu fu koti krutu,
a e ondrosuku sani finfini fu kan puru ala ogri na pasi.
9 Suma kan taki: „Mi krin mi ati.
Mi no abi sondu moro”?
10 Yehovah no lobi en srefsrefi te sma e marki sani nanga tu sortu wegiston èn nanga tu sortu baki.
11 Den sani di wan pkin* e du e sori suma a de trutru.
Den e sori efu a e du san bun èn efu a e du sani nanga wan krin ati.
12 Yesi di e yere nanga ai di e si na sani di Yehovah meki.
13 No lobi fu sribi langa, so taki yu no kon pôti.
Opo yu ai èn opo fu yu bedi, dan yu o nyan yu bere furu.
14 A sma di e bai sani e taki: „A sani no bun. A sani no bun!”
Ma te a e waka gwe, a e meki bigi fu san a du.
16 Efu wan man e tnapu borgu gi wan tra sma di a no sabi, dan yu musu teki a krosi fu en.
Efu a du dati gi wan uma di e huru,* dan yu musu teki wan sani fu en leki panti.
18 Rai fu trawan o yepi yu fu du san yu abi na prakseri
èn koni rai o yepi yu fu feti wan bun feti.
19 A sma di abi a gwenti fu waka e ferteri tori fu trawan, e puru sma bere kon na doro.
Yu no musu bemui nanga wan taktaki-mofo sma.*
20 Efu wan sma e fluku en p’pa nanga en m’ma,
dan sma o kiri a lampu fu en te dungru e fadon.
21 Awinsi wan sma di abi bigi-ai kon kisi furu gudu,
tòg a no o kisi blesi bakaten.
22 No taki: „Mi o pai ogri fu ogri!”
Wakti Yehovah, dan a o ferlusu yu.
23 Yehovah no lobi en srefsrefi te wan sma e wegi sani nanga tu sortu wegiston.
A no bun fu gebroiki wegi di no e wroko bun.
24 Na Yehovah e sori wan man pe a musu poti en futu.
Fa wan libisma kan sabi sortu pasi a musu teki?
25 Efu wan sma pramisi Gado wan sani sondro fu prakseri fosi efu a o man du en,
a o kon na ini problema.
26 Neleki fa sma e puru buba na aleisi,
na so wan koni kownu e puru den ogriwan na mindri den tra sma.
28 Sani e waka bun gi wan kownu te a e sori trawan bun-ati* èn te a e du san a pramisi.
Fu di a e sori trawan bun-ati, meki a o tan kownu.
29 A moi fu yongusma na a krakti fu den
èn a weti w’wiri fu owrusma e gi den grani.