Wan Openbaring gi Yohanes

16 Dan mi yere wan tranga sten na ini a santa presi di taigi den seibi engel: „Go kanti den seibi komki fu na atibron fu Gado na tapu grontapu.”

2 Ne a fosi engel go èn a kanti en komki tapu grontapu. Dan den sma di ben abi a marki fu na ogri meti èn di ben e anbegi a popki di den ben meki fu en bigin pina fu di den ben kisi takru butsweri.*

3 Dan a di fu tu engel kanti en komki go na ini a se. Ne a se tron brudu leki a brudu fu wan sma di den kiri. Ibri libisani* dede, iya, ala den sani na ini a se dede.

4 Dan a di fu dri engel kanti en komki go na ini den liba èn na ini den presi pe watra e kmopo.* Ne ala a watra tron brudu. 5 Baka dati mi yere na engel fu a watra taki: „Gado, yu na a sma di de now èn di ben de kba. Yu e tan horbaka gi yu pipel. Yu e du san reti. Dati meki yu besroiti taki den sani disi musu psa. 6 Yu krutu den sma di trowe a brudu fu den santawan nanga den profeiti èn yu gi den brudu fu dringi. Den kisi den pai!” 7 Ne mi yere wan sten na a altari taki: „Iya, Yehovah* Gado, Almaktiwan, sma kan fertrow den besroiti fu yu èn yu e krutu sani na wan reti fasi.”

8 Dan a di fu fo engel kanti en komki go tapu a son. A son ben kisi primisi fu bron den sma nanga faya. 9 A son ben faya so te, taki a bron den sma. Ma tòg den ben e wiswasi a nen fu Gado, a sma di abi a makti fu meki den rampu disi psa. Den no ben abi berow èn den no ben gi en glori.

10 Dan a di fu feifi engel kanti en komki go tapu a kownusturu fu na ogri meti. Ne a kownukondre fu na ogri meti kon dungru èn den sma bigin kaw den tongo, bika den ben abi skin-ati. 11 Ma tòg den ben e wiswasi a Gado fu hemel fu di den ben abi skin-ati èn fu di den ben abi butsweri. Den no ben abi berow fu den sani di den du.

12 Dan a di fu siksi engel kanti en komki go na ini a bigi Eufraat-liba èn a liba kon drei, so taki a pasi ben kan sreka gi den kownu di e kmopo na a sei pe a son e opo.*

13 Ne mi si a bigi kaiman, na ogri meti nanga a falsi profeiti. Ibriwan fu den ben abi wan doti boskopu.* Den boskopu disi di ben kmopo na ini den mofo ben gersi todo. 14 Den boskopu disi e kon fu ogri yeye èn den kownu na heri grontapu e yere den. Den boskopu disi e du wondru fu tyari ala den kownu kon na wán fu feti a feti na a bigi dei fu Gado na Almaktiwan.

15 „Luku bun! Mi o kon leki wan fufurman. A sma di tan na ai èn di abi en krosi na en skin ete o de koloku. Bika a no abi fu waka sososkin fu sma si a syen fu en.”

16 Dan den tyari den kownu kon na wán na a presi di sma e kari Armagedon* na ini Hebrewtongo.

17 Now a di fu seibi engel kanti en komki tapu a loktu. Dan wan tranga sten kmopo fu a santa presi pe a kownusturu de. A taki: „A kba!” 18 Baka dati bliksem bigin koti na hemel, sten ben de fu yere, dondru bigin bari èn wan bigi gronseki ben de. Sensi di libisma de na grontapu, noiti ete so wan bigi gronseki ben de, iya, a ben hebi srefsrefi. 19 Dan a bigi foto prati na ini dri pisi èn den foto fu den trakondre sma ben kisi pori. Ne Gado memre taki a ben o gi Babilon a Bigiwan a kan di abi a win fu en bigi atibron. 20 Ala den èilanti lowe tu èn nowan bergi ben de fu feni. 21 Baka dati bigi pisi ijs fadon kmoto fu hemel leki wan bigi alen èn den fadon kon na tapu den sma. Ibri pisi ijs ben hebi sowan 20 kilo.* Den sma ben e kosi Gado fu di a rampu fu den pispisi ijs ben kon na den tapu èn fu di a rampu disi ben hebi srefsrefi.