A fosi brifi gi den Korentesma

8 Now mi wani taki fu den n’nyan* di sma e tyari leki ofrandi gi falsi gado. Wi alamala sabi sani fu a tori disi. Ma sabi w’wan e meki sma kisi bigifasi. Na a tra sei, te wi abi lobi, wi o gi trawan dek’ati. 2 Efu wan sma denki taki a sabi wan sani, dan a no sabi a sani ete soleki fa a musu sabi en. 3 Ma efu wan sma lobi Gado, dan Gado sabi a sma dati.

4 Now mi wani taki fu a nyan di sma e nyan den sani di trawan tyari leki ofrandi gi falsi gado. Wi sabi taki wan falsi gado na noti èn taki na wán Gado nomo de. 5 Furu sani de na hemel noso grontapu di sma e kari „gado”. Sobun, furu „gado” nanga furu „masra” de. 6 Ma gi wi wán Gado nomo de èn dati na a P’pa. Ala sani kmoto fu en èn wi e libi gi en. Wán Masra nomo de èn dati na Yesus Krestes. Gado gebroiki en fu meki ala sani èn a gebroiki en fu meki wi tu.

7 Ma a no ala sma sabi dati. Fu di son sma ben e anbegi falsi gado fosi, meki te den e nyan, den e si a n’nyan leki wan sani di sma tyari leki ofrandi gi wan falsi gado èn den abi konsensi fonfon fu di a konsensi fu den swaki. 8 Ma n’nyan no o meki wi tron moro bun mati fu Gado. Efu wi no e nyan, wi no e lasi noti èn efu wi e nyan, wi no e wini noti tu. 9 Ma luku bun taki a reti di yu abi fu du san yu wani, no e tron wan sani di e meki den swakiwan fadon.* 10 Bika efu wan sma e si taki yu di abi sabi, e sdon nyan na ini a tempel fu wan falsi gado, dan a kan taki a konsensi fu a sma dati di swaki o gi en dek’ati fu nyan sani di sma tyari leki ofrandi gi falsi gado. 11 Dan a sabi fu yu o meki taki yu brada di swaki, fadon. Hori na prakseri taki Krestes dede gi en tu. 12 Efu unu e sondu teige un brada na a fasi dati èn efu unu e gi den dek’ati fu du sani di e trobi a swaki konsensi fu den, dan unu e sondu teige Krestes. 13 Fu dati ede, efu na san mi e nyan e meki mi brada fadon, dan noiti moro mi o nyan meti, so taki mi no meki mi brada fadon.