A fosi brifi gi den Korentesma

10 Brada nanga sisa, mi wani fu unu sabi taki ala den afo fu wi ben de na ondro a wolku èn alamala ben psa na ini a se. 2 Nanga a wolku èn nanga a se den alamala ben dopu leki bakaman fu Moses. 3 Den alamala ben nyan a srefi n’nyan di Gado ben gi den 4 èn den alamala ben dringi a srefi watra di Gado ben gi den. Bika den ben e dringi fu a stonbergi fu Gado di ben waka nanga den. A stonbergi dati na Krestes. 5 Tòg Gado no ben feni furu fu den sma disi bun, bika a kiri den na ini a sabana.

6 Den sani disi tron eksempre gi wi, so taki wi no o angri fu du ogri soleki fa den ben e angri fu du ogri. 7 Wi no musu go anbegi falsi gado tu, soleki fa sonwan fu den ben du, bika Gado Buku taki: „A pipel go sdon fu nyan èn fu dringi. Dan den opo fu meki prisiri.” 8 Wi no musu libi wan hurulibi* tu, leki fa sonwan fu den ben huru,* bika dati meki taki 23.000 fu den dede na ini wán dei. 9 Wi no musu tesi Yehovah* tu, leki fa sonwan fu den ben tesi en, bika dati meki sneki beti den kiri. 10 Wi no musu krutukrutu tu, leki fa sonwan fu den ben e krutukrutu, bika dati meki na engel kiri den. 11 Den sani disi di psa nanga den de leki eksempre gi wi èn den skrifi leki wan warskow gi wi di e libi na a kba fu a ten disi.

12 Fu dati ede, a sma di denki taki a e tnapu musu luku bun taki a no fadon. 13 Nowan tesi di unu e kisi, na tesi di tra libisma no e kisi. Ma unu kan fertrow Gado. A no o meki unu kisi tesi di hebi moro leki san unu man tyari. Ma te tesi miti unu, a o yepi unu, so taki unu man hordoro.

14 Fu dati ede mi lobi brada nanga sisa, tan fara fu afkodrei. 15 Mi e taki nanga sma di abi ferstan. Unu srefi kan luku efu san mi e taki tru. 16 A kan nanga win di wi e taki Gado tangi fu en wani taki a brudu fu Krestes, a no so? A brede di wi e broko wani taki a skin fu Krestes, a no so? 17 Fu di wán brede de, meki wi na wán skin aladi furu fu wi de, bika wi alamala e nyan fu a wán brede dati.

18 Na so a de tu nanga a pipel fu Israel. Te den ben e nyan fu den ofrandi di den ben e bron tapu na altari, dan a ben de neleki den ben e nyan makandra nanga Gado, a no so? 19 San mi wani taki nanga disi? Taki den sani di sma e tyari leki ofrandi gi falsi gado na prenspari sani? Noso taki wan falsi gado na wan trutru gado? 20 Kwetkweti! San mi wani taki, na taki den sani di den trakondre sma e tyari leki ofrandi, a no gi Gado, ma na gi ogri yeye. Mi no wani taki unu moksi nanga ogri yeye. 21 Unu no kan dringi fu a kan fu Yehovah* èn fu a kan fu ogri yeye. Unu no kan nyan na „a tafra fu Yehovah”* èn na a tafra fu ogri yeye. 22 Of „na suku wi e suku fu meki Yehovah* dyarusu”? Unu denki taki unu tranga moro en?

23 Wi kan du ala sani, ma a no ala sani e tyari wini kon. Wi kan du ala sani, ma a no ala sani e gi dek’ati. 24 Nowan sma musu tan suku en eigi bun, ma a musu suku a bun fu trawan.

25 Unu kan nyan ala meti di e seri na presi pe sma e seri meti èn un no musu aksi-aksi sani fu un konsensi ede. 26 Bika „na Yehovah* abi grontapu nanga ala den sani di de na en tapu”. 27 Efu wan sma di no de na bribi kari unu fu kon nyan èn unu wani go, dan nyan iniwan sani di a e poti gi unu fu nyan èn no aksi-aksi sani fu un konsensi ede. 28 Ma efu wan sma e taigi unu: „Disi na wan sani di tyari leki ofrandi”, dan un no musu nyan en fu a sma ede di taigi unu dati èn fu a konsensi ede. 29 Mi no e taki fu a konsensi fu unu, ma a di fu a tra sma. Mi fri fu du san mi wani. Ma fu san ede mi ben o wani du wan sani di ben o meki wan sma krutu mi fu di en konsensi e trobi en? 30 Efu mi e taki Gado tangi fu a sani di mi e nyan, dan fu san ede sma musu krutu mi fu a sani di mi e taki Gado tangi fu en?

31 Fu dati ede, awinsi unu e nyan noso unu e dringi, noso awinsi san unu e du, du ala sani fu gi Gado glori. 32 Un no musu du nowan sani di kan meki Dyu, Grikisma noso a gemeente fu Gado fadon. 33 Na dati mi srefi e pruberi fu du tu. Mi e suku fu du ala sani fu plisi ala sma. Dati meki mi no e suku mi eigi bun, ma mi e suku a bun fu furu sma, so taki den kan kisi ferlusu.