A di fu tu brifi gi den Korentesma

12 Mi musu fu meki bigi aladi a no abi nowan wini gi mi. Mi o taki now fu fisyun di mi kisi fu Masra èn fu sani di a tyari kon na krin gi mi. 2 Mi sabi wan man di de wán nanga Krestes. Tinafo yari psa Masra teki en wantronso tyari go na a di fu dri hemel. Mi no sabi efu a ben de na ini en libisma skin noso dorosei fu en libisma skin, ma na Gado sabi dati. 3 Iya, mi sabi so wan man. Mi no sabi efu a ben de na ini en libisma skin noso dorosei fu en libisma skin, ma na Gado sabi dati. 4 Masra tyari a man disi go na ini a paradijs èn a yere wortu di nowan sma ben man taki èn di nowan sma mag taki. 5 Mi o meki bigi gi a man dati, ma mi no o meki bigi gi misrefi. A wan-enkri sani fu san mi o meki bigi na fu den swakifasi fu mi. 6 Srefi efu mi wani meki bigi, mi no o taki leki wan sma di no e gebroiki en ferstan, bika mi o taki san tru. Ma mi no o meki bigi, bika nowan sma di si san mi du noso di yere san mi taki musu denki moro fu mi leki san de fanowdu. 7 Den no musu du dati tu, soso fu di Masra tyari furu sani kon na krin gi mi.

Fu no meki mi denki tumsi furu fu misrefi, mi kisi wan maka na ini mi skin. Dati na wan engel fu Satan di e tan naki* mi, so taki mi no denki tumsi furu fu misrefi. 8 Mi begi Masra dri leisi fu puru a maka na ini mi skin. 9 Ma a taigi mi: „A bun-ati di mi e sori yu sari kba, bika te yu swaki a o de krin taki mi e gi yu a krakti di yu abi fanowdu.” Fu dati ede, nanga prisiri mi o meki bigi fu den swakifasi fu mi, so taki a krakti fu Krestes kan tan leki wan tenti na mi tapu. 10 Dati meki mi e prisiri te mi swaki, te sma e kosi mi, te mi de na nowtu èn te ferfolgu nanga problema e miti mi fu Krestes ede. Bika te mi swaki, dan mi tranga.

11 Mi tron wan sma di no e gebroiki en ferstan. Na unu meki taki mi kon de so, fu di na unu ben musu prèise mi. Bika awinsi unu e si mi leki noti, tòg nowan sani sori taki mi lagi moro den kfalek bun apostel fu unu. 12 Iya, mi sori unu taki mi na wan apostel fu di mi hordoro awinsi san ben e psa èn mi du wondru nanga bigi sani. 13 A wan-enkri reide di meki taki unu no kisi so furu grani leki den tra gemeente, na fu di mi no ben de wan hebi gi unu. Na wan ogri mi du di mi du dati? Efu dati de so, dan grantangi, gi mi pardon fu na ogri disi.

14 Disi na a di fu dri leisi di mi wani kon na unu èn a leisi disi mi no o de wan hebi gi unu tu. Bika a no den gudu fu unu mi e suku, ma na unu mi e suku. A no den pkin musu poti wan sani na wan sei gi den p’pa nanga m’ma fu den, ma na den p’pa nanga m’ma musu poti wan sani na wan sei gi den pkin fu den. 15 Nanga prisiri mi wani gi ala san mi abi èn mi de klarklari fu gi mi libi srefi gi unu. Efu mi lobi unu so furu, dan unu no musu lobi mi na a srefi fasi tu? 16 Awinsi fa a no fa, mi no ben de wan hebi gi unu. Ma tòg unu e taki dati mi abi „triki” èn taki mi kisi unu „na wan bedrigi fasi”. 17 Mi no suku fu puru moni na un skin di mi seni den brada kon na unu. 18 Mi begi Titus fu kon na unu èn mi seni wan brada go nanga en. Titus no ben suku fu puru moni na un skin, tòg? Wi abi a srefi denki èn wi du sani na a srefi fasi, a no so?

19 Kande unu e prakseri taki wi wani krin wi nen te unu leisi a brifi disi, ma dati no de so. Wi e taki na fesi Gado leki bakaman fu Krestes. Mi lobi brada nanga sisa, wi e du ala den sani disi fu gi unu dek’ati. 20 Bika mi e frede taki te mi kon, na a wan noso tra fasi unu no o de soleki fa mi ben sa wani èn mi no o de soleki fa unu ben sa wani. Mi frede taki kesekese, dyarusu, atibron nanga trobi o de. Kande sma o taki ogri fu trawan, den o taki sma sani bakabaka, son sma o abi bigifasi èn dyugudyugu o de. 21 Kande te mi o kon baka, a Gado fu mi o meki mi kisi syen te mi de nanga unu. Kande mi o sari bika furu sma no abi berow fu den sondu di den ben du fosi. Den no kenki a fasi fa den e denki fu den morsu sani di den du, fu a hurulibi* fu den èn fu den tra ogri di den du sondro fu syen.*