Sakaria

14 „Luku! A dei fu Yehovah e kon. Na a dei dati sma o prati den gudu fu yu* leti na yu fesi. 2 Mi o meki ala den pipel kon makandra fu feti nanga Yerusalem. Den o teki a foto abra, den o teki ala den gudu na ini den oso èn den o dwengi den uma fu d’don nanga den. Nanga tranga den o tyari afu fu den sma fu a foto gwe, ma den trawan di tan abra o tan libi na ini a foto.

3 Yehovah o go feti nanga den pipel dati neleki di a ben go feti nanga den feanti fu en na ini a ten di psa. 4 Na a dei dati a o poti en futu na tapu na Olèif-bergi di de na owstusei fu Yerusalem. Fu owstusei* te go miti west-sei* na Olèif-bergi o prati na mindri èn wan bigi lagipresi o kon drape. Afu fu a bergi o skoifi go na noordsei èn afu o skoifi go na zuidsei. 5 Unu o lowe go na a lagipresi di de na mindri den bergi fu mi èn a lagipresi dati o doro te na Asel. Unu o abi fu lowe leki fa unu ben lowe di wan gronseki ben de na a ten fu Kownu Usia fu Yuda. Dan Yehovah mi Gado o kon, makandra nanga ala den santawan fu en.

6 Na a ten dati nowan bigi leti o skèin. Ala sani o kowru èn steifi.* 7 A dei dati o de wan dei di sma o sabi leki a dei fu Yehovah. A no o de deiten èn a no o de neti. Faya o skèin na netiyuru. 8 Na a dei dati, watra di e gi libi o kmoto fu Yerusalem. Afu fu a watra o go na a se na owstusei* èn afu fu a watra o go na a se na west-sei.* A sani disi o psa na a waran ten fu a yari èn na a kowru ten fu a yari. 9 Yehovah o tron Kownu fu heri grontapu. Na a ten dati, sma o anbegi Yehovah w’wan èn na en nen w’wan den o kari.

10 A heri kontren fu Geiba go na Rimon te na a zuidsei fu Yerusalem o kon de leki Araba-lagipresi. Sma o bow Yerusalem baka èn den o tan drape baka. Den o tan fu Benyamin-portu te na a Fosi-portu nanga na Uku-portu. Den o tan tu fu Hananel-toren te na den baki pe den e masi droifi fu meki win gi kownu. 11 Iya, sma o tan drape trutru. Noiti moro a foto o kisi pori. Sma o tan na ini Yerusalem sondro brok’ede.

12 Disi na a rampu di Yehovah o tyari gi den pipel di o feti nanga Yerusalem: den skin o pori gwe aladi den e tnapu na tapu den futu. Den ai o pori gwe na ini den ai-olo èn den tongo o pori gwe na ini den mofo.

13 Na a ten dati Yehovah o bruya den na ala sei. Den o grabu makandra èn den o feti nanga densrefi. 14 Yuda srefi o feti na Yerusalem. Den o tyari den gudu fu ala pipel na den lontu kon makandra, iya, den o tyari bun furu gowtu, solfru, nanga krosi kon makandra.

15 Na a srefi rampu o miti den asi, den stonburiki,* den kameili, den buriki nanga ala den tra meti di de na ini den legrekampu fu den feanti.

16 Ala sma di tan abra fu den pipel di kon feti nanga Yerusalem o go ibri yari fu boigi gi* Kownu Yehovah di e tiri den legre èn fu hori a Kampufesa.* 17 Ma efu wan sma fu den pipel fu grontapu no e kon na Yerusalem fu boigi gi Kownu Yehovah di e tiri den legre, dan alen no o fadon gi en. 18 Efu a pipel fu Egepte no kon drape èn den no kon na ini a foto, dan den srefi no o kisi alen tu. A srefi rampu di Yehovah tyari kon na tapu den pipel di no kon hori a Kampufesa,* o miti den tu. 19 Na a strafu disi den sma fu Egepte nanga den sma fu ala den tra pipel o kisi te den no kon hori a Kampufesa. Na wan sondu taki den no kon na a fesa disi.

20 Na a ten dati, den o skrifi na tapu den bel fu den asi: ’Santafasi na fu Yehovah!’ Den patu* di sma e gebroiki fu bori sani na ini na oso fu Yehovah, o de leki den komki di de na fesi na altari. 21 Ibri patu* di sma e gebroiki fu bori sani na ini Yerusalem nanga Yuda, o kon de wan santa sani di de fu Yehovah di e tiri den legre. Dan ala den sma di o kon fu tyari srakti-ofrandi o gebroiki den patu fu bori den ofrandi fu den. Na a ten dati nowan Kanansma* o de moro na ini a tempel fu Yehovah di e tiri den legre.”