Gi den Hebrewsma

8 We, a moro prenspari sani fu a tori di wi e taki, na disi: Wi abi wan granpriester di go sdon na a ret’anusei fu a kownusturu fu a Moro Heiwan na hemel. 2 En na wan futuboi di e dini na ini a santa presi fu a tru tenti. A no libisma meki a tenti, ma na Yehovah.* 3 Ibri granpriester poti na wroko fu tyari kado nanga srakti-ofrandi. Dati meki a ben de fanowdu taki a granpriester disi ben musu gi wan sani leki ofrandi tu. 4 We, efu a ben de na grontapu, dan a no ben o de wan priester, fu di priester de kba di e tyari ofrandi soleki fa a Wet e taki. 5 A santa wroko di den man disi e du, de leki wan eksempre èn wan skaduw fu den sani di de na hemel. Dati meki di Moses ben o meki a tenti, Gado taigi en: „Sorgu taki yu meki ala sani leki na eksempre di mi sori yu na tapu a bergi.” 6 Ma now Yesus kisi wan moro bun wroko fu du, fu di a de a mindriman tu fu wan ferbontu di bun moro na owru ferbontu. Wet de di e horbaka gi a nyun ferbontu disi di abi fu du nanga pramisi di moro bun.

7 Efu noti ben mankeri a fosi ferbontu, dan a di fu tu ferbontu no ben o de fanowdu. 8 Ma fu di Gado feni taki a pipel abi fowtu, meki a e taki: „Yehovah* taki: ’Luku, wan ten o kon taki mi o meki wan nyun ferbontu nanga den Israelsma èn nanga den sma fu Yuda. 9 A no o de leki a ferbontu di mi ben meki nanga den afo fu den di mi teki den na den anu fu tyari den kmoto fu Egepte, ma a o de tra fasi. Fu di den no hori a ferbontu di mi ben meki nanga den, meki mi no ben e broko mi ede nanga den moro’, na so Yehovah* taki.

10 ’Bika disi na a ferbontu di mi o meki nanga den Israelsma baka a ten dati’, na so Yehovah* taki. ’Mi o poti den wet fu mi na ini den ferstan èn mi o skrifi den na ini den ati. Mi o tron den Gado èn den o tron mi pipel.

11 Nowan fu den o taigi en kondreman nanga en brada moro: „Yu musu sabi Yehovah!”,* bika den alamala o sabi mi. A moro pkinwan èn a moro bigiwan fu den o sabi mi. 12 Mi o gi den pardon fu den ogri di den du èn mi no o memre den sondu fu den moro.’”

13 Te Gado e taki „wan nyun ferbontu”, dan a e sori taki a fosi ferbontu no de fanowdu moro. We, a sani di no de fanowdu moro èn di kon owru, de fu kon na wan kba.