Gi den Romesma

16 Mi e seni wi sisa Feibe gi unu. A e dini na ini a gemeente na Kenkreya. 2 Teki en nanga prisiri leki wan futuboi fu Masra, soleki fa unu e du nanga den santawan. Unu kan yepi en nanga ala sani san a ben sa abi fanowdu, bika ensrefi yepi furu sma, iya, a yepi mi tu.

3 Taki Preska nanga Akwila odi gi mi. Den du a wroko fu Krestes Yesus makandra nanga mi, 4 aladi den ben kan lasi den libi fu mi ede. A no mi w’wan e taki den tangi, ma ala den gemeente na ini den tra kondre e taki den tangi tu. 5 Taki a gemeente odi tu di e kon makandra na ini na oso fu den. Taki mi lobiwan Eipeinetus odi, di de wan fu den fosi bakaman fu Krestes na ini Asia. 6 Taki Maria odi tu di ben wroko tranga gi unu. 7 Taki mi famirman Andronikus nanga Yunias odi. Den ben de na straf’oso nanga mi, den apostel sabi den heri bun èn den na dinari fu Krestes moro langa leki mi.

8 Taki Ampliatus, mi lobiwan di de wan dinari fu Masra, odi gi mi. 9 Taki Urbanus odi, di ben du a wroko fu Krestes makandra nanga wi. Taki mi lobiwan Stakes odi tu. 10 Taki Apeles, a wan di Krestes feni bun, odi tu. Taki den sma di e tan na a oso fu Aristobulus odi. 11 Taki mi famirman Herodion odi, nanga den dinari fu Masra di e tan na a oso fu Narsesus. 12 Taki Trifeina nanga Trifosa odi. Den uma disi e wroko tranga gi Masra. Taki wi lobiwan Perses odi tu, bika a wroko tranga gi Masra. 13 Taki Rufus di de wan bun dinari fu Masra, odi tu, nanga en m’ma, di de leki wan m’ma gi mi tu. 14 Taki Asenkritus, Fleigon, Hermes, Patrobas, nanga Hermas odi, nanga den tra brada di de nanga den. 15 Taki Filologus nanga Yulia odi tu, owktu Nerus nanga en sisa, nanga Olimpas, nanga ala den santawan di de nanga den. 16 Un musu gi makandra odi nanga wan bosi.* Ala den gemeente fu Krestes e seni taki unu odi.

17 We, mi brada, mi e begi unu fu luku bun nanga den sma di e kon nanga sani di unu no ben leri, bika den e du disi fu prati unu èn fu meki trawan fadon. No bemui nanga den. 18 Bika den sortu sma dati no de srafu fu wi Masra Krestes, ma den de srafu fu den eigi takru lostu.* Nanga switi taki èn nanga moi wortu den e kori den ati fu den wan di no e du ogri. 19 Ala sma kon si taki unu e gi yesi na Gado. Dati meki mi e prisiri nanga unu. Ma mi wani taki un musu abi koni so taki unu kan sabi fa fu du bun. Un no musu de sma di sabi fa fu du ogri. 20 Bika ete wan syatu pisi ten, dan a Gado di e gi freide o meki unu masi Satan na ondro un futu. Meki wi Masra Yesus sori unu bun-ati.

21 Timoteyus di e wroko makandra nanga mi èn den famiriman fu mi Lusiyus, Yason nanga Sosipater e taki unu odi.

22 Mi, Tersiyus, di skrifi a brifi disi gi Paulus, e seni taki unu odi na ini a nen fu Masra.

23 Gayus, a sma pe mi e tan èn pe a heri gemeente e kon makandra, e seni taki unu odi. Erastus, a man di e luku den moni-afersi fu a foto, nanga en brada Kwartus, e seni taki unu odi. 24* ——

25 Gado kan tranga unu, soleki fa a bun nyunsu di mi e preiki èn a boskopu di abi fu du nanga Yesus, e sori. A bun nyunsu disi abi fu du nanga a santa kibritori di Gado tyari kon na krin. A tori disi ben kibri fu wan heri pisi ten. 26 Ma now a kon na krin. Nanga yepi fu den buku fu den profeiti, ala den pipel kon sabi san na a santa kibritori. Disi psa soleki fa a Gado di e libi fu têgo taki, so taki ala sma kan bribi na ini en èn kan gi yesi na en. 27 Na a Gado disi, di abi ala koni, musu kisi glori fu têgo nanga yepi fu Yesus Krestes. Amen.