Wan Openbaring gi Yohanes
7 Baka dati mi si fo engel e tnapu na den fo uku fu grontapu. Den ben e hori den fo winti fu grontapu bun steifi, so taki den no ben kan wai kon na grontapu, na tapu a se, noso na tapu iniwan bon. 2 Dan mi si wan tra engel e opo kon fu a sei pe a son e opo* èn a ben hori wan stampu* fu a libilibi Gado na ini en anu. Ne a bari nanga wan tranga sten gi den fo engel di ben kisi primisi fu du ogri nanga grontapu èn nanga a se: 3 „No du ogri nanga grontapu, nanga a se noso nanga den bon teleki wi poti wan marki na tapu a fes’ede fu den srafu fu wi Gado.”
4 Ne mi yere gi omeni sma den poti wan marki. Den poti en gi 144.000 sma di kmoto fu ibri lo fu den manpkin fu Israel:
5 Fu a lo fu Yuda 12.000 sma ben kisi a marki.
Fu a lo fu Ruben 12.000 sma,
fu a lo fu Gad 12.000 sma,
6 fu a lo fu Aser 12.000 sma,
fu a lo fu Naftali 12.000 sma,
fu a lo fu Manase 12.000 sma,
7 fu a lo fu Simeon 12.000 sma,
fu a lo fu Leifi 12.000 sma,
fu a lo fu Isaskar 12.000 sma,
8 fu a lo fu Seibulon 12.000 sma,
fu a lo fu Yosef 12.000 sma
èn fu a lo fu Benyamin 12.000 sma ben kisi a marki.
9 Baka dati mi si wan bigi grupu sma di nowan sma ben man teri. Den ben kmoto fu ala kondre, lo nanga pipel èn den ben e taki ala tongo. Den ben e tnapu na fesi a kownusturu èn na fesi a Pkin Skapu. Den ben e weri langa weti krosi èn den ben e hori palmtaki na ini den anu. 10 Den bari: „Na wi Gado di e sdon na tapu a kownusturu èn a Pkin Skapu meki taki wi kisi ferlusu.”
11 Ala den engel ben e tnapu lontu a kownusturu èn lontu den owruman* nanga den fo kerub-engel.* Ne den saka kindi boigi na fesi a kownusturu èn den anbegi Gado. 12 Den taki: „Amen! Meki ala sma prèise a Gado fu wi. Meki den gi en glori, grani nanga tangi fu ala ten, iya, fu têgo. Bika a abi koni, makti, nanga krakti. Amen.”
13 Ne wan fu den owruman aksi mi: „Suma na den sma disi di weri den langa weti krosi èn pe den kmoto?” 14 Direk mi taigi en: „Masra, na yu sabi a piki.” Dan a taigi mi: „Disi na den sma di kmoto na ini a bigi banawtu.* Den wasi den langa krosi fu den èn den meki den kon weti na ini a brudu fu a Pkin Skapu. 15 Dati meki den de na fesi a kownusturu fu Gado. Den e du santa wroko gi en dei nanga neti na ini a tempel fu en. A sma di e sdon na tapu a kownusturu o bradi en tenti abra den. 16 Angri no o kiri den moro, watra no o kiri den moro, son no o bron den èn den no o faya. 17 Bika a Pkin Skapu di de krosbei* fu a kownusturu o tiri den èn a o tyari den go na presi di abi watra di e gi libi. Gado o figi ala watra puru na den ai.”