A brifi fu Yakobus

4 Fu san ede unu e feti èn unu e meki trobi nanga makandra? Na den tranga lostu fu unu di e feti na ini un sondu skin e meki unu du dati. 2 Unu wani furu sani, ma tòg unu no abi den sani di unu wani. Unu e tan kiri sma èn unu e tan abi big’ai, ma tòg unu no man kisi den. Unu e tan meki trobi èn unu e tan feti. Unu no abi noti fu di unu no e aksi Gado. 3 Awinsi unu e aksi, tòg unu no e kisi noti, bika na ogri unu wani go du. Unu wani du san a sondu skin fu unu wani.

4 Un huruman,* unu no sabi taki wan mati fu grontapu na wan feanti fu Gado? Dus ala sma di wani de wan mati fu grontapu e meki ensrefi tron wan feanti fu Gado. 5 Of na denki unu e denki taki na somaar Gado Buku taki: „Na a dyarusu na ini wi ati e meki taki wi e angri fu abi ala sortu sani”? 6 Ma a bun-ati di Gado e sori wi, moro bigi. Dati meki Gado Buku taki: „Gado no lobi den sma di abi heimemre, ma a e sori bun-ati gi den sma di abi sakafasi.”

7 Dati meki un musu saka unsrefi na ondro Gado. Ma kakafutu gi Didibri èn a o lon gwe fu unu. 8 Kon krosbei na Gado èn a o kon krosbei na unu. Meki den sma di e du sondu, krin den anu èn meki den sma di e tweifri, krin den ati. 9 Un musu sari, un musu row èn un musu bari krei. Na presi fu lafu, un musu krei èn na presi fu prisiri, un musu sari. 10 Saka unsrefi na fesi Yehovah* èn a o hei unu.

11 Mi brada, un no musu taki ogri moro fu makandra. Efu wan sma e taki ogri fu wan brada, noso efu a e krutu en brada, dan a e taki ogri fu a wet èn a e krutu a wet. Efu yu e krutu a wet, dan yu a no wan sma di e du san a wet e taki, ma yu na wan krutuman. 12 Wán sma nomo de di e meki wet èn di de krutuman, iya, na en w’wan man ferlusu sma èn kiri sma. Ma suma na yu fu krutu tra sma?

13 Un arki. Unu e taki: „Tide noso tamara wi o go na a foto dati, wi o tan wan yari drape, wi o du bisnis èn wi o meki moni.” 14 Ma unu no sabi fa a libi fu unu o de tamara. Bika unu de leki dow di de fu si fu wan syatu pisi ten nomo èn baka dati a no de moro. 15 Na presi fu dati, un musu taki: „Efu Yehovah* wani, dan wi o de na libi èn wi o du disi noso dati.” 16 Ma unu lobi meki bigi èn unu no e syen fu a sani dati srefi. Dati no bun srefsrefi. 17 Fu dati ede, efu wan sma sabi fa fu du bun, ma tòg a no e du dati, dan a e sondu.