Gi Fileimon
1 Mi, Paulus, di de na straf’oso fu di mi e bribi na ini Krestes Yesus, nanga wi brada Timoteyus e skrifi yu Fileimon, wi lobi brada di e wroko makandra nanga wi. 2 Mi e skrifi a brifi disi tu gi wi sisa Apfia, nanga Arkepus di e feti makandra nanga wi èn gi a gemeente di gwenti kon makandra na ini yu oso.
3 Meki Gado wi P’pa nanga Masra Yesus Krestes sori unu bun-ati. Meki a freide fu den de nanga unu.
4 Ala ten mi e taki mi Gado tangi te mi e taki fu yu na ini den begi fu mi, 5 bika furu sma e taigi mi fa yu e bribi na ini Masra Yesus, fa yu lobi en èn fa yu lobi ala den santawan. 6 Mi e begi taki a bribi di wi nanga yu abi, kan meki yu kon ferstan taki ala bun sani di wi abi na fu di wi na bakaman fu Krestes. 7 Di mi yere fu a lobi fu yu a gi mi furu prisiri nanga trowstu, bika na yu mi brada, meki den santawan kisi krakti baka.
8 A tru taki mi abi a reti fu taigi yu na ini a nen fu Krestes san na a moro bun sani fu du. Tòg mi no o du dati. 9 Ma mi wani begi yu fu du san bun fu di yu abi lobi, bika mi Paulus, owru kba èn now mi de na straf’oso tu fu di mi e bribi na ini Krestes Yesus. 10 Mi e begi yu fu a bun fu Oneisimus di kon de leki mi eigi pkin. Mi kon de leki wan p’pa gi en pe mi de dyaso na straf’oso.* 11 Fosi, a no ben de wan yepi gi yu, ma now a de wan bigi yepi gi mi nanga yu. 12 Mi e seni en kon baka na yu. Ja, mi lobi en trutru.
13 Now di mi de na straf’oso fu a bun nyunsu ede mi ben o wani meki a tan dya nanga mi, so taki a kan dini mi neleki fa yu ben o du dati. 14 Ma mi no wani du noti solanga yu no gi mi primisi. Bika te yu o du a bun disi, yu no musu du en fu di sma dwengi yu, ma fu di yusrefi wani. 15 A tru taki a gwe fu wan syatu pisi ten.* Ma kande a bun taki disi psa, bika now a o de nanga yu fu ala ten. 16 A no de wan srafu gi yu nomo, ma a kon de moro leki wan srafu, iya, a kon de wan lobi brada. A de wan lobi brada spesrutu gi mi. Ma gi yu a de moro leki dati, bika a de wan srafu èn wan lobi brada di e dini Masra. 17 Fu dati ede efu yu e si mi leki wan mati,* dan gi en wan switikon neleki fa yu ben o gi mi wan switikon. 18 Boiti dati, efu a meki yu lasi furu noso efu a abi wan paiman na yu, dan poti en tapu mi nen. 19 Na mi, Paulus, e skrifi yu. Nanga mi eigi anu mi e skrifi yu taki mi o pai a paiman baka. Mi no abi fu taigi yu taki yu abi wan paiman na mi tu èn dati na yu srefi.* 20 Iya, brada, fu di mi nanga yu na bakaman fu Masra, meki mi wani aksi yu fu yepi mi na a fasi disi. Meki mi ati firi bun baka, fu di mi na wan bakaman fu Krestes tu.
21 Mi sabi taki yu o du san mi aksi yu. Dati meki mi e skrifi yu èn mi sabi taki yu o du moro srefi leki san mi taki. 22 Ma boiti dati, sreka wan presi gi mi fu tan, bika mi howpu taki den begi fu unu o meki taki mi o kon fri, so taki mi kan de nanga unu baka.
23 Epafras, di de na straf’oso nanga mi fu Krestes Yesus ede, e seni taki yu odi. 24 Markus, Aristarkus, Deimas nanga Lukas di e wroko makandra nanga mi e seni taki yu odi tu.
25 Meki Masra Yesus Krestes sori unu bun-ati, fu di unu abi a yoisti fasi fu denki.