Wan Openbaring gi Yohanes

2 Disi na san yu musu skrifi gi na engel fu a gemeente na Efeise: A sma di e hori den seibi stari na ini en ret’anu èn di e waka na mindri den seibi gowtu kandratiki taki disi: 2 ’Mi sabi san yu e du èn mi sabi taki yu e wroko tranga, yu e hordoro èn yu no lobi ogrisma. Yu ondrosuku den sma di e taki dati den na apostel èn yu kon si taki den e lei. Den a no trutru apostel. 3 Mi si taki yu e hordoro èn yu e tan dini mi aladi yu e kisi tesi fu mi nen ede. Yu no kon weri. 4 Ma tòg mi si wan sani na yu di mi no feni bun. Mi si taki yu lasi a lobi di yu ben abi na a bigin.

5 Fu dati ede prakseri pe yu ben de, fosi yu fadon. Yu musu abi berow èn yu musu du den sani di yu ben e du fosi. Efu yu no du dati, dan mi o kon na yu èn mi o puru yu kandratiki na en presi. 6 Ma tòg yu e du wan bun sani ete: Den sani di a sekte* fu Nikolas e du, yu no lobi srefsrefi. Mi srefi no lobi den sani dati srefsrefi. 7 A sma di abi yesi, meki a arki san a santa yeye e taigi den gemeente: Mi o gi a sma di wini a strei primisi fu nyan den froktu fu a bon di e gi libi, a bon di de na ini a paradijs fu Gado.’

8 Disi na san yu musu skrifi gi na engel fu a gemeente na Smirna: ’A Foswan nanga a Lastiwan’, a wan di ben dede èn di kon na libi baka taki disi: 9 ’Mi sabi taki yu e nyan pina èn taki yu pôti, ma tòg yu gudu. Mi sabi tu taki den sma di e kari densrefi Dyu e taki ogri fu yu. Ma den a no trutru Dyu, den na fu a snoga* fu Satan. 10 No frede a pina di yu o pina. Didibri o go doro fu trowe sonwan fu unu na ini straf’oso. Unu o kisi tesi na ala fasi èn unu o nyan pina tin dei langa. Tan dini Gado te na dede, dan mi o gi yu a kroon fu libi. 11 A sma di abi yesi, meki a arki san a santa yeye e taigi den gemeente: A di fu tu dede* no o man du noti nanga a sma di wini a strei.’

12 Disi na san yu musu skrifi gi na engel fu a gemeente na Pergamum: A sma nanga a langa fet’owru di srapu na ala tu sei taki disi: 13 ’Mi sabi pe yu e tan. Yu e tan pe a kownusturu fu Satan de. Ma tòg yu e tai hori na mi* èn yu no tapu fu bribi na ini mi, srefi di den kiri mi kotoigi Antipas di tan dini Gado. Den kiri en na ini a foto fu unu pe Satan e tan.

14 Ma tòg mi si wan tu sani na yu di mi no feni bun: Son sma de na yu drape di e horbaka gi a leri fu Bileam. Na en ben leri Balak fa a ben kan meki den Israelsma sondu. Na en meki den Israelsma nyan sani di ben gi leki ofrandi na den falsi gado èn na en meki taki den Israelsma go huru.* 15 Son sma de na yu drape tu di e horbaka gi a leri fu a sekte fu Nikolas. 16 Fu dati ede yu musu abi berow. Efu yu no abi berow, dan mi o kon na yu es’esi. Nanga a langa fet’owru di e kmopo na ini mi mofo, mi o feti nanga den.

17 A sma di abi yesi, meki a arki san a santa yeye e taigi den gemeente: Mi o gi a sma di wini a strei pkinso fu a mana di kibri èn mi o gi en wan weti ston. Na tapu a ston wan nyun nen skrifi di nowan sma sabi, boiti a sma di kisi a ston.’

18 Disi na san yu musu skrifi gi na engel fu a gemeente na Tiatira: A Manpkin fu Gado, a sma di abi ai di de leki faya èn di abi futu di e brenki leki soifri kopro taki disi: 19 ’Mi sabi san yu e du èn mi sabi taki yu abi lobi nanga bribi. Mi sabi fa yu e wroko gi Gado èn fa yu e hordoro. Mi sabi taki now yu e du moro bigi sani leki fosi.

20 Ma tòg mi si wan sani na yu di mi no feni bun: Yu e meki na uma Iseibel di e kari ensrefi wan profeiti, du san a wani. A e leri èn a e kori den srafu fu mi fu go huru* èn fu nyan sani di gi leki ofrandi na den falsi gado. 21 Mi gi na uma disi ten fu abi berow, ma a no wani abi berow fu a huru di a e huru.* 22 Luku, mi o naki en nanga wan hebi siki, so taki a no man opo fu en bedi. Efu den sma di e huru nanga en no abi berow fu den sani di a e meki den du, dan mi o meki den pina hebi. 23 Mi o kiri den pkin fu en nanga wan takru siki, so taki ala den gemeente o sabi taki mi na a sma di e ondrosuku den moro dipi prakseri* nanga na ati fu libisma. Mi o pai ibriwan fu unu fu den sani di unu du.

24 Ma sonwan fu unu na Tiatira no teki a leri disi èn unu no wani sabi „den dipi sani fu Satan”. Mi wani taigi unu a sani disi: Mi no e poti nowan tra hebi na un tapu. 25 Ma awinsi san psa, un musu tan hori steifi na san unu abi teleki mi kon. 26 Efu wan sma wini a strei èn a e du san mi taki te na a kba, dan mi o gi en a makti fu tiri den pipel fu grontapu, 27 neleki fa mi kisi makti fu mi P’pa. A sma dati o de leki wan skapuman di o tiri a pipel nanga wan isri tiki. Neleki wan prapi a o naki den broko pispisi. 28 Mi o gi en a m’manten stari. 29 A sma di abi yesi, meki a arki san a santa yeye e taigi den gemeente.’