Wan Openbaring gi Yohanes

9 Dan a di fu feifi engel bro a trompet fu en. Ne mi si wan stari di ben fadon fu hemel kon na grontapu èn a ben kisi a sroto fu a dipi peti di no abi gron. 2 A stari opo a dipi peti èn smoko opo kmoto fu a peti neleki a smoko fu wan bigi onfu. A smoko fu a peti ben meki a son nanga a loktu kon dungru. 3 Ne sprenka kmoto na ini a smoko kon na grontapu. Den kisi a srefi makti di den schorpioen abi na grontapu. 4 Den sprenka kisi fu yere taki den no ben musu du noti nanga den grun w’wiri, den bon èn iniwan tra sani di e gro na grontapu. Den ben musu sutu soso den sma di no abi a marki fu Gado na tapu den fes’ede.

5 Den sprenka no kisi primisi fu kiri den sma dati, ma den ben musu gi den skin-ati feifi mun langa. A skin-ati di den sma disi kisi ben de leki a pen di wan sma e firi te wan schorpioen sutu en. 6 Na ini a ten dati den sma o suku wan fasi fu dede, ma den no o feni en. Den o wani dede, ma dede o lowe gi den.

7 Den sprenka ben gersi asi di de srekasreka fu go na feti. Na tapu den ede den ben abi sani di ben gersi gowtu kroon èn den fesi ben gersi libisma fesi, 8 ma den w’wiri ben langa leki di fu umasma. Den tifi ben gersi lewtifi. 9 Den ben weri sani di gersi isri schild fu tapu den borsu. Den frei fu den ben e meki wan b’bari di ben de leki a b’bari fu furu asi di e hari asiwagi fu go feti. 10 Den ben abi tere tu di abi maka leki a di fu wan schorpioen. A tere fu den ben abi a makti fu gi den sma skin-ati feifi mun langa. 11 A kownu fu den na a engel fu a dipi peti. Na ini Hebrewtongo a kownu nen Abadon,* ma na ini Grikitongo a nen Apolion.*

12 A fosi ogri psa kba. Luku! Baka den sani disi ete tu ogri e kon.

13 Ne a di fu siksi engel bro a trompet fu en. Dan mi yere wan sten e kmopo fu den tutu fu a gowtu altari di de na fesi Gado. 14 A sten taigi a di fu siksi engel di ben abi a trompet: „Lusu den fo engel di tai na a bigi Eufraat-liba.” 15 Dan a lusu den fo engel di ben de srekasreka gi a yuru, a dei, a mun nanga a yari fu go kiri a di fu dri pisi fu ala den sma.

16 Ne mi yere taki a legre fu den srudati di ben e rèi na tapu asi ben abi 200 milyun srudati.* 17 Dan mi si den asi na ini a fisyun nanga den sma di ben e sdon na den tapu. Den ben weri isri empi fu tapu den borsu. Den empi disi ben abi redi, blaw nanga geri kloru. Na ede fu den asi ben gersi a di fu wan lew èn faya, smoko nanga swarfu* ben e kmoto na ini den mofo. 18 Disi na den dri rampu di ben kiri a di fu dri pisi fu ala den sma: A faya, a smoko nanga a swarfu di ben e kmoto na ini den mofo. 19 A makti fu den asi de na ini den mofo èn na ini den tere, bika den tere de leki sneki. Den tere abi ede tu èn nanga dati den e du sma ogri.

20 Ma den tra sma di den rampu disi no kiri, no ben abi berow fu den sani di den du. Den tan anbegi den ogri yeye nanga den falsi gado di meki fu gowtu, solfru, kopro, ston nanga udu, èn di no man si, yere noso waka. 21 Den sma disi ben kiri sma, den ben du afkodrei, den ben e huru* èn den ben fufuru, ma den no ben abi berow fu den ogri disi di den du.