A di fu tu brifi gi Timoteyus
3 Ma sabi taki na ini den lasti dei muilek ten o de di tranga fu psa, 2 bika sma o lobi densrefi nomo. Den o lobi moni. Den o lobi dyaf. Den o abi heimemre. Den o taki ogri fu trawan. Den no o arki p’pa nanga m’ma. Den no o de nanga tangi. Yu no man reken na den tapu.* 3 Den no o lobi trawan. Den no o wani agri nanga trawan.* Den o ferteri ogr’ati lei fu trawan. Den no o man dwengi densrefi. Den o du ogr’ati sani. Den no o lobi san bun. 4 Den o du ogri nanga den eigi mati. Den o du san densrefi wani. Den o abi bigifasi. Den o lobi prisiri na presi taki den lobi Gado. 5 A o gersi leki den e dini Gado fayafaya, ma a libi fu den o sori taki dati no de so. No bemui nanga den sortu sma dati, 6 bika yu abi man na den mindri di e boro go na ini osofamiri fu bedrigi sma. Den e kori den swaki uma di lai nanga sondu èn di e meki ala sortu lostu basi den. 7 Ala yuru den uma disi e teki leri, ma tòg den no man ferstan a tru leri finfini.
8 Neleki fa Yanes nanga Yambres ben e gens Moses, na so den man disi e tan gens a tru leri. A heri denki fu den sortu man disi pori. Gado no feni den bun fu di den no e libi leki fa a tru bribi e sori. 9 Tòg den no o man go doro nanga san den e du, bika ala sma o si krin fa den don, neleki fa sma ben si a donfasi fu Yanes nanga Yambres. 10 Ma yu du ala san mi leri yu èn yu poti prakseri finfini na a fasi fa mi ben e libi, na san mi ben wani na ini mi libi, na a bribi fu mi, na a pasensi fu mi, na a lobi fu mi, na a fasi fa mi hordoro, 11 na a fasi fa sma du ogri nanga mi èn na a fasi fa mi nyan pina di mi ben de na Antiokia, Ikoniyum nanga Listra. Ala den sani disi ben miti mi, ma Masra puru mi na ini alamala. 12 Fu taki en leti, den o du ogri nanga ala den sma di wani dini Gado fayafaya leki bakaman fu Krestes Yesus. 13 Ma ogrisma nanga bedrigiman o kon ogri moro nanga moro. Den o kori trawan èn trawan o kori den.
14 Ma yu musu tan du den sani di yu leri èn di sma yepi yu fu kon bribi, bika yu sabi fu suma yu leri den. 15 Sensi di yu ben de wan beibi, den leri yu den sani di skrifi na ini den Santa Buku. Den sani disi kan gi yu a koni fu kisi ferlusu fu di yu e bribi na ini Krestes Yesus. 16 Na Gado srefi ben meki sma skrifi ala den sani di de na ini Gado Buku. Den bun fu gi leri, fu yepi sma fu si san bun èn san no bun, fu seti sani kon bun baka èn fu poti sma baka na a reti pasi. 17 Na a fasi disi wan sma di e dini Gado o abi ala koni di de fanowdu fu man du ibri bun wroko.