A di fu tu brifi fu Petrus

2 Ma neleki fa falsi profeiti ben de na mindri a pipel fu Israel, na so falsi leriman o de na un mindri tu. Sondro fu unu sabi, den sma disi o kon nanga falsi leri fu pori a bribi fu unu. Den o taki srefi dati den no sabi a sma di bai den. Den sani di den e du o meki taki den lasi libi heri esi. 2 Boiti dati, furu sma o waka na den baka èn den o du ogri sondro fu syen* neleki den. Dati meki sma o taki ogri fu a tru leri. 3 Gridi o meki taki den ferteri lei fu kori unu, soso fu man kisi wini gi densrefi. Ma sensi owruten Gado ben taki kba sortu strafu den o kisi èn a strafu dati de na pasi e kon. Iya, den o dede seiker.

4 Gado no libi den engel di ben sondu sondro fu strafu den, ma a trowe den go na ini Tartarus.* A keti den poti na ini dipi dungru* pe den o tan teleki den kisi den strafu. 5 Gado no ben libi den sma fu a ten fu Noa tu sondro fu strafu den. Ma di a tyari wan bigi frudu kon na tapu na ogri grontapu dati, dan a kibri Noa di ben e preiki gi sma taki den musu libi soleki fa Gado wani.* A kibri en makandra nanga seibi tra sma. 6 A no libi den sma fu den foto Sodom nanga Gomora sondro fu strafu den tu. A bron den foto disi krinkrin teleki den tron asisi. Disi na wan warskow* di e sori san o psa nanga den sma di no e lespeki Gado. 7 Ma a ben ferlusu a ret’ati man Lot. A ben hati Lot fu si fa den sma drape ben e tyari densrefi. Den ben e du ogri sondro fu syen* èn den no ben e span nanga noti. 8 Di a ret’ati man Lot ben e libi na den mindri, a ben e sari ibri dei te a ben yere èn si den ogri di den ben e du. 9 Dus te tesi e miti den sma di e dini Yehovah* fayafaya, dan a sabi fa fu ferlusu den. Ma a o libi den ogrisma teleki a krutudei doro fu kiri den. 10 A o du dati spesrutu nanga den sma di wani doti a skin fu trawan* èn di no abi nowan lespeki gi den sma di e tiri den.

Fu di den sma disi no abi bisi nanga trawan èn den e du nomo san den wani, meki den no e frede fu taki ogri fu den sma di musu kisi grani.* 11 Tòg den engel di tranga moro den sma disi èn di abi makti moro den no e kosi den falsi leriman disi, fu di den abi lespeki gi* Yehovah.* 12 Ma den man disi e taki ogri fu sani di den no sabi. Den e du leki meti di no man denki èn di meki fu sma fanga den èn kiri den. Den ogri di den e du o meki taki den o kisi pori. 13 Iya, den o pina fu den ogri di den srefi du.

Den abi takru lostu èn den e du den sani disi na deiten srefi. Na dati e gi den prisiri. Te den kon na den fesa fu unu, den de nomonomo fu kori trawan nanga den falsi leri fu den. Den de leki flaka di e pori a gemeente. 14 Den e suku ala sortu fasi fu huru* èn den no man tapu fu du sondu. Den e kori den sma di abi wan swaki bribi.* Soso gridi de na ini den ati.* Gado o strafu den. 15 Den lasi pasi fu di den gwe libi a reti pasi. Den waka a pasi fu Bileam, a manpkin fu Beor, di ben angri fu kisi pai gi na ogri di a ben o du. 16 Ma a kisi pir’ai fu di a no ben e du san bun. Buriki no man taki. Ma na wan buriki ben musu taki nanga wan libisma sten fu tapu a profeiti disi fu du a don sani di a ben wani du.

17 Den sma disi de leki peti sondro watra èn den de leki wolku di wan tranga winti e wai gwe. A moro dungru presi di de e wakti den, 18 bika den e taki wan lo kfalek sani di no wani taki noti. Den e gi trawan dek’ati fu abi takru lostu neleki den èn den e du ogri sondro fu syen.* Na so den e kori den sma di ben hari densrefi puru no so langa ete na mindri den trawan di e libi wan sondu libi. 19 Den e pramisi den sma disi taki den o kon fri, ma den srefi na srafu fu sondu. Bika ala sma di e meki wan trawan basi en, na wan srafu fu a sma dati.* 20 Den finfini tori di den kon sabi fu wi Masra nanga Ferlusuman Yesus Krestes yepi den fu kmoto na ini a morsu libi fu grontapu. Ma efu den go du den srefi sani dati baka èn den sani dati e basi den, dan a fasi fa den de now ogri moro leki fa den ben de fosi. 21 A ben o moro bun gi den efu den no ben kon sabi a reti pasi finfini. Iya, a ben o moro bun efu den no ben kisi a santa wet, bika tòg den no e du san a wet e taki. 22 A sani di psa nanga den de soleki fa wan odo e taki: „A dagu drai go baka fu nyan en eigi braak èn na agu di ben wasi kba go lolo baka na ini a tokotoko.”