Yesaya
52 Wiki! Wiki èn kon tranga, Sion!
Weri yu moi krosi, yu santa foto Yerusalem!
Bika noiti moro wan sma di no besnèi noso di no krin, o kon na ini yu.
2 Seki a doti puru na yu skin, dan yu opo go sdon, Yerusalem.
Puru den banti di tai na yu neki, yu umapkin fu Sion di ben de na strafu.
3 Bika Yehovah taki:
„Mi no ben kisi moni di mi seri unu
èn mi o bai unu baka sondro fu pai wan moni.”
4 A Moro Hei Masra Yehovah taki:
„Biginbigin mi pipel ben go na Egepte fu tan drape leki trakondre sma.
Bakaten Asiria ben kwinsi den aladi den no du noti.”
5 „Dan san mi musu du dya?”, na so Yehovah taki.
„Na fu soso sma teki mi pipel tyari gwe.
Den sma di e basi den e meki bigi fu dati”, na so Yehovah taki,
„èn heri dei den e meki spotu nanga mi nen.
6 Dati meki mi pipel o sabi mi nen.
Dati meki den o sabi na a ten dati taki na mi na a sma di taki disi.
Iya, na mi srefi taki so!”
7 A moi fu si den futu di e waka tapu den bergi fu tyari bun nyunsu kon,
den futu fu a sma di e tyari wan boskopu fu freide.
A e tyari bun nyunsu fu wan moro bun sani
èn a e ferteri taki ferlusu kon.
A e taigi Sion: „Yu Gado tron Kownu!”
8 Arki! Den waktiman fu yu opo den sten.
Leki wán man den e bari fu prisiri,
bika nanga den eigi ai den e si* fa Yehovah e tyari den sma fu Sion kon baka.
9 Meki ala den brokopresi fu Yerusalem breiti èn bari fu prisiri leki wán man,
bika Yehovah trowstu en pipel èn a bai Yerusalem baka.
10 Yehovah meki ala den pipel si en santa krakti.
Te na den moro fara presi fu grontapu, sma o si fa wi Gado e tyari ferlusu kon.*
11 Un drai gwe! Drai gwe èn kmoto drape. No fasi nowan sani di no krin!
Kmoto drape. Un hori unsrefi krin,
un sma di e tyari den wrokosani fu na oso fu Yehovah.
12 Te unu o gwe, unu no o bruya.
Unu no o abi fu lon gwe.
Bika Yehovah o waka na un fesi
èn a Gado fu Israel o de na un baka fu kibri unu.
13 Luku! Mi futuboi o du sani nanga koni.
A o de wan heihei sma,
a o abi biginen èn sma o sori bigi lespeki gi en.
14 Furu sma ben luku en nanga opo mofo,
fu di en fesi ben pori èn a no ben gersi nowan tra man.
A ben kenki so te, taki a no ben gersi nowan libisma.
15 Na so a o meki furu pipel skreki.
Na fu en ede, den kownu no o man taki noti,*
bika den o si san nowan sma ben ferteri den
èn den o poti prakseri na san den no ben yere ete.