A fosi brifi fu Yohanes
4 Mi lobi brada nanga sisa, no bribi ala boskopu di gersi leki den kon fu Gado.* Ma ondrosuku den boskopu* disi fu si efu den kon fu Gado trutru, bika furu falsi profeiti de na grontapu.
2 Disi na fa unu kan sabi efu wan boskopu e kon fu Gado: Te wan sma e taki dati Yesus Krestes kon na grontapu leki wan libisma, dan a sani di a taki kon fu Gado. 3 Ma te wan sma e taki dati Yesus no kon na grontapu leki libisma, dan a sani di a taki no kon fu Gado. Unu ben yere taki a feanti fu Krestes* ben o taki den sani disi èn now sma na grontapu e taki den sani disi kba.
4 Mi pkin, unu na fu Gado èn unu wini den falsi profeiti disi, bika Gado di de wán nanga unu, bigi moro Didibri di de wán nanga grontapu. 5 Den na fu grontapu. Dati meki den e taki grontapu sani èn grontapu e arki den. 6 Wi na fu Gado. A sma di kon sabi Gado e arki wi. A sma di no de fu Gado no e arki wi. Na so wi kan sabi efu a sani di a sma e taki e kon fu Gado, noso efu a no e kon fu Gado.
7 Lobi brada nanga sisa, meki wi tan lobi makandra, bika lobi e kon fu Gado. Ala sma di lobi trawan na wan pkin fu Gado èn a sabi Gado. 8 A sma di no lobi trawan no leri sabi Gado, bika Gado na lobi. 9 Disi na fa Gado sori taki a lobi wi: Gado seni en wan-enkri Manpkin kon na grontapu, so taki a kan yepi wi fu kisi libi. 10 Dus a no fu di wi ben lobi Gado, meki a seni en Manpkin kon. Ma na fu di en ben lobi wi, meki a seni en Manpkin kon leki wan ofrandi di e tapu den sondu fu wi èn di e meki wi kon bun baka nanga Gado.
11 Mi lobi brada nanga sisa, efu disi na fa Gado lobi wi, dan wi srefi musu lobi makandra tu. 12 Noiti ete wan sma si Gado. Efu wi tan lobi makandra, dan Gado o de nanga wi èn wi o lobi trawan neleki fa Gado wani taki wi du dati. 13 Wi sabi taki wi de wán nanga en èn taki a de wán nanga wi fu di a gi wi a yeye fu en. 14 Boiti dati, wi srefi si taki a P’pa seni en Manpkin kon leki ferlusuman fu grontapu èn wi e ferteri sma dati. 15 Efu wan sma e taki krin dati Yesus Krestes na a Manpkin fu Gado, dan Gado de wán nanga a sma dati èn a de wán nanga Gado. 16 Wi srefi kon sabi taki Gado lobi wi èn wi e bribi dati tu.
Gado na lobi èn efu wan sma tan sori lobi, dan a de wán nanga Gado èn Gado de wán nanga en. 17 Te wi e sori trutru lobi, dan wi no o frede* na a krutudei, bika neleki fa Krestes de, na so wi de tu na ini a grontapu disi. 18 Te wan sma abi lobi, dan a no e frede. Trutru lobi e puru* frede, bika frede e tapu sma fu du sani. Iya, a sma di e frede, no man sori trutru lobi. 19 Ma wi abi lobi fu di na Gado fosi ben lobi wi.
20 Efu wan sma e taki: „Mi lobi Gado”, ma tòg a e teige en brada, dan a sma dati na wan leiman. Bika a sma di no lobi en brada di a man si, no man lobi Gado di a no man si. 21 Disi na a wet di wi kisi fu en: A sma di lobi Gado musu lobi en brada tu.