A fosi brifi gi den Korentesma
4 Wi wani taki sma si wi leki futuboi fu Krestes èn leki sma di kisi a wroko fu meki sma kon sabi den santa kibritori fu Gado. 2 We, fu di wi na futuboi, meki wi musu du wi wroko bun. 3 Mi no abi trobi efu unu wani krutu mi noso efu sma wani tyari mi na fesi krutu. Fu taki en leti, mi no e krutu misrefi tu. 4 Bika mi abi wan krin konsensi na ini ala sani. Tòg dati no wani taki dati mi na wan ret’ati sma. Ma a sma di e ondrosuku mi na Yehovah.* 5 Fu dati ede un no musu krutu nowan sani fosi a ten doro. Wakti teleki Masra kon. Na en o tyari kon na krin san kibri na ini a dungru èn san de na ini sma ati. Dan Gado o prèise ibri sma di warti fu kisi prèise.
6 We brada nanga sisa, mi nanga Apolos de leki wan eksempre gi unu so taki unu kan leri a prenspari sani disi: „No du sani di no skrifi na ini den Santa Buku.” Dan unu no o kisi bigifasi èn unu no o feni a wan sma bun moro a trawan. 7 Fu san ede yu denki taki yu bun moro wan trawan? Iya, san yu abi di yu no kisi? We efu na kisi yu kisi en, dan fu san ede yu e meki bigi leki yu no kisi en?
8 Unu abi kba san unu wani, a no so? Unu gudu kba tòg? Unu bigin tiri kba leki kownu sondro wi, iya tòg? Mi winsi trutru taki unu ben bigin tiri leki kownu, so taki wi tu ben o tiri makandra nanga unu leki kownu. 9 Gi mi a gersi leki Gado tyari wi, di de apostel, leki den lasti sma kon na dorosei fu kisi dedestrafu. A poti wi na wan presi* pe ala sma kan si wi, èn grontapu, den engel nanga libisma e luku san o psa nanga wi. 10 Wi na donman fu di wi na bakaman fu Krestes, ma unu e si unsrefi leki koniman fu di unu na bakaman fu Krestes. Wi swaki, ma unu tranga. Sma e gi unu grani, ma den no e lespeki wi. 11 Te now ete wi de nanga angri èn watra e kiri wi. Wi no abi nofo krosi fu weri,* sma e fon wi,* wi no abi wan presi fu tan 12 èn wi e wroko tranga nanga wi anu. Te sma e kosi wi, wi e blesi den. Te sma e ferfolgu wi, wi e hordoro nanga pasensi. 13 Te sma e gi wi pornen, wi e piki na wan switi fasi. Teleki now sma e si wi leki a doti* fu grontapu èn den no e lespeki wi.
14 Mi no e skrifi den sani disi fu gi unu syen, ma fu gi unu rai leki mi lobi pkin. 15 Bika awinsi unu abi 10.000 leriman di e leri unu fu Krestes, tòg unu no abi furu p’pa. Ma mi tron unu p’pa fu di mi tyari a bun nyunsu fu Krestes Yesus gi unu. 16 Dati meki mi e begi unu fu teki na eksempre fu mi. 17 Dati meki mi e seni Timoteyus kon na unu, fu di mi lobi en leki mi pkin èn a e wroko gi Masra nanga en heri ati. A o memre unu fa mi e du sani te mi e du a wroko fu Krestes Yesus èn fa mi e gi sma leri na ala presi na ini ibri gemeente.
18 Son sma e meki bigi èn den e taki: „A no o kon.” 19 Ma efu Yehovah* wani, mi o kon heri esi na unu. Mi no o luku san den sma di e meki bigi abi fu taki, ma mi o luku efu den abi a krakti fu Gado. 20 Bika a no den sani di wan sma e taki e sori taki a e bribi na ini Gado Kownukondre, ma na te a e meki a yeye fu Gado tiri en libi. 21 San unu feni moro bun? Mi musu kon na unu nanga wan wipi, noso nanga lobi èn nanga switifasi?