Gi Titus

3 Tan memre den fu saka densrefi na ondro gran lanti èn na ondro den sma di abi makti. Den musu du san lanti e taki èn den musu de klarklari fu du iniwan bun wroko. 2 Den no musu taki ogri fu nowan sma èn den no musu lobi meki trobi. Ma den musu fiti densrefi makriki na trawan èn den musu sori safr’ati gi ala sma. 3 Bika wan ten ben de taki wisrefi ben e du dondon sani, wi ben trangayesi èn sma ben e kori wi. Ala sortu lostu ben e basi wi èn na soso prisiri wi ben e prakseri. Wi ben e du ala sortu ogri èn wi ben e dyarusu. Wi ben e du groskin sani èn wi ben e teige makandra.

4 Ma Gado, wi Ferlusuman, sori taki a abi bun-ati èn taki a lobi libisma. 5 (A no fu di wi ben du bun sani meki a du dati, ma fu di a abi sar’ati.) A krin* wi fu kisi wan nyun libi èn nanga en santa yeye a meki wi kon nyun. Na so a ferlusu wi. 6 Nanga yepi fu Yesus Krestes, wi Ferlusuman, a gi wi a yeye fu en bogobogo. 7 Gado du disi fu meki wi tron sma di abi a howpu fu kisi têgo libi, soleki fa a ben pramisi wi. Na fu di a sori wi bun-ati, meki wi o kisi a têgo libi disi, baka te a taki dati wi na ret’ati sma.

8 Yu kan bribi den sani disi. Mi wani taki ala ten yu musu ferteri sma taki den tori disi tru, so taki den sma di ben e bribi kba na ini Gado kan tan meki muiti fu du bun. Den sani disi bun èn den e tyari wini kon gi sma.

9 Ma no go na ini ala sortu dondon taktaki. No lasi ten fu go luku suma na den afo fu yu. No go hartaki nanga sma èn no go meki trobi fu a Wet, bika den sani disi no e tyari wini kon èn den de fu soso. 10 Efu wan sma e kon nanga falsi leri èn yu bari* en wán leisi èn baka dati ete wan leisi, dan yu no musu bemui nanga en moro. 11 Yu sabi taki so wan sma gwe libi a pasi. A e sondu èn a e krutu ensrefi.

12 Te mi seni Artemas noso Tikikus kon na yu, dan yu musu du ala muiti fu kon na mi na Nikopolis, bika na drape mi besroiti fu tan na a kowru ten fu a yari. 13 Yu musu gi Seinas, di sabi a Wet heri bun, nanga Apolos, ala sani di den o abi fanowdu te den o de na pasi. 14 Ma meki den brada nanga sisa fu wi leri tu fu tan du bun, so taki den kan yepi te nowtu de. Na so den o tan du bun sani.

15 Ala den sma di de nanga mi e seni taki yu odi. Gi ala den sma di lobi wi èn di de na bribi, odi gi mi.

Meki Gado sori un alamala bun-ati.