Wan Openbaring gi Yohanes

6 Mi si di a Pkin Skapu puru wan fu den seibi stampu* èn mi yere wan fu den fo kerub-engel taki nanga wan sten di ben de leki a b’bari fu dondru: „Kon!” 2 Ne mi si wan weti asi. A sma di ben e sdon na en tapu ben abi wan bo. A kisi wan kroon èn a hari go feti nanga den feanti fu en teleki a wini den alamala.

3 Di a Pkin Skapu puru a di fu tu stampu, mi yere a di fu tu kerub-engel taki: „Kon!” 4 Ne wan tra asi kon di ben redi leki faya. A sma di ben e sdon na en tapu ben kisi primisi fu puru freide na grontapu, so taki sma ben o kiri makandra. A ben kisi wan bigi fet’owru tu.

5 Di a puru a di fu dri stampu, mi yere a di fu dri kerub-engel taki: „Kon!” Ne mi si wan blaka asi èn a sma di ben e sdon na en tapu ben abi wan wegi na ini en anu. 6 Dan mi yere wan sani di ben gersi wan sten. A ben kmopo na mindri den fo kerub-engel. A taki: „Wán kilo tarwe gi wán dei moni èn dri kilo groto* gi wán dei moni.* No meki noti psa nanga na olèif-oli nanga a win.”

7 Di a puru a di fu fo stampu, mi yere a sten fu a di fu fo kerub-engel taki: „Kon!” 8 Ne mi si wan asi di abi wan sikisma kloru. A sma di ben e sdon na en tapu ben nen Dede. Grebi* ben e kon leti na en baka. Den ben kisi makti fu tiri a di fu fo pisi fu grontapu. Na so den ben kan kiri sma nanga wan langa fet’owru, nanga angriten èn nanga takru siki. Den ben kan meki den ogri meti fu grontapu kiri sma tu.

9 Di a puru a di fu feifi stampu, dan na a futu fu na altari mi si a brudu fu den sma di den kiri fu di den ben e du san a wortu fu Gado e taki èn fu di den ben e preiki a wortu gi sma. 10 Den ben taki nanga wan tranga sten: „Moro Hei Masra di santa èn di tru, o langa yu o wakti fu krutu den sma na grontapu di kiri wi èn o ten yu o strafu den?” 11 Ne Masra gi ibriwan fu den wan langa weti krosi èn a taigi den: „Un wakti pkinso moro langa teleki mi tyari ala den brada fu unu kon na wán di de srafu neleki unu. Dyonsro sma o kiri den tu neleki fa den ben kiri unu.”

12 Dan mi si taki a puru a di fu siksi stampu. Ne wan bigi gronseki kon, a son kon blaka leki rowkrosi* èn a heri mun ben kon redi leki brudu. 13 Den stari na hemel ben fadon kon na grontapu neleki te wan tranga winti e seki wan figabon èn a trowe den grun froktu na gron. 14 Hemel skoifi gwe na wan sei neleki te sma e lolo wan bukulolo tapu èn ibri bergi nanga ibri èilanti kmopo na en presi. 15 Dan den kownu fu grontapu, den heihei man, den legre-edeman, den guduman, den tranga man, ibri srafu nanga ibri fri sma go kibri na ini den bergi-olo èn na mindri den bigi bergiston. 16 Den ben e tan taigi den bergi nanga den bigi ston: „Fadon kon na wi tapu èn kibri wi, so taki a sma di e sdon na tapu a kownusturu no man si wi. Kibri wi tu gi a bigi atibron fu a Pkin Skapu. 17 Bika a bigi dei fu a bigi atibron fu den doro. Suma o man tan na libi?”