Gi den Romesma

10 Mi brada, nanga mi heri ati mi e winsi taki den kisi ferlusu trutru èn mi e begi Gado fu dati. 2 Bika mi kan taki fu den taki den de fayafaya fu dini Gado, ma den no sabi san na a yoisti fasi fu dini en. 3 Den no sabi san e meki taki Gado si wan sma leki wan ret’ati sma. Dati meki den no e du sani soleki fa Gado wani, ma den e du san den srefi wani fu sori taki den na ret’ati sma. 4 Krestes tyari wan kba kon na a Wet. Dati meki ibri sma di abi bribi, kan tron wan sma di Gado e si leki wan ret’ati sma.

5 Moses skrifi taki wan sma kan du san reti soleki fa a Wet e taki. A taki: „A sma di e du den sani disi o tan na libi.” 6 Ma Gado Buku e taki tu dati na bribi kan meki wan sma tron wan ret’ati sma. A e taki: „No prakseri na ini yu ati: ’Suma o opo go na hemel?’ Sobun, suma o go na hemel fu meki Krestes kon na grontapu? 7 Noso, ’Suma o saka go na ini a dipi peti di no abi gron?’ Sobun, suma o go na ini a dipi peti fu gi Krestes libi baka?” 8 Ma san Gado Buku e taki? A e taki: „A boskopu de krosbei fu unu. A de na ini un eigi mofo èn na ini un eigi ati.” Dati na a „boskopu” di wi e bribi èn di wi e preiki. 9 Bika efu unu e ferteri sma a ’boskopu di de na ini un eigi mofo’ taki Yesus na Masra èn efu unu e bribi na ini un ati taki Gado gi en libi baka, dan unu o kisi ferlusu. 10 Bika te wan sma e bribi na ini en ati, dan Gado e si en leki wan ret’ati sma. Ma te wan sma e ferteri trawan taki a e bribi, dan dati o meki taki a o kisi ferlusu.

11 Bika Gado Buku e taki: „Nowan sma di e bribi na ini en o kisi syen.” 12 Nowan difrenti de na mindri Dyu nanga Grikisma, bika den alamala abi a srefi Masra. Ala sma di e kari en nen a e gi sani bogobogo. 13 Bika „ibri sma di e kari a nen fu Yehovah* o kisi ferlusu.” 14 Ma fa den o kari en efu den no e bribi na ini en? Fa den o bribi na ini en efu den no yere fu en? Fa den o yere fu en efu nowan sma no preiki gi den? 15 Fa den o preiki efu wan sma no seni den go? A de soleki fa Gado Buku taki: „A moi fu si den futu di e waka na tapu den bergi fu tyari bun nyunsu fu wan moro bun sani!”

16 Ma tòg a no ala sma gi yesi na a bun nyunsu. Bika Yesaya aksi: „Yehovah,* suma e bribi a sani di den yere fu wi?”* 17 Sobun, wan sma e kisi bribi baka te a yere a boskopu. Wan sma e yere a boskopu te wan trawan taki fu Krestes. 18 Ma disi wani taki dati na yere den Israelsma no yere a boskopu? Fu taki en leti, ’na ala sei fu grontapu sma yere den èn te na den moro farawe presi fu grontapu, sma yere a boskopu fu den’. 19 Ma disi wani taki dati na sabi den Israelsma no ben sabi? Moses fosi ben taki: „Mi o meki unu dyarusu, fu di mi o teki sma di no de fu a pipel Israel. Mi o meki un ati bron srefsrefi, fu di mi o teki wan pipel di no abi ferstan.” 20 Ma Yesaya ben taki tu nanga furu dek’ati: „Den sma di no ben suku mi, feni mi. Den sma di no ben aksi fu mi, kon sabi suma na mi.” 21 Ma fu Israel a ben taki: „Heri dei mi langa mi anu gi wan pipel di trangayesi èn di e hartaki nanga mi.”