Gi den Galasiasma
1 Disi na wan brifi di mi, Paulus, skrifi. Mi na wan apostel. A no libisma poti mi èn a no libisma gi mi a grani disi. Ma na Yesus Krestes èn Gado a P’pa di gi en libi baka, gi mi a grani disi. 2 Mi nanga ala den brada di de nanga mi, e seni taki ala den gemeente fu Galasia odi.
3 Meki Gado wi P’pa èn Masra Yesus Krestes sori unu bun-ati èn meki den sorgu taki ala sani waka bun gi unu. 4 Krestes gi en libi fu puru den sondu fu wi, so taki a kan ferlusu wi fu na ogri grontapu* disi, soleki fa Gado wi P’pa wani. 5 Na en musu kisi glori fu têgo, iya, fu ala ten. Amen.
6 A e ferwondru mi taki nownow kba unu e drai baka gi* Gado di kari unu nanga a bun-ati fu Krestes èn taki unu bigin arki wan tra sortu bun nyunsu. 7 Ma nowan tra bun nyunsu no de. Tòg son sma e tyari bruya kon na un mindri èn den wani drai a bun nyunsu di abi fu du nanga Krestes. 8 Fluku musu kon na tapu a sma di ferteri unu wan bun nyunsu di de tra fasi leki a bun nyunsu di wi ferteri unu, awinsi na wisrefi kon nanga en noso wan engel fu hemel. 9 Wi ben taki en kba èn now mi e taki en ete wan leisi: Efu wan sma e ferteri unu wan bun nyunsu di de tra fasi leki san unu e bribi kba, dan fluku musu kon na en tapu.
10 Suma musu feni mi bun? Libisma noso Gado? Na libisma mi wani plisi? Efu mi ben e plisi libisma ete, dan mi no ben o de wan srafu fu Krestes. 11 Brada nanga sisa, mi wani meki unu sabi taki a bun nyunsu di mi ferteri unu a no wan sani fu libisma. 12 A no libisma gi mi en èn a no den leri mi, ma na Yesus Krestes tyari en kon na krin gi mi.
13 A no de fu taki dati unu yere fa mi ben tyari misrefi fosi na ini a Dyu bribi. Na wan ogr’ati fasi mi ben e ferfolgu a gemeente fu Gado èn mi ben e pruberi fu puru en na pasi. 14 Mi ben go na fesi na ini a Dyu bribi moro leki furu fu mi speri na mindri mi pipel, bika mi ben du furu muiti fu hori den gwenti fu den afo fu mi. 15 Ma Gado di meki mi gebore èn di kari mi fu di a abi bun-ati, ben feni en bun 16 fu gebroiki mi fu ferteri den trakondre sma* a bun nyunsu, so taki den kan sabi en Manpkin. Di a gebroiki mi fu du dati, mi no go direk na libisma fu suku rai. 17 Mi no go tu na Yerusalem na den wan di ben de apostel fosi mi, ma mi go na Arabia, dan mi drai kon baka na Damaskus.
18 Baka dri yari mi go na Yerusalem fu go luku Seifas,* dan mi tan 15 dei nanga en. 19 Ma mi no si nowan fu den tra apostel, boiti Yakobus, a brada fu Masra. 20 Gado srefi e si taki a no lei mi e skrifi unu.
21 Baka dati mi go na den kontren fu Siria nanga Silisia. 22 Ma den gemeente fu Krestes na ini Yudea no ben sabi mi ete. 23 Den ben yere sma e taki nomo: „A man di ben e ferfolgu wi e preiki a bun nyunsu now fu a bribi di a ben wani puru na pasi.” 24 Ne den bigin gi Gado glori fu mi ede.