A fosi brifi gi den Korentesma
12 Brada nanga sisa, mi wani taki un sabi den difrenti sani di a yeye kan meki sma du. 2 Unu sabi taki di unu no ben de Kresten, unu ben e anbegi falsi gado di no man taki èn unu ben e du ala san den ben wani taki unu du. 3 Fu dati ede mi wani fu unu sabi, taki te wan sma e taki nanga yepi fu a yeye fu Gado, dan a sma dati noiti o taki: „Fluku de na tapu Yesus!” Nowan sma kan taki tu: „Yesus na Masra!” efu a santa yeye no meki a taki dati.
4 We, sma man du difrenti sani, ma na wán yeye nomo de. 5 Difrenti wroko de di wi e du gi Gado, ma tòg na wán Masra nomo de. 6 Difrenti wroko de,* ma tòg na a srefi Gado e yepi ala sma fu du ala den wroko disi. 7 Ma den sani di a santa yeye e meki ibriwan fu den du, de krin fu si èn Gado e gi den a yeye disi fu du bun. 8 Fu eksempre, a santa yeye e meki wan sma taki nanga koni èn a srefi yeye e meki wan tra sma taki nanga sabi. 9 A yeye e gi wan sma bribi èn a srefi yeye e gi wan tra sma a krakti fu meki sma kon betre. 10 A wan sma man du bigi wondru èn wan trawan man taki profeititori. Son sma kisi a koni fu man si krin efu den sani di wan sma taki kmoto fu Gado trutru. Tra sma man taki difrenti tongo èn trawan man ferklari san sma e taki na ini tra tongo. 11 Ma na a srefi yeye e meki den sma du ala den sani disi èn ibri sma man du den sani disi soleki fa Gado wani.
12 A skin de wán, ma a abi furu pisi. Aladi den furu, tòg den na wán skin. Na so a de tu nanga Krestes. 13 Nanga yepi fu wán yeye wi alamala dopu kon tron wán skin, awinsi wi na Dyu noso Grikisma èn awinsi wi na srafu noso friman. Wi alamala kisi wán yeye fu dringi.
14 Iya, a skin no abi wán pisi nomo, ma a abi furu pisi. 15 Efu a futu ben o taki: „Mi a no wan anu èn dati meki mi no de wan pisi fu a skin”, dan dati no wani taki dati a no de wan pisi fu a skin. 16 Efu a yesi ben o taki: „Mi a no wan ai èn dati meki mi no de wan pisi fu a skin”, dan dati no wani taki dati a no de wan pisi fu a skin. 17 Efu a heri skin ben de wan ai, dan fa yu ben o man yere? Efu a heri skin ben de wan yesi, dan fa yu ben o man smeri? 18 Ma Gado poti ibri pisi fu a skin pe den musu de soleki fa en wani.
19 Efu ala den pisi ben de a srefi, dan yu ben o kari en wan skin? 20 Ma now furu pisi de èn tòg den de wán skin nomo. 21 Na ai no kan taigi na anu: „Mi no abi yu fanowdu” èn na ede no kan taigi den futu: „Mi no abi unu fanowdu.” 22 Na presi fu dati, den pisi fu a skin di gersi den moro swakiwan, na den wan di wi abi fanowdu. 23 Na den pisi fu a skin di wi e si leki den wan di no de so prenspari, wi e gi moro grani. Sobun, na den pisi fu wi skin di no moi so, wi e sorgu moro bun. 24 Ma den pisi fu wi skin di moi kba no abi noti fanowdu. Tòg Gado meki a skin na so wan fasi taki a pisi di no de so prenspari, e kisi moro grani. 25 Na so pratifasi no de na ini a skin, ma den pisi fu a skin musu sorgu bun gi makandra. 26 Efu wán pisi fu a skin e pina, ala den tra pisi e pina tu. Noso efu wán pisi fu a skin e kisi glori, dan ala den tra pisi e prisiri tu.
27 Unu na a skin fu Krestes èn ibriwan fu unu na wan pisi fu en skin. 28 Gado poti difrenti sma na ini a gemeente. Na a fosi presi a poti apostel, na a di fu tu presi profeiti, na a di fu dri presi leriman. Boiti dati yu abi den sma di e du wondru, den sma di kisi a krakti fu meki trawan kon betre, den sma di man yepi trawan, den sma di man teki fesi nanga den sma di man taki difrenti tongo. 29 Na ala sma na apostel? Na ala sma na profeiti? Na ala sma na leriman? Na ala sma e du wondru? 30 Na ala sma kisi a krakti fu meki sma kon betre? Na ala sma man taki tra tongo? A no ala sma man ferklari san sma taki na ini tra tongo, a no so? 31 Ma tan du muiti fu man du den bigi sani disi di a yeye e meki sma du. Tòg mi o sori unu san na a moro bun fasi fu libi.