A fosi brifi gi den Korentesma

14 Un musu du ala muiti fu sori lobi. Un musu du muiti tu fu man du den sani di a yeye e meki sma du. Meki muiti spesrutu fu kisi a koni fu man taki profeititori. 2 A sma di e taki tra tongo, no e taki nanga libisma, ma a e taki nanga Gado. Nowan sma e ferstan en aladi a e taki fu santa kibritori nanga yepi fu a yeye. 3 Ma a sma di e taki profeititori, e tranga a bribi fu trawan, a e gi den dek’ati èn a e trowstu den nanga den sani di a e taki. 4 A sma di e taki tra tongo e tranga en eigi bribi, ma a sma di e taki profeititori, e tranga a bribi fu wan gemeente. 5 Mi ben e winsi taki un alamala ben e taki tra tongo, ma mi feni en moro bun efu unu e taki profeititori. Ja, a sma di e taki profeititori, bigi moro a sma di e taki tra tongo. Bika efu a no e vertaal den sani di a e taki, dan a bribi fu a gemeente no o kon tranga. 6 Brada nanga sisa, efu mi ben o kon taigi unu sani na ini tra tongo, dan sortu bun mi ben o du gi unu? Efu mi wani yepi unu, dan mi musu tyari sani kon na krin, mi musu taki nanga sabi, mi musu taki wan profeititori noso mi musu gi leri, a no so?

7 Na so a de nanga sani soleki froiti noso harpu. Den no abi libi, ma yu kan yere te wan sma e prei den. Ma efu wan sma no e prei a froiti noso a harpu bun, dan fa yu o sabi sortu poku a e prei? 8 Efu a trompet no e piki krin, dan suma o sreka ensrefi fu go na feti? 9 Na so a de nanga unu tu. Te unu e gebroiki un mofo fu taki sani di muilek fu ferstan, dan fa sma o sabi san unu e taki? Fu taki en leti, unu o taki fu soso. 10 A tru taki furu difrenti tongo de na grontapu, ma tòg sma kan ferstan ibriwan fu den tongo disi. 11 Efu mi no e ferstan san wan sma e taki, dan a sma dati o de leki wan trakondre sma gi mi èn mi o de leki wan trakondre sma gi en. 12 Na so a de tu nanga unu di e angri fu du den sani di a yeye e meki sma du. Un musu du muiti so taki Gado kan gi unu a yeye fu man du furu fu den sani disi. Na so unu o tranga a gemeente.

13 Fu dati ede, meki a sma di e taki wan tra tongo begi Gado fu yepi en fu man vertaal san a taki na ini a tongo dati. 14 Bika efu mi e begi na ini tra tongo, dan na a yeye e meki mi begi. Ma misrefi no e ferstan san mi e taki. 15 Fa a musu de dan? Mi o begi fu di a yeye e meki mi du dati, ma mi o du en na wan fasi di sma man ferstan. Mi o singi prèisesingi fu di a yeye e meki mi du dati, ma mi o singi tu na wan fasi di sma man ferstan. 16 Bika efu a yeye e meki unu prèise Gado, dan fa a sma di no e ferstan ala sani o man taki „Amen” te unu e taki Gado tangi? Bika a sma dati no sabi san unu e taki. 17 A tru taki unu e taki Gado tangi na wan bun fasi, ma dati no e tranga a bribi fu tra sma. 18 Mi e taki Gado tangi taki mi man taki moro tongo leki un alamala. 19 Tòg a ben o moro bun fu taki feifi wortu nomo di sma na ini a gemeente e ferstan, na presi fu taki 10.000 wortu na ini wan tongo di sma no e ferstan. Na so sma ben o man leri wan sani fu den sani di mi e taki.

20 Brada nanga sisa, un no musu kon de leki yongu pkin na ini a fasi fa unu e denki. Ma te a abi fu du nanga ogridu, dan un musu de leki yongu pkin. Un musu kon de leki bigisma na ini a fasi fa unu e denki. 21 Na ini a Wet skrifi: „’Mi o taki nanga a pipel disi na ini a tongo fu tra pipel èn nanga a mofo fu trakondre sma, ma tòg den no o wani arki mi’, na so Yehovah* taki.” 22 Fu dati ede, te wan sma e taki na ini tra tongo, dan dati na wan bewijs gi den sma di no e bribi, a no gi den sma di e bribi. Na a tra sei, te wan sma e taki profeititori, dan dati na gi den sma di e bribi, a no gi den sma di no e bribi. 23 Sobun, efu a heri gemeente e kon makandra na wan presi èn den alamala e taki tra tongo, dan san o psa te sma di no e ferstan ala sani noso sma di no e bribi, e kon na insei? Den o taki dati unu law, a no so? 24 Ma efu un alamala e taki profeititori èn wan sma di no e bribi noso wan sma di no e ferstan ala sani, e kon na insei, dan den sani di un alamala e taki o de leki wan pir’ai gi en. San a yere o meki taki a go ondrosuku ensrefi finfini. 25 Den sani di kibri na ini en ati o kon na krin èn a o saka kindi boigi go na gron fu anbegi Gado. A o taki: „Gado de trutru na un mindri.”

26 San un musu du dan, brada nanga sisa? Te unu e kon makandra, dan wan sma e singi fu prèise Gado, wan trawan e gi leri, wan tra sma abi wan boskopu di a kisi fu Gado, wan trawan baka e taki wan tra tongo èn wan tra sma man vertaal èn ferklari sani. Meki ala sani psa na wan fasi di e gi trawan dek’ati. 27 Efu sma de di e taki na ini tra tongo, dan meki tu noso dri sma nomo du dati èn den musu taki wan-fru-wan. Ma meki wan sma vertaal san den e taki. 28 Ma efu nowan sma de di man vertaal san den e taki, dan meki den tan tiri na ini a gemeente èn meki den taki na ini den ati nanga Gado. 29 Boiti dati, meki tu noso dri profeiti taki èn meki den trawan luku efu den e ferstan san den taki. 30 Ma efu wan trawan kisi wan boskopu fu Gado, dan a sma di ben e taki musu tan tiri. 31 Bika un alamala kan taki profeititori, ma un musu taki wan-fru-wan, so taki un alamala kan leri wan sani èn kan kisi dek’ati. 32 Den profeiti musu gebroiki a koni di a yeye gi den fu taki profeititori, na wan bun fasi. 33 Bika Gado na wan Gado fu freide. A no e du sani bruyabruya.

Na ini ala den gemeente fu den santawan a de so taki 34 den umasma musu tan tiri na ini den gemeente, bika den no abi primisi fu taki. Na presi fu dati den musu saka densrefi, soleki fa a Wet fu Gado e taki tu. 35 Efu den wani sabi wan sani, dan meki den aksi den masra na oso, bika a de wan syen gi wan umasma fu taki nanga a gemeente.

36 Na fu unu a wortu fu Gado kmoto? Noso na unu w’wan yere en?

37 Efu wan sma feni taki a de wan profeiti, noso taki a yeye gi en a koni fu du wan spesrutu sani, dan a musu agri nanga den sani di mi skrifi unu, bika na Masra srefi sori mi taki na so sani musu waka. 38 Ma efu wan sma no wani teki den sani disi, dan Gado no o teki en tu.* 39 Fu dati ede, mi brada, tan du muiti fu taki profeititori. Ma no tapu trawan fu taki tra tongo. 40 Meki ala sani psa na wan fasi di fiti èn soleki fa sani seti.*