Gi den Hebrewsma

6 Fu dati ede, now di wi leri den fosi sani kba di abi fu du nanga Krestes, dan meki wi du ala muiti fu tron lepi sma. Kow no poti wan fundament baka. Sobun, a no de fanowdu fu go leri baka taki sma musu abi berow fu sani di no e tyari nowan wini kon, taki den musu bribi na ini Gado, 2 noso taki difrenti sortu dopu de, taki sma e poti anu na tapu trawan, taki dedesma o kisi libi baka èn taki sma o kisi têgo krutu. 3 Efu Gado gi wi na okasi, dan wi o meki ala muiti fu tron lepi sma.

4 Son sma gwe libi a bribi. Nowan enkri fasi de fu meki den sma disi kisi berow baka, fu di den ben kon sabi kba san na a fri kado fu hemel, den ben kisi a santa yeye, 5 den ben kon sabi kba san na a bun leri fu Gado èn den ben kon sabi kba sortu blesi* den ben o kisi na ini a ten di e kon. 6 Yepi no de gi den sma disi moro fu di den spikri a Manpkin fu Gado na wan postu ete wan leisi èn den gi en syen na fesi ala sma. 7 Te alen e fadon furu, dan dati na wan blesi fu Gado. Te a gron e soigi na alenwatra, dan sani o gro gi den sma di e wroko a gron. 8 Ma efu makabon e gro na ini a gron, dan sma no o wani en èn a no o teki langa fosi den fluku en. Te fu kba, den o bron en.

9 Ma unu, lobi brada nanga sisa, aladi wi e taki na a fasi disi, tòg wi sabi taki sani e go moro bun nanga unu leki nanga den sma di gwe libi a bribi. Unu e du sani di o meki taki Gado ferlusu unu. 10 Bika ala ten Gado e du san reti. Dati meki a no o fergiti a wroko di unu du nanga a lobi di unu sori gi a nen fu en, fu di unu horbaka gi den santawan èn unu e du disi te nanga now. 11 Ma wi e winsi taki ibriwan fu unu tan wroko fayafaya soleki fa unu gwenti du, so taki unu kan de seiker fu a howpu te na a kba. 12 Dan unu no o kon lesi, ma unu o teki na eksempre fu den sma di kisi den sani di Gado pramisi den, fu di den ben abi bribi èn fu di den ben abi pasensi.

13 Bika di Gado pramisi Abraham wan sani, a sweri na ensrefi, fu di sma no de di bigi moro en. 14 A ben taki: „Yu kan de seiker taki mi o blesi yu. Mi o meki yu bakapkin kon furu.” 15 Na baka di Abraham hori pasensi a kisi a sani di Gado pramisi en. 16 Libisma e sweri na wan sma di bigi moro den èn a sweri fu den e koti ala trobi, bika dati na wan dyaranti gi den. 17 Dati meki Gado meki wan sweri. A du dati fu sori den sma di o kisi den sani di a pramisi den, taki san a abi na prakseri fu du, no man kenki. 18 Gado pramisi unu a sani disi èn a sweri taki a o du en. Den tu sani disi no man kenki, bika Gado no man lei. Dati meki unu di lon go kibri na en kan kisi dek’ati fu grabu a howpu di de na un fesi. 19 A howpu disi de leki wan ankra gi wi.* A tranga, a e hori wi tnapu èn a e tyari wi psa a garden go na insei. 20 Wan sma ben go na insei fosi wi, gi a bun fu wi. A sma dati na Yesus di tron wan granpriester fu têgo, neleki Melkiseidek.