A fosi brifi gi Timoteyus
1 Mi, Paulus, na wan apostel fu Krestes Yesus. Na Gado wi Ferlusuman nanga Krestes Yesus, di de a howpu fu wi, gi mi a wroko dati. 2 Mi e skrifi a brifi disi gi yu Timoteyus.* Yu na wan bribiman leki mi èn mi e si yu leki mi eigi pkin.
Meki Gado, a P’pa, nanga wi Masra Yesus Krestes sori yu bun-ati nanga sar’ati. Meki a freide fu den de nanga yu.
3 Di mi ben de fu go na Masedonia mi gi yu dek’ati fu tan na Efeise. Ma now mi e gi yu dek’ati tu fu warskow son sma taki den no musu kon nanga wan tra leri. 4 Den no musu arki leitori èn den no musu lasi ten fu go luku suma na den afo fu den. Den sani disi no e tyari nowan wini kon, ma den e meki sma hartaki nomo fu lawlaw sani. Den sani disi no abi noti fu du nanga sani di e kon fu Gado èn den no e tranga sma bribi tu. 5 A rai disi na fu yepi wi fu sori lobi nanga wan krin ati èn nanga wan krin konsensi.* A e yepi wi tu fu sori lobi fu di wi abi bribi sondro fu hoigri. 6 Fu di son sma no e du den sani disi moro, meki den e go na ini wan lo lawlaw taktaki. 7 Den wani leri tra sma den wet fu Gado, ma den srefi no e ferstan san den e taki. Den feni nomonomo taki wan sani de so, aladi den no e ferstan en.
8 Wi sabi taki a Wet bun, solanga wan sma e gebroiki en na wan bun fasi.* 9 Wi sabi tu taki wet no e meki gi ret’ati sma, ma gi den wan di no e hori densrefi na wet èn di trangayesi. Sma e meki wet tu gi ogrisma, gi sondari, gi sma di no e tai hori na trawan, gi sma di no abi lespeki gi santa sani èn gi sma di e kiri p’pa, m’ma noso tra sma. 10 Wet e meki tu gi huruman,* gi mansma di abi seks nanga tra mansma,* gi sma di e grabu tra sma tyari gwe, gi leiman èn gi sma di no e du san den sweri. Ja, wet e meki gi ibri sani di de teige a tru leri 11 di abi fu du nanga a kfalek moi bun nyunsu fu a koloku Gado, di a gi mi fu ferteri sma.
12 Mi e taki Krestes Yesus, wi Masra, tangi taki a gi mi krakti. Na fu di a si taki a kan fertrow mi, meki a poti mi fu du wan wroko gi en, 13 aladi fosi mi ben de wan sma di ben e taki ogri fu Gado, mi ben e ferfolgu sma èn mi no ben abi syen. Ma tòg a ben abi sar’ati nanga mi fu di mi no ben sabi san mi ben e du èn mi ben e du den sani disi fu di mi no ben e bribi. 14 Ma a Gado fu wi sori mi furu bun-ati. A meki mi kisi bribi èn a sori lobi gi mi, fu di mi na wan bakaman fu Krestes Yesus. 15 A sani di taki dyaso, tru èn yu kan bribi en: Krestes Yesus kon na grontapu fu ferlusu sondari. Fu ala den sondari disi, mi na a moro bigiwan. 16 Ma Krestes Yesus ben abi sar’ati nanga mi. Dati meki a ben kan teki mi, di de a moro bigi sondari, fu sori sma taki a abi furu pasensi. Na so mi ben kan de wan eksempre gi den sma di o bribi na ini en, so taki den kan kisi têgo libi.
17 We, meki a têgo Kownu, a wan di e libi fu ala ten, a wan di sma ai no man si, a wan-enkri Gado, kisi grani nanga glori fu têgo, ja, fu ala ten. Amen.
18 Timoteyus, mi pkin, mi e gi yu den rai disi di e kruderi nanga den sani di den profeititori ben taki fu yu, so taki yu kan tan feti a bun feti, 19 aladi yu e tan bribi èn yu e tan abi wan krin konsensi. Na fu di son sma no abi wan krin konsensi moro, meki den lasi a bribi fu den neleki wan sipi di sungu. 20 Himeneyus nanga Aleksander na tu fu den. Ma mi libi den gi Satan, so taki a strafu di den o kisi kan leri den taki den no musu taki ogri fu Gado.