Maleaki

3 „Luku, mi e seni mi boskopuman na mi fesi fu sreka* a pasi gi mi. A tru Masra di unu e suku o kon na en tempel na wan ten di sma no e ferwakti. A boskopuman fu a ferbontu di unu e wakti fayafaya o kon tu. Iya, a o kon trutru”, na so Yehovah di e tiri den legre taki.

2 „Ma suma o de srekasreka na a dei te a o kon? Suma o man tan tnapu te a o de fu si? Bika a o de leki a faya di wan sma e gebroiki fu meki gowtu nanga solfru kon soifri èn leki a sopo fu wan sma di e wasi krosi. 3 A o sdon leki wan sma di e krin solfru, dan a o krin den Leifisma. A o krin den leki gowtu èn leki solfru, dan den o tyari wan ofrandi gi Yehovah nanga wan krin ati. 4 Yehovah o lobi* na ofrandi di Yuda nanga Yerusalem o tyari gi en. A o de leki fa a ben de langa ten psa kba èn leki fa a ben de fosten.

5 Mi o kon na unu fu krutu unu. Wantewante mi o krutu den bonuman, den sma di e waka gi den trowpatna, den sma di e meki falsi sweri, den sma di e bedrigi den wrokoman fu den, den sma di e pina den uma di masra dede kba, den sma di e pina den pkin di no abi p’pa* nanga den sma di no wani yepi* den trakondre sma. Den sma disi no e lespeki mi”, na so Yehovah di e tiri den legre taki.

6 „Mi na Yehovah. Mi no e kenki.* Unu na den bakapkin fu Yakob. Dati meki unu de na libi ete. 7 Sensi a ten fu den afo fu unu, unu trangayesi den wet fu mi èn unu no hori unsrefi na den. Ma efu unu drai kon baka na mi, dan mi o drai kon baka na unu”, na so Yehovah di e tiri den legre taki.

Dan unu aksi: „Fu san ede yu e taki dati wi musu drai kon baka na yu?”

8 „Libisma man fufuru wan sani fu Gado? Ma tòg unu e fufuru mi.”

Dan unu aksi: „San wi fufuru fu yu?”

„Unu no e gi mi a di fu tin pisi* fu den sani di unu abi èn den tra sani di unu musu gi mi. 9 Fluku o kon na unu tapu* fu di unu e fufuru sani fu mi. Iya, a heri pipel e du dati. 10 Ma grantangi, un luku san mi o du te unu teki a di fu tin pisi* fu ala den sani di un musu tyari gi mi èn unu poti dati na ini den maksin, so taki n’nyan kan de na ini mi oso baka. Unu o si fa mi o opo den sroisi fu hemel, so taki blesi fadon leki alen gi unu. Mi o blesi unu so te, taki unu no o mankeri nowan sani”, na so Yehovah di e tiri den legre taki.

11 „Mi o sorgu taki nowan sprenka kon nyan den sani fu unu* di e gro na den gron. Mi o sorgu taki den droifibon e gi n’nyan”, na so Yehovah di e tiri den legre taki.

12 „Dan ala den pipel o taki fa unu de so koloku fu di a kondre fu unu o de wan kondre fu prisiri”, na so Yehovah di e tiri den legre taki.

13 „Unu taigi mi hati sani”, na so Yehovah taki.

Ne unu aksi: „Sortu sani wi taki di hati yu?”

14 „Un taki: ’Na fu soso wi e dini Gado. Sortu wini wi kisi di wi du san a taki? Sortu wini wi kisi di wi sori Yehovah di e tiri den legre taki wi e sari fu den sondu di wi du? 15 Wi e si taki na den heimemre sma de koloku. Sani e go bun nanga den sma di e du ogri. Den e du wan lo ogri, ma Gado no e du noti nanga den.’”

16 Na a ten dati den sma di abi lespeki gi Yehovah ben e taki nanga makandra. Iya, ibriwan fu den ben e taki nanga wan trawan. Yehovah ben e poti prakseri na den èn a ben e arki. Ne wan buku ben skrifi na fesi Yehovah fu memre den sma di abi lespeki gi en èn di e hori en nen na prakseri.*

17 Yehovah di e tiri den legre taki: „Den o kon de fu mi na a dei te mi meki den tron mi spesrutu gudu. Mi o sori sar’ati gi den neleki fa wan p’pa e sori sar’ati gi en boi di e du san a taki. 18 Dan unu o man si krin baka suma na wan ret’ati sma èn suma na wan ogri sma, suma e dini Gado èn suma no e dini en.”