Gi den Romesma

14 Nanga prisiri un musu teki wan sma di swaki na ini a bribi. No krutu en te a abi wan tra fasi fu si sani.* 2 A wan sma e bribi taki a kan nyan ala sani, ma a sma di swaki e nyan soso gruntu. 3 A sma di e nyan no musu wiswasi a sma di no e nyan. A sma di no e nyan no musu krutu a sma di e nyan, bika Gado teki a sma dati tu. 4 Suma na yu fu krutu a futuboi fu wan tra sma? Na en eigi basi o taki efu a bun noso efu a no bun. Ja, fu di Yehovah* o yepi en meki a o man du san bun.

5 A wan sma feni taki a wan dei prenspari moro a trawan. Wan tra sma feni taki ala dei na a srefi. Ibri sma musu de seiker taki a sani di a besroiti fu du, bun. 6 Efu wan sma feni taki wan dei prenspari, dan meki a de wan dei fu gi Yehovah* grani. Na so a de tu taki te wan sma e nyan, a e du dati fu gi Yehovah* grani, bika a e taki Gado tangi. Te wan sma no e nyan, a e du dati fu gi Yehovah* grani tu, bika a e taki Gado tangi tu. 7 Fu taki en leti, nowan fu wi e libi soso gi ensrefi èn nowan sma e dede soso gi ensrefi. 8 Bika efu wi de na libi, wi e libi gi Yehovah* èn efu wi dede, wi dede gi Yehovah.* Fu dati ede, awinsi wi de na libi noso awinsi wi dede, wi na fu Yehovah.* 9 Na fu dati ede Krestes dede èn na fu dati ede a kon na libi baka, so taki a ben kan de Masra fu den wan di dede èn fu den wan di e libi.

10 Ma fu san ede yu e krutu yu brada? Fu san ede yu e wiswasi yu brada? Bika wi alamala o tnapu na fesi Gado fu a krutu wi. 11 Bika Gado Buku taki: „Yehovah* taki: Neleki fa a de seiker taki mi e libi, na so a de seiker tu taki ’ibri kindi o boigi gi mi èn ibri tongo o taki krin taki mi na Gado.’” 12 Sobun ibriwan fu wi o abi fu gi Gado frantwortu fu den sani di wi du.

13 Fu dati ede, no meki wi krutu makandra moro, ma meki wi teki a besroiti fu no du nowan sani di kan meki a bribi fu wi brada kon swaki noso di kan meki a sondu. 14 Leki wan bakaman fu Masra Yesus mi sabi èn mi e bribi taki nowan sani de di doti fu ensrefi. Ma efu wan sma feni taki wan sani doti, dan a doti gi en. 15 Efu yu e nyan wan sani èn dati e meki yu brada firi wan fasi, dan yu no e sori lobi moro. No meki den sani di yu e nyan, pori a bribi fu yu brada gi suma Krestes dede. 16 Fu dati ede, no meki sma taki takru fu den bun di unu e du. 17 Bika a no den sani di wan sma e n’nyan noso dringi o meki taki a go na ini Gado Kownukondre. Ma a sma musu de wan ret’ati sma, a musu libi bun nanga trawan èn a musu de nanga prisiri. A santa yeye o yepi en fu de so wan sma. 18 Bika efu wan sma de wan srafu fu Krestes èn a e du den sani disi, dan Gado o feni en bun èn libisma o lespeki en.

19 Fu dati ede, no du nowan sani fu pori a freide, ma du sani fu gi trawan dek’ati. 20 No pori a wroko fu Gado fu n’nyan ede. A tru taki ala n’nyan bun fu nyan, ma na wan ogri* te wan sma e nyan wan sani di kan swaki a bribi fu trawan. 21 A moro bun fu no nyan meti, fu no dringi win, noso fu no du nowan sani di o swaki a bribi fu yu brada. 22 Na yu nanga Gado w’wan sabi san yu e bribi. A sma di no e krutu ensrefi te a e du wan sani di a feni bun, de koloku. 23 Ma efu a e nyan aladi a e tweifri, dan a kisi krutu kba, bika a no e nyan fu di a e bribi. Ja, ala sani di wan sma e du sondro fu bribi, na sondu.