Esekièl

22 Yehovah taki baka nanga mi. A taigi mi: 2 „Manpkin fu libisma, yu de srekasreka fu krutu* den sma fu a foto disi di lobi kiri trawan? Yu o ferteri den sortu groskin sani den du? 3 Yu musu taki: ’Disi na san a Moro Hei Masra Yehovah taki: „Yu na wan foto di e kiri yu eigi sma. A ten o doro taki yu kisi krutu. Yu doti yusrefi fu di yu meki fisti gado* na ala sei. 4 Yu sondu fu di yu kiri sma. Den fisti gado fu yu meki taki yu no krin. Den sani di yu du meki taki yu no abi furu ten moro. Dyonsro yu o kisi strafu. Dati meki mi o meki yu tron wan spotpopki gi den pipel fu grontapu. Sma fu ala kondre o wiswasi yu. 5 Yu na wan foto di abi pornen èn di e du wan lo bruya sani. Dati meki den kondre di de krosbei fu yu nanga den wan di de farawe fu yu o spotu yu. 6 Luku! Ibriwan fu den edeman fu Israel di de na ini yu, Yerusalem, e gebroiki en makti fu kiri sma. 7 Den e pina den p’pa nanga m’ma di e libi na ini yu. Den e bedrigi den trakondre sma di de na ini yu, den e du ogri nanga den pkin di no abi p’pa* èn nanga den uma di masra dede kba.”’”

8 „’Yu e wiswasi den santa presi fu mi èn yu no e sori lespeki gi den Sabat fu mi. 9 Na ini yu sma de di e taki ogr’ati lei fu trawan fu kan kiri den. Den e nyan den ofrandi di sma e tyari gi den falsi gado na tapu den bergi. Leti na ini yu den e du ogri sondro fu syen. 10 Den sma disi e d’don nanga a frow fu den p’pa.* Den e dwengi den uma di abi den munsiki èn di no krin fu d’don nanga den. 11 Leti na ini yu wan man e du morsu sani nanga a frow fu wan tra man. Sondro fu syen wan trawan e doti a wefi fu en manpkin, fu di a e d’don nanga en. Wan trawan baka e d’don nanga tranga nanga en sisa, iya, na umapkin fu en eigi p’pa. 12 Na ini yu den e teki tyuku fu kiri sma. Yu e aksi sma rente èn yu e meki moni na den tapu. Na wan ogr’ati fasi yu e puru moni na sma anu. Iya, yu fergiti mi’, na so a Moro Hei Masra Yehovah taki.

13 ’Luku! Mi no lobi en srefsrefi taki yu e du kruka sani fu meki moni èn taki yu e kiri den sma di e libi na ini yu. 14 Yu o abi dek’ati* noso krakti ete te mi o du wan sani nanga yu? Na mi, Yehovah, taki èn na mi o du wan sani. 15 Mi o panya yu go na den pipel èn mi o yagi yu go na tra kondre. Mi o tyari wan kba kon na den doti sani di yu e du. 16 Yu o kisi bigi syen èn ala den pipel fu grontapu o si dati. Yu sa musu fu sabi taki mi na Yehovah.’”

17 Ne Yehovah taki baka nanga mi. A taigi mi: 18 „Manpkin fu libisma, den Israelsma kon de leki doti skuma. Den alamala de leki kopro, blik, isri nanga loto na ini wan onfu. Iya, den kon de leki doti skuma di e kon na loktu te sma e smèlter solfru.

19 Dati meki a Moro Hei Masra Yehovah taki: ’Fu di unu alamala kon de leki doti skuma, meki mi e tyari unu kon na wán na ini Yerusalem. 20 Neleki fa sma e poti solfru, kopro, isri, loto nanga blik na ini wan onfu èn den e blo a faya fu meki den smèlter, na so mi o tyari unu kon na wán fu puru atibron na unu tapu. Mi o blo na unu tapu fu meki unu smèlter. 21 Mi o tyari unu kon na wán èn mi o blo na un tapu fu puru atibron na unu tapu. A o de leki wan faya di o smèlter unu na ini a foto. 22 Neleki fa sma e smèlter solfru na ini wan onfu, na so unu o smèlter na ini a foto. Unu sa musu fu sabi taki na mi, Yehovah, puru atibron na unu tapu.’”

23 Ne Yehovah taki baka nanga mi. A taigi mi: 24 „Manpkin fu libisma, taigi a kondre: ’Yu na wan kondre di no o kon krin èn pe alen no o fadon na a dei di mi o puru atibron na un tapu. 25 Den profeiti di e libi drape span anu makandra fu du ogri. Den tyari densrefi leki wan lew di e meki b’bari èn di e priti tra meti. Den e swari sma. Den e teki den gudu nanga den diri sani fu tra sma. Den meki taki furu uma na ini a kondre lasi den masra. 26 Den priester di e libi drape no hori a wet fu mi. Den e tan doti den santa presi fu mi. Den no e hori na prakseri san santa èn san no santa. Den no e leri sma san krin èn san no krin. Den no wani hori den Sabat fu mi. Den e pori mi nen. 27 Den granman di e libi na ini a kondre de leki ogri busdagu di e priti tra meti. Den e kiri sma, soso fu gudu densrefi. 28 Ma den profeiti tapu den sondu fu den granman, neleki te sma e ferfi wan skotu kon weti. Den e ferteri den granman fisyun di no o kon tru èn den e lei gi den te den e koti luku. Den e taki: „Disi na san a Moro Hei Masra Yehovah taki”, aladi a no Yehovah taki so. 29 A pipel fu a kondre bedrigi sma. Den fufuru sma sani, den pina den mofinawan nanga den pôtisma. Den bedrigi den trakondre sma èn den no krutu sani na wan reti fasi.’

30 ’Mi ben e luku suma fu den ben o meki a ston skotu kon bun baka èn suma ben o tnapu na mi fesi na a broko pisi fu a skotu, so taki mi no ben o meki a kondre kisi pori. Ma mi no feni nowan sma. 31 Dati meki mi o puru atibron na den tapu. Na atibron fu mi o de leki wan faya di o kiri den. Mi o strafu den gi den ogri di den du’, na so a Moro Hei Masra Yehovah taki.”